John 17

Dagbani Bible (Naawuni Kundi Kasi)

← Chapter 16 Jump to: Chapter 18 →

1Yisa ni daa tɔɣisi yɛtɔɣa ŋɔ naai, o daa kpuɣila o zuɣu lihi zuɣusaa ka gbaai Naawuni suhibu yɛra, “M Ba, saha yipa paaya ni a chɛ ka a Bia nya jilima, ka a Bia maa gba chɛ ka a nya jilima.

2Dama nyini n-ti o yiko ni o su daadam kam fukumsi, ka niŋ o yiko ni o ti ninvuɣ’ shɛb’ zaa a ni zaŋ ti o nyɛvili din ka bahigu.

3Nyɛvili din ka bahigu maa nyɛla ni ninsalinim’ baŋ nyin’ ŋun nyɛ Naawuni maŋli ŋɔ, ka baŋ man’ Yisa Masia so a ni timna la.

4N chɛ ka a nya jilima dunia ŋɔ ni, ka tum tuun’ shɛlikam a ni daa ti ma ni n tum la naai.

5M Ba, pumpɔŋɔ chɛ ka n nya jilima a sani, jilima shɛli n ni daa pun mal’ a sani ka dunia na bi nam la.

6“N kahig’ a yuli wuhi ninvuɣ’ shɛb’ a ni zaŋ ti ma dunia ŋɔ ni la; nyini n-su ba ka daa zaŋ ba ti ma, ka bɛ mi deeg’ a yɛligu.

7Pumpɔŋɔ bɛ baŋya ni binshɛɣukam a ni zaŋ ti ma la yila a sanna;

8dama n zaŋ yɛtɔɣ’ shɛŋa a ni daa tɔɣisi ma la tɔɣisi ba, ka bɛ dee’ li ka baŋ ni n shiri yila a sanna, ka niŋ yɛda ni nyini n-shiri tim ma na.

9“Bɛna ka n suhir’ a tira; m bi suhir’ a tirila dunianima. A ni zaŋ ninvuɣ’ shɛb’ ti ma maa ka n suhir’ a tira, dama bɛ nyɛla a niriba.

10N ni su ninvuɣ’ shɛb’ zaa nyɛla a niriba, a mi ni su ninvuɣ’ shɛb’ zaa nyɛla n niriba, ka n nyari jilima bɛ sani.

11M bi lan yɛn be dunia ŋɔ ni pumpɔŋɔ, dama n labirila a sanna, amaa bɛn’ kul ni beni. M Ba Suŋ, gbib’ ba a yuli din nyɛ yu’ shɛli a ni daa wuhi ma la zuɣu, ka di chɛ ka bɛ leei zaɣ’ yini kaman m min’ a ni nyɛ zaɣ’ yini shɛm.

12N ni yi be bɛ sani maa, n yi gbib’ ba la a yuli din nyɛ yu’ shɛli a ni daa wuhi ma la zuɣu. N kul gbib’ ba viɛnyɛliŋga hal ka bɛ ni yino bi bɔrigi naɣila bahi yoli bia la ni di chɛ ka nyin’ Naawuni yɛligu niŋ pali.

13N labirila a sanna pumpɔŋɔ, dinzuɣu ka n tɔɣisiri yɛtɔɣa ŋɔ n ni na be dunia ŋɔ ni ŋɔ, ni n suhupiɛlli pali bɛ suhuri ni yɛlimaŋli.

14N zaŋ a yɛligu ti ba, ka dunianim’ zaɣisi ba, bɛ ni lan pa dunia ŋɔ nima kaman n ni pa dunia ŋɔ nir’ shɛm la zuɣu.

15M bi suhir’ a ni a yihi ba dunia ŋɔ ni, amaa n suhir’ a mi ni a gbib’ ba ka Sintani ku paai ba.

16Bɛ pala dunia ŋɔ nima kaman n ni pa dunia ŋɔ nir’ shɛm.

17A yɛligu nyɛla yɛlimaŋli, dinzuɣu zaŋm’ a yɛlimaŋli maa m-mali ba ka bɛ be kasi.

18A ni daa tim ma dunia ŋɔ ni na shɛm, lala ka n gba tim ba.

19Bɛ zuɣu ka m mali mmaŋa m-be kasi ni di chɛ ka bɛ gba mali bɛmaŋa m-be kasi a yɛlimaŋli maa puuni.

20“M bi suhir’ a tirila bɛmbɔŋɔ kɔŋko, amaa n suhir’ a tiri bɛn gba na yɛn niŋ ma yɛda bɛmbɔŋɔ yɛligu wumbu ni la

21ni bɛ zaa leei zaɣ’ yini kaman nyini m Ba ni be n ni ka n gba be a ni shɛm la, ka di chɛ ka bɛ gba be ti ni, ka dunianim’ niŋ yɛda ni nyini n-shiri tim ma na.

22N zaŋ jilima shɛli a ni daa zaŋ ti ma la ti ba ni di chɛ ka bɛ leei zaɣ’ yini kaman m min’ a ni nyɛ zaɣ’ yini shɛm la.

23Ka n yi be bɛ ni ka a mi be n ni, dina n-ni chɛ ka bɛ leei zaɣ’ yini ni yɛlimaŋli, ka dunianim’ baŋ ni nyini n-shiri tim ma na, ka lan baŋ ni a yuri bɛn niŋ ma yɛda maa kaman a ni yuri ma shɛm.

24“M Ba, m bɔri ni a chɛ ka a ni daa zaŋ ninvuɣ’ shɛba ti ma la ti be n sani n ni ti yɛn be luɣ’ shɛl’ la n-nya jilima shɛli a ni daa zaŋ ti ma ka di nyɛla a ni daa pun yuri ma ka dunia na bi nam la zuɣu.

25M Ba ŋun nyɛ wuntialan’ ŋɔ, dunianim’ bi mi a, amaa man’ mi a, ka bɛmbɔŋɔ gba mi ni nyini n-shiri tim ma na.

26M pun kahig’ a yuli wuhi ba, ka ni lan kahigi li wuhi ba pahi, ka di chɛ ka yurilim shɛli a ni yuri ma la be bɛ ni, ka n gba be bɛ ni.”

← Chapter 16 Jump to: Chapter 18 →