John 8 — Dagbani Bible (Naawuni Kundi Kasi)

11Ka o yɛli, “N Duuma, bɛ ni so bi lan yɛl’ lala.” Ka Yisa yɛl’ o, “Man’ gba bi yɛli ni a simdi kubu. Cham’ a chandi, amaa ka di lan tum alahichi yaha.” ]

12Ka Yisa daa lan gbaai niriba maa yɛtɔɣa tɔɣisibu yɛra, “Mani n-nyɛ dunia ŋɔ neesim; ka ŋunkam doli ma ku be zibisim ni, amaa o ni malila nyɛvili neesim.”

13Ka Farisiinim’ daa yɛl’ o, “A di amaŋ’ shɛhira; dinzuɣu a shɛhira maa pala shɛhira maŋli.”

14Ka Yisa yɛli ba, “Hal n yi di mmaŋ’ shɛhira, n shɛhira maa nyɛla shɛhira maŋli, dama m mi n ni yi shɛl’ na, ka lan mi n ni chani shɛli, amaa yinim’ ʒi n ni yi shɛl’ na bee n ni chani shɛli.

15Yi karitila nimmira saria, amaa man’ bi kariti so saria.

16Ka hal n yi kari so saria gba, n saria karibu maa nyɛla din tuhi, dama pa n kɔŋko n-kariti saria maa, amaa m mini ŋun tim ma na maa n-kariti li.

17Di sabi yi zaligu ni ni niriba ayi shɛhiradibo n-nyɛ yɛlimaŋli.

18N di mmaŋ’ shɛhira, ka m Ba ŋun tim ma na maa gba di ma shɛhira pahi.”

19Ka bɛ bɔh’ o, “Ya ka a ba maa lee be?” Ka Yisa yɛli ba, “Yi ʒi ma bee m Ba. Yi yi di mi ma, yi naan mi m Ba maa gba.”

20Yisa daa tɔɣisi yɛtɔɣa ŋɔ zaa la o ni daa wuhiri niriba Naawuni jɛmbu duu puuni liɣiri tɔhibu shee la; amaa ka so daa bi gbaag’ o, dama o saha daa na bi paai.

21Ka Yisa daa lan yɛli ba, “N ni chaŋ ka yi ti bo ma kɔŋ, ka yi ni ti kpi ni yi daalahichi. N ni chani luɣ’ shɛli yi ku tooi ka nimaani na.”

22Ka Yɛhudianim’ maa bɔhi, “O yɛn kula omaŋ’ zuɣu n-chɛ ka o yɛli ni o ni chani luɣ’ shɛli maa ti ku tooi ka nimaani na maa?”

23Ka o yɛli ba, “Yi yila dunia ŋɔ ni na, amaa man’ yila alizanda ni na; yi nyɛla dunia ŋɔ niriba, amaa man’ pala dunia ŋɔ nira.

24Lala zuɣu ka m pun yɛli ya ni yi ni ti kpi ni yi daalahichi, dama yi yi bi niŋ yɛda ni n nyɛla n ni pun yɛli ya ni n nyɛ so la, yi shiri ni ti kpi ni yi daalahichi.”

25Ka bɛ bɔh’ o, “Ŋuni n-lee nyɛ a?” Ka Yisa yɛli ba, “N nyɛla n ni daa pun yɛli ya ni n nyɛ so piligu ni la.

26M mali yɛla pam din ni tɔɣisi zaŋ chaŋ yi polo ka kari ya saria, amaa ŋun tim ma na maa nyɛla yɛlimaŋlilana, ka n ni wum shɛli o sani, dina ka m mali yɛri dunianima.”

27Bɛ daa bi baŋ ni Naawuni ŋun nyɛ o Ba yɛla ka o tɔɣisiri ba maa.

28Ka Yisa lan yɛli ba, “Yi yi ti zaŋ Daadam Bia sa zuɣusaa yi ni baŋ ni mani m-bala, ka lan baŋ ni m bi niŋdi shɛli mmaŋmaŋ’ yiko ni, amaa m Ba ni wuhi ma shɛm, dina ka m mali tɔɣisira.

29Ŋun tim ma na maa be n sani, o na ʒi n-chɛ ma n ko, dama n kul tumdila din tiɣir’ o nini sahakam.”

30Ka o ni daa yɛli shɛm ŋɔ zuɣu chɛ ka niriba pam niŋ o yɛda.

31Di saha ka Yisa daa yɛli Yɛhudianim’ bɛn niŋ o yɛda maa, “Yi yi doli n yɛligu, yi ni niŋ n nyaandol’ maŋa,

32ka baŋ yɛlimaŋli ni nyɛ shɛli, ka yɛlimaŋli maa yihi ya dabitim ni.”

33Ka bɛ yɛl’ o, “Ti nyɛla Ibrahimma zuliya, ka na ʒi n-leei so daba; ka di chaŋ wula ka a ti yɛli ni ti ni yi dabitim ni?”

34Ka Yisa garigi yɛli ba, “Achiikatim, yɛlimaŋli ka n yɛri ya, ŋunkam tumd’ alahichi nyɛla alahichi dabili.

35Ka dabili mi na ʒi n-kpalim be ŋun su o yiŋa sahakam, amaa yilibia ŋun’ kul ni beni sahakam.

36Dinzuɣu Bia maa ŋun’ yi yihi ya dabitim ni, yi shiri yiya ni yɛlimaŋli.

37M mi ni yi nyɛla Ibrahimma zuliya; amaa di mi zaa yoli, yi bɔri ni yi ku ma, dama n yɛligu bi kpɛri yi suhuri ni.

38N tɔɣisirila n nini ni nya shɛli m Ba sani; ka yi mi niŋdi yi nini ni nya shɛli yi ba sani,”

39Ka bɛ yɛl’ o, “Ti yaba n-nyɛ Ibrahimma.” Ka Yisa yɛli ba, “Yi yi di nyɛla Ibrahimma yaansi, yi naan tumdi kaman Ibrahimma ni daa tumdi shɛm.

40Yɛlimaŋ’ shɛli n ni wum Naawuni sani, dina ka m mali tɔɣisiri ya ka yi bɔri ni yi ku ma maa, amaa Ibrahimma daa bi niŋdi lala.

41Yi tumdila yi ba tuma.” Ka bɛ yɛl’ o, “Ti pala dagɔribihi; ti malila ba yino, ŋuna n-nyɛ Naawuni.”

42Ka Yisa yɛli ba, “Yi ba yi di nyɛ Naawuni yi naan yuri ma, dama o sani ka n yina; pa mmaŋmaŋ’ yubu zuɣu ka n kana, amaa ŋun’ Naawuni n-tim ma na.

43Ka bɔ n-niŋ ka yi bi baŋdi n yɛligu gbinni? Yi ni bi deeri n yɛligu maa zuɣu n-chɛ ka yi bi baŋdi di gbinni maa.

44Yi ba nyɛla Sintani, ka yi yubu nyɛla ni yi tum yi ba Sintani ni yu shɛm. O daa pun nyɛla ninvuɣ’ kura dunia piligu ni ha, ka o baɣa ka yɛlimaŋli ni, dama yɛlimaŋli ka o ni hal baabiɛla. O ni ŋmari ʒiri maa, o biɛhigu m-bala, dama o nyɛla ʒirilana ka lan nyɛ ʒiri ba.

45N ni yɛri ya yɛlimaŋli maa zuɣu ka yi bi niŋdi ma yɛda.”

46Ka o daa bɔhi ba, “Yi ni ŋuni n-ni tooi wuhi n daalahichi ni nyɛ shɛli? Ka n yi tɔɣisirila yɛlimaŋli, bɔ n-niŋ ka yi bi niŋdi ma yɛda?

47Ŋun nyɛ Naawuni nira n-deeri Naawuni yɛligu; amaa yinim’ ni pa Naawuni niriba maa zuɣu n-chɛ ka yi bi deeri o yɛligu maa.”

48Ka Yɛhudianim’ maa daa bɔhi Yisa, “Ti ni yɛli ni a nyɛla Samaria nira ka alizin’ biɛɣu ʒi a zuɣu la, di pala yɛlimaŋli?”

49Ka Yisa garigi yɛli ba, “Alizin’ biɛɣu bi ʒi n zuɣu; n tirila m Ba Naawuni jilima, amaa ka yinim’ lee ʒiɛmdi ma.

50M bi bɔri mmaŋ’ jilima tibu, amaa yino n-naɣ’ beni m-bɔri ni n nya jilima, ŋun’ mi n-nyɛ sariakarita.

51Achiikatim, yɛlimaŋli ka n yɛri ya, nir’ yi doli n yɛligu o ku kpi hal abada.”

52Ka Yɛhudianim’ maa yɛl’ o, “Pumpɔŋɔ ti baŋya ni alizin’ biɛɣu n-shiri ʒi a zuɣu, dama ti yab’ Ibrahimma min’ anabinim’ zaa kpiya, ka nyin’ ti yɛli ni nir’ yi dol’ a yɛligu o ku kpi hal abada.

53Anabinim’ zaa kpiya; ka nyin’ lee zaŋ amaŋ’ leela ŋuni? A gari ti yab’ Ibrahimma ŋun daa kpi maa?”

54Ka Yisa yɛli ba, “N yi tiri mmaŋ’ jilima, n jilima maa nyɛla yoli; m Ba so yi ni yɛli ni o nyɛla yi Naawuni la n-tiri ma jilima.

55Mani m-mi o, amaa yinim’ kul ʒi o. Ka n yi yɛli ni n ʒi o, n ni leei ʒirilana kaman yinim’ la. M mi o, ka dol’ o yɛligu.

56Yi yab’ Ibrahimma suhu daa piɛli ni o nya n saha ŋɔ, ka mi daa shiri nya li ka di niŋ o suhupiɛlli.”

57Ka Yɛhudianim’ maa yɛl’ o, “A yuma na bi paai yuun’ pihinu, ka wula ka a niŋ n-nya ti yab’ Ibrahimma?”

58Ka Yisa yɛli ba, “Achiikatim, yɛlimaŋli ka n yɛri ya, bɛ ni daa na bi dɔɣi Ibrahimma saha shɛl’ la, man’ daa pun beni.”

59Di saha maa ka bɛ daa kpuɣ’ kuɣa ni bɛ lab’ Yisa, ka o ŋoli yi Naawuni jɛmbu duu maa ni.