Leviticus 19

Dagbani Bible (Naawuni Kundi Kasi)

← Chapter 18 Jump to: Chapter 20 →

1Ka Yawɛ daa yɛli Musa:

2Yɛlim’ Izraɛlnim’ maa zaa: Bɛnya kasi, dama man’ Yawɛ ŋun nyɛ yi Naawuni ŋɔ bela kasi.

3Yi ni sokam lum’ o ma min’ o ba sizuura, ka gbibiya n vuhim dabisa la. Man’ Yawɛ n-nyɛ yi Naawuni.

4Miriya ka yi jɛm wuna bee ka yimaŋmaŋ’ ti zaŋ binshɛli dooi mali binnana. Man’ Yawɛ n-nyɛ yi Naawuni.

5Yi yi yɛn mali suhudoo sara ti Yawɛ, yin’ malimiya li ka di nyɛ din ni chɛ ka o deei yi sara maa.

6Ka yi yi mali sara, di simdi ka yi ŋub’ li dindali maa bee dindali cheei biɛɣu, ka di shɛli yi guui zani hal ni daba ata dali, yin’ zaŋmiya li nyo buɣim.

7Yi yi ŋub’ li daba ata maa dali, di nyɛla din chihira, ka n ku deei li.

8Ka ŋunkam ti ŋub’ li ni nya tibidarigibo. Dama o saɣim Yawɛ binshɛli din be kasi, ka di simdi ka bɛ yihi lala nir’ maa o niriba ni.

9Ka yi yi yɛn kpuɣi yi puri atam, yin’ di kpuɣiya yi putarisi zaa daatam bee ka yi ti lan labi ti yihi binyiha yi daatam kpuɣibu maa nyaaŋa.

10Miriya ka yi pɔhi yi puri ni tiwala zaa bee n-gahim yi wain wal’ shɛŋa din lu tiŋa. Chɛliya li ti nandaamba mini saamba. Man’ Yawɛ n-nyɛ yi Naawuni.

11Miriya ka yi zura bee n-niŋdi tab’ bilikɔnsi bee ŋ-ŋmar’ tab’ ʒiri.

12Di ŋmariya ʒiri ka mali n yuli pɔri pɔri, ka di zuɣu chɛ ka yi dihi yi Naawuni yuli vi. Mani n-nyɛ Yawɛ.

13Miri ka a niŋ a kpee fitiina bee n-fa o. A yi bu so paa ka o tum a tuma, nyin’ di chɛ ka o liɣiri gbe a sani.

14Miri ka a yɛli noli ti tikpiralana bee n-zaŋ kuɣili sɔŋ zom tooni ni o tuui li, amaa zom’ a Naawuni. Mani n-nyɛ Yawɛ.

15Di niŋdiya din bi tuhi yi saria karibu ni, di niŋya faralan’ nirilim bee n-chɛ yi ni di yɛn niŋ shɛm bundan’ zuɣu, amaa doliya wuntia soli n-kariti saria.

16Di yi kpe n-gari kpe m-be kaman munaafichilana a niriba sunsuuni, ka miri ka a yi n-zani a kpee nyɛvili yihibu zuɣu. Mani n-nyɛ Yawɛ.

17Miri ka a mali jɛlinsi a suhu ni ni a kpee, amaa chɛ ka a min’ a kpee maa tɔɣisi mali yi yɛtɔɣa, di yi pa lala a ni ti tum alahichi o zuɣu.

18Miri ka a bɔh’ a kpee biɛri bee n-je suli niŋ o, amaa yum’ a kpee kaman amaŋ’ la. Mani n-nyɛ Yawɛ.

19Gbibiya n zaligunima. Di chɛliya ka naɣ’ bal’ shɛb’ zuliya du yi naɣinyama. Di biriya bimbira balibu buyi pu’ yin’ ni, yi mi di yɛnya taŋgari binyɛrigu.

20Doo yi zaŋ o dab’ paɣa ti do’ so, ka bɛ na bi yo o zuɣu bee ka dab’ paɣa maa na bi yi dabitim ni, ka o dan’ maa lan zaŋ o dɔni, di simdi ka bɛ vihi yɛlli maa. Di bi simdi ka bɛ ku ba, dama paɣa maa na bi yi dabitim ni.

21Amaa di simdi ka doo maa bo piɛlaa ka Yawɛ sanna Yawɛ chirigibu shee suɣili dunol’ ni nti mali taali sanyoo sara.

22Ka maligumaana ti zaŋ taali sanyoo sara piɛlaa maa mali sara Yawɛ tooni o ni tum alahichi shɛli maa zuɣu, ka o nya alahichi chɛ m-paŋ.

23Yi yi ti paai tiŋgbɔŋ maa ni n-sa tihi balibu kam, di wala ni ti nyɛla din dibu chihiri yi sani. Di ni ti nyɛla din chihiri dibu yi sani hal ni yuma ata, ka di bi simdi ni yi di li.

24Ka yuun’ shɛli din pahir’ anahi ni, di wala zaa ni nyɛla wal’ suma ka ni nyɛla wumpaɣibo sara pina Yawɛ sani.

25Amaa yuun’ shɛli din pahiri yuma anu ni, yi ni tooi di di wala, ka lala chɛ ka di woli wala pam tin ya: Man’ Yawɛ n-nyɛ yi Naawuni.

26Miriya ka yi ŋub’ nimdi ka ʒim na be di ni. Di ti bɔhimya baɣitali bee sotali.

27Di ti piniya yi tapaɣisi kɔbiri bee n-kɔrisi taɣi yi teeŋkɔbiri.

28Miriya ka yi ti zaŋ bini ŋmahiŋmahi yimaŋa kpiimba zuɣu bee n-chihi yimaŋ’ chiha. Mani n-nyɛ Yawɛ.

29So miri ka o ti chɛ ka o bipuɣiŋga leei pagɔrili n-dih’ o vi, di yi pa lala, tiŋgbɔŋ maa ni ti leei pagɔra tiŋgbɔŋ, ka di zuɣu chɛ ka ninvuɣ’ biɛtali pali di ni.

30Gbibiya n vuhim dabisa la, ka timiya m biɛhigu shee jilima. Mani n-nyɛ Yawɛ.

31Miriya ka yi ti leei bukpahinima. Di ti bɔnya bɛ shee din ni chɛ ka bɛ kpɛhi ya daɣiri ni. Man’ Yawɛ n-nyɛ yi Naawuni.

32Lumiya bɛn zuɣuri paligi sizuura, ka timiya ninkura jilima, ka zomiya yi Naawuni; Mani n-nyɛ Yawɛ.

33Sana yi be yi tiŋgban’ ni, yin’ di niŋy’ o zaɣ’ biɛɣu.

34Sana yi be yi sani, yin’ zaŋmiy’ o leei tiŋbia yi sani, ka yur’ o kaman yimaŋmaŋ’ la. Dama yi gba daa nyɛla saamba Ijipti tiŋgbɔŋ ni. Man’ Yawɛ n-nyɛ yi Naawuni.

35Miriya ka yi niŋ din bi tu kamaata yi saria karibu ni bee binyɛra wɔɣilim buɣisibu ni bee di tibisim zahimbu ni bee di galisim zahimbu ni.

36Di simdi ka yi mali sania maŋa ni zahimbu maŋa ni tahi’ maŋa ni kuruwa maŋa: Man’ Yawɛ n-nyɛ yi Naawuni ŋun daa yihi ya Ijipti tiŋgbɔŋ ni na.

37Ka di simdi ka yi gbibi n ni zali ya zaligu shɛŋa zaa, ka tummiya di tuma. Mani n-nyɛ Yawɛ.

← Chapter 18 Jump to: Chapter 20 →