Revelation 12

Dagbani Bible (Naawuni Kundi Kasi)

← Chapter 11 Jump to: Chapter 13 →

1Ka shihir’ karili daa puhi zani alizanda ni. Paɣ’ so n-daa ye wuntaŋa kaman chinchini la, ka goli be o naba tiŋli, ka nam zuɣupiligu din mali saŋmarisi pinaayi pil’ o zuɣu.

2O daa malila pua, ka wolisiri n-kuhiri ni biɛrim pam ni o dɔɣi.

3Ka shihir’ shɛli daa lan puhi zani alizanda ni yaha. Waɣ’ ʒiɛ’ biɛ’ titali ŋun mali zuɣur’ ayopɔin mini yila pia, ka nam zuɣupilis’ ayopɔin pil’ o zuɣuri maa daa yina ʒiɛya.

4Ka o daa zaŋ o zuli n-vooi saŋmarisi pirigibu ʒii buta puuni yim zuɣu bahi dunia ni; ka daa chaŋ ti ʒe paɣ’ so ŋun yɛn dɔɣi maa tooni ni o ti dɔɣi ka o di bia maa nyɛvili.

5Ka paɣ’ maa daa ti dɔɣi bidibiga ŋun nyɛ ŋun ti yɛn di nam n-zaŋ kurigu jaaŋgbee su zuliya kam, ka Naawuni daa chɛ ka bɛ to n-kpuɣ’ o bia maa zuɣusaa n-zaŋ o tahi Naawuni sani o nam ʒiishee.

6Ka paɣ’ maa mi daa zo n-chaŋ luɣ’ shɛli Naawuni ni daa mali zal’ o tiŋgban’ nɛli ni ni o be nimaani ka o dihir’ o hal ti paai biɛɣ’ tuhili ni kɔbisiyi ni pihiyɔbu la.

7Ka tɔbu daa yiɣisi alizanda ni. Malaikanim’ zuɣulana Maikil min’ o malaikanima n-daa tuhiri waɣ’ biɛ’ titali maa min’ o gba malaikanima,

8amaa ka Maikil min’ o malaikanim’ maa daa nyaŋ waɣ’ biɛ’ titali maa min’ o malaikanima, ka bɛ lan ka biɛhigu shee alizanda ni.

9Ka bɛ daa zaŋ waɣ’ biɛ’ titali ŋun nyɛ kurimbuni ha waɣ’ so bɛ ni booni Fiɣisira ni Sintani ŋun yɔhim dunia zaa la min’ o malaikanima m-bahi dunia ni na.

10Di saha ka n daa wum kukol’ shɛli alizanda ni ka di yɛri pampam, “Pumpɔŋɔ ti Duuma Naawuni tiliginsim min’ o yiko ni nam ni o Masia fukumsi deebu yipa kana, dama o yihi ŋun nyɛ ti mabihi munaafichilaan’ so ŋun yi fiɣisiri ti mabihi maa Naawuni sani yuŋ ni wuntaŋ’ ni la bahi.

11Ti mabihi maa daa zaŋla Piɛbil’ la ʒim mini bɛ shɛhira niŋbu n-nyaŋ o, dama bɛ daa bi zaɣisi kum di puuni.

12Dinzuɣu alizanda mini bɛn zaa be di ni, maliya suhupiɛlli! Amaa mbusim be dunia mini teeku zuɣu! Dama Sintani siɣi yi sanna ni sujee zaɣ’ titali o ni mi ni o saha bi lan wɔɣa zuɣu.”

13Waɣ’ biɛ’ titali maa ni daa nya ka bɛ yih’ o bahi dunia ŋɔ ni na maa, ka o gbaai kariti doli paɣ’ so ŋun daa dɔɣi bidibiga la.

14Ka Naawuni daa zaŋ tɔrili zaɣ’ titali kpiŋkpama ayi ti paɣ’ maa ni o yiɣi zo ka chɛ wahu maa n-chaŋ mɔɣu ni ti be luɣ’ shɛli Naawuni ni yɛn dihir’ o hal ti paai yuma ata ni pirigili.

15Ka wahu maa daa tuhi kom o nol’ ni na kaman mɔɣili kom la ni di zo n-doli paɣ’ maa ti di o.

16Ka tiŋgbani daa sɔŋ paɣ’ maa bɔɣi, ka waɣ’ titali maa ni daa tuhi ko’ shɛli o nol’ ni na ka di be kaman mɔɣili kom maa zɔna ti kpe di ni, ka di nyu di zaa.

17Di saha ka waɣ’ biɛ’ titali maa suhu daa yiɣisi bahi paɣ’ maa zuɣu, ka o lo tɔbu chaŋ ni o ti tuhi paɣ’ maa zuliya bɛn kpalim n-nyɛ bɛn doli Naawuni zaligunima ka mali Yisa shɛhira la.

18Dimbɔŋɔ nyaaŋa ka o daa chaŋ ti ʒe teeku duli.

← Chapter 11 Jump to: Chapter 13 →