Revelation 15

Dagbani Bible (Naawuni Kundi Kasi)

← Chapter 14 Jump to: Chapter 16 →

1Di saha ka n-daa lan nya alahiziba shihir’ titali alizanda ni. Malaikanima ayopɔin n-daa mal’ alɔbo balibu ayopɔin din kpalim nyaaŋa, dina n-daa nyɛ Naawuni suhuyiɣisili alɔbɔnim’ din bahindi nyaaŋa.

2Ka n daa nya binshɛli din ŋmani teeku, ka ŋmani diɣi din mini buɣim gari taba. Ka bɛn daa nyaŋ biŋkɔbigu la min’ o binnan’ la ni o yuli dalinli deebu la daa ʒe m-baɣi teeku din ŋmani diɣi maa n-gbib’ Naawuni mɔɣilɔnima

3n-yiini Naawuni dabili Musa mini Piɛbil’ la yilli n-yɛra, “Yaa ti Duuma Naawuni, Zallakudura Naa, a tuma nyɛla tuun’ kara ni alahiziba tuma! Yaa ti Duuma Naawuni, ŋun nyɛ ʒiɛmani kam Naa ŋɔ, a soya nyɛla din tuhi, ka nyɛ yɛlimaŋli!

4Yaa ti Duuma Naawuni, ŋuni n-lee ku zo a ka tibig’ a yuli? Dama a ko m-be kasi. Zuliya kam ni kana nti jɛm a, dama a wuntia saria karibu yi palo.”

5Dimbɔŋɔ nyaaŋa ka n daa lihi nya Naawuni jɛmbu duu din nyɛ o shɛhira tanti jɛmbu duu m-be alizanda ni la, ka di yooi.

6Ka malaikanima ayopɔin bɛn mal’ alɔbo balibu ayopɔin la daa yi jɛmbu duu maa ni na. Bɛ daa yɛla binyɛra din paligi paratɛte kaman gol’ la, ka zaŋ salima nyolɔra lo bɛ nyɔri.

7Ka binnɛma anahi la ni yino daa zaŋ salima lah’ ayopɔin din pali Naawuni ŋun be hal ni saha din ka bahigu ŋɔ suhuyiɣisili n-ti malaikanima ayopɔin maa.

8Ka Naawuni daa chɛ ka o jilima min’ o yiko nyɔhi kpe m-pali jɛmbu duu maa, ka so daa bi lan tooi kpe di ni hal ka malaikanima ayopɔin maa alɔbo balibu ayopɔin la tuma zaa ti naai.

← Chapter 14 Jump to: Chapter 16 →