Mark 10

Dyula Bible (LAYIDUKURA)

← Chapter 9 Jump to: Chapter 11 →

1Yezu wilila ka bɔ o yɔrɔ la ka taa Zude mara la, Zurudɛn baa kɔ. Jamaba taara lajɛn a kɔrɔ tugu. A ye kuma ta k'u kalan i n'a fɔ a tun bɛ to k'a kɛ cogo min na ka kɔrɔ.

2Farizinyɛ dɔw gwɛrɛla a la k'a nyininga ko: “A daganin bɛ cɛɛ k'a muso furu sa wa?” U y'o fɔ k'a darabɔ.

3Yezu fana y'u nyininga ko: “Musa ye sariya jumɛn sigi aw ye o koo la?”

4U y'a jaabi ko: “Musa sɔnna ko cɛɛ ka furusasɛbɛ dilan ka sɔrɔ k'a muso bila.”

5Yezu y'a fɔ u ye ko: “Aw ka dusugwɛlɛya le y'a to Musa y'o sariya sigi aw ye.

6N'o tɛ, dinyɛ daminɛtuma na, ‘Ala ye cɛɛ ni muso dan.’

7O le y'a to, cɛɛ bɛn'a faa n'a baa to yen ka nɔrɔ a muso la.

8U fila bɛna jɛn ka kɛ kelen ye. O cogo la, u tɛ fila ye tugu, nga kelen.

9O la, Ala ye fɛɛn min jɛn k'a kɛ kelen ye, mɔgɔ si kana o faran.”

10Yezu n'a ka kalandenw kɔsegira soo tuma min na, u y'a nyininga o koo la tugu.

11A y'a fɔ u ye ko: “Mɔgɔ o mɔgɔ y'a muso bila ka dɔ wɛrɛ ta, o tigi bɛ kakalaya kɛ, a b'a muso fɔlɔ hakɛ ta.

12Ni muso min bɔra a cɛɛ fɛ ka taa furu dɔ wɛrɛ fɛ, o fana bɛ kakalaya kɛ.”

13Mɔgɔw taara Yezu sɛgɛrɛ ni denmisɛn dɔw ye ko a k'a bolo la u kan ka duba kɛ u ye, nga a ka kalandenw wilila o mɔgɔw kama.

14Yezu y'o ye minkɛ, a dimina kalandenw kɔrɔ k'a fɔ u ye ko: “Aw k'a to denmisɛnw ka na ne fɛ, aw kana u bali, sabu, olu bɔnyɔgɔnkow le bɛ don arijana na.

15Tinyɛ na, ne b'a fɔ aw ye ko ni mɔgɔ min ma sɔn Ala ka koo ma i n'a fɔ denmisɛn bɛ sɔn a facɛ ka kuma ma cogo min na, o tigi tɛna se ka don Ala ka mara kɔnɔ fewu.”

16O kɔ, Yezu ye denmisɛn nunu ta kelen kelen k'a bolo la u kan ka duba kɛ u ye.

17Yezu taatɔ dugu wɛrɛ la, cɛɛ dɔ bolila ka ta'a kunbiri gwan a kɔrɔ k'a nyininga ko: “Karamɔgɔnyuman, ne ka kan ka mun kɛ ka hɛrɛ banbali sɔrɔ?”

18Yezu y'a fɔ a ye ko: “Mun na i bɛ ne wele karamɔgɔnyuman? Mɔgɔnyuman si tɛ yen ni Ala kelen tɛ.

19I bɛ Ala ka sariyaw lɔn: ‘I kana mɔgɔ faga, i kana kakalaya kɛ, i kana sonyali kɛ, i kana galon la i mɔgɔnyɔgɔn kan, i kana mɔgɔ si tɔnyɔ, i faa n'i baa bonya.’ ”

20Cɛɛ y'a jaabi ko: “Karamɔgɔ, ne ye olu bɛɛ labato kabini n denmisɛn tuma.”

21O la, Yezu y'a filɛ, a koo diyara a ye. A y'a fɔ a ye ko: “Fɛɛn kelen b'i jɛn. Taa i bololafɛn bɛɛ feere k'a wari tilan faantanw cɛ. O kɔ, na tugu ne kɔ. Ala bɛna nafoloba d'i ma sini.”

22O kuma ye cɛɛ nyaa sisi. A dusu kasinin taara, bari nafoloba tun b'a fɛ.

23Kalandenw tun ye Yezu lamini. A y'u filɛ k'a fɔ u ye ko: “Nafolotigiw donko ka gwɛlɛ Ala ka mara kɔnɔ dɛ!”

24O kuma ye kalandenw kabakoya. Yezu ye kuma ta tugu k'a fɔ u ye ko: “N balimaw, minw jigi bɛ nafolo kan, olu donko ka gwɛlɛ Ala ka mara kɔnɔ dɛ!

25Nyɔgɔmɛ donko ka nɔgɔ miseli woo fɛ ka tɛmɛ nafolotigi donko kan Ala ka mara kɔnɔ.”

26Kalandenw kabakoyara tugu ka dama tɛmɛ fɔɔ u tun b'a fɔra nyɔgɔn ye ko: “Pati! O tuma na, jon le bɛ se ka kisi?”

27Yezu y'u filɛ k'a fɔ ko: “Mɔgɔw tɛ se k'u yɛrɛ kisi, nga Ala bɛ se k'u kisi, bari Ala bɛ se fɛɛn bɛɛ la.”

28Piyɛri y'a fɔ Yezu ye ko: “A filɛ, an jɛnna an bololafɛn bɛɛ kɔ ka tugu i kɔ.”

29Yezu y'a jaabi ko: “Tinyɛ na, ne b'a fɔ aw ye ko ni mɔgɔ o mɔgɔ jɛnna a ka dugu kɔ, walima a dɔgɔw, walima a kɔrɔw, walima a faa, walima a baa, walima a deenw, walima a ka forow, ne ni kibaru diman kɔsɔn,

30siga t'a la, o tigi bɛna olu bɛɛ nyɔgɔn kɛmɛ kɛmɛ sɔrɔ dinyɛ nin na. A bɛna duguw sɔrɔ, ka dɔgɔ ni kɔrɔw sɔrɔ, ka baaw sɔrɔ, ka deenw sɔrɔ, ka forow sɔrɔ. A bɛna tɔɔrɔ fana sɔrɔ, nga a bɛna sini hɛrɛ sɔrɔ.

31Nyamɔgɔ caaman bɛna kɛ kɔmɔgɔw ye, kɔmɔgɔw bɛna kɛ nyamɔgɔw ye.”

32Yezu n'a ka kalandenw tun bɛ sira kan ka taa Zeruzalɛmu. Yezu tun bɛ taamana u nyafɛ. Kalandenw hakili nyagaminin tun lo. Mɔgɔ minw tun b'u nɔɔ fɛ, siranya tun bɛ olu la. Yezu taara n'a ka kalanden tan ni fila ye u danna tuguni. Koo min bɛn'a sɔrɔ, a y'a fɔ u ye.

33A y'a fɔ ko: “Ayiwa, an bɛ taara Zeruzalɛmu. O yɔrɔ la, u bɛna Mɔgɔ Dencɛ don sarakalasebagaw ni sariya karamɔgɔw bolo. U bɛn'a fɔ ko a ka kan ni saya ye, k'a don siya wɛrɛw bolo.

34U bɛna yɛlɛ a ma, k'u daji tu a kan, k'a bugɔ ni busan ye, k'a faga, nga tile saba a faganin kɔ, a bɛna kunun.”

35O kɔ, Zebede ka dencɛ fila, Zaki ni Zan, gwɛrɛla Yezu la k'a fɔ a ye ko: “Karamɔgɔ, an bɛna fɛɛn min nyini i fɛ, an b'a fɛ i k'o kɛ an ye.”

36Yezu y'u nyininga ko: “Aw b'a fɛ ne ka mun kɛ aw ye?”

37U y'a jaabi ko: “I bɛna sigi masaya la ni nɔɔrɔ ye tuma min na, i ka sɔn an kelen ka sigi i kinibolo fɛ, kelen ka sigi i numanbolo fɛ.”

38Yezu y'a fɔ u ye ko: “Aw bɛ fɛɛn min fɛ, aw t'o lɔn. Tɔɔrɔ ni sɛgɛn min bɛna ne sɔrɔ, aw bɛ se k'o nyɔgɔn munyu wa?”

39U y'a jaabi ko: “An bɛna se.” Yezu y'a fɔ u ye ko: “Tɔɔrɔ ni sɛgɛn min bɛna ne sɔrɔ, o nyɔgɔn bɛna aw fana sɔrɔ,

40nga, mɔgɔ min ka kan ka sigi ne kinibolo fɛ walima ne numanbolo fɛ, ne t'o latigɛbaga ye. Ala y'o yɔrɔw labɛn mɔgɔ minw ye, u maranin bɛ olu ye.”

41Kalanden tɔ nunu y'o mɛn minkɛ, u dimina Zaki ni Zan kɔrɔ.

42O tuma na, Yezu y'u bɛɛ wele k'a fɔ u ye ko: “Aw b'a lɔn ko dinyɛ kɔnɔ, jamana kuntigiw b'u ka jamana mɔgɔw tɔɔrɔ, mɔgɔbabaw bɛ fanga yira tɔw la.

43A man kan ka kɛ ten aw cɛma. Ni mɔgɔ min b'a fɛ ka kɛ kuntigi ye aw cɛma, o ka kan ka kɛ aw ka baaraden ye.

44Ni mɔgɔ min b'a fɛ ka kɛ nyamɔgɔ ye aw cɛma, o ka kan ka kɛ aw bɛɛ ka jɔɔn ye,

45bari Mɔgɔ Dencɛ ma na ko mɔgɔw ka baara kɛ a ye, nga a nana ka mɔgɔw mako nya, ani k'a yɛrɛ nii di ka kɛ mɔgɔ bɛɛ nii kunmabɔ sara ye.”

46Yezu n'a ka kalandenw ni jamaba sera Zeriko. U bɔtɔ o dugu kɔnɔ, Time dencɛ Baritime min kɛra finyɛntɔ ye, o siginin tun bɛ sira daa la ka dalili kɛ.

47A y'a mɛn ko Nazarɛti Yezu bɛ tɛmɛna minkɛ, a y'a daminɛ ka pɛrɛn ko: “Masacɛ Dawuda ka deen Yezu, makari ne la.”

48Mɔgɔ caaman sɔngɔra a kunna ko a ka je, nga a pɛrɛnna ka tɛmɛ fɔlɔta kan ko: “Dawuda ka deen, makari ne la.”

49Yezu lɔra k'a fɔ ko: “Aw k'a wele n ye.” O la, u ye finyɛntɔ wele k'a fɔ a ye ko: “I hakili sigi. Wili, a ko i ka na.”

50A y'a ka duloki fili ka pan ka lɔ. A taamana ka taa Yezu fɛ.

51Yezu y'a nyininga ko: “I b'a fɛ ne ka mun kɛ i ye?” A y'a jaabi ko: “Karamɔgɔ, ne ka yeli kɛ tuguni.”

52Yezu y'a fɔ a ye ko: “Taa. I kɛnɛyara bari i lara ne la.” O yɔrɔnin kelen, a nyaa yɛlɛla, a tugura Yezu nɔɔ fɛ.

← Chapter 9 Jump to: Chapter 11 →