Revelation 11

Fulfulde Bible (Alkawal Kesal) Central Eastern Niger

← Chapter 10 Jump to: Chapter 12 →

1Ndeen ɗum hokki yam ƴommbal potnirgal nanndungal e sawru, ɗum vi'i yam : — Umma, yah fotnu *Wuro Allah Seniingo e to ɗum wulata urdi, limaa sujjidanooɓe Allah wonɓe nder ma'ago.

2Ammaa ta'a fotnu fiiliire wuro ngoon, woor nde, gam nde yoofanaama *leƴƴi ɗi laataaki Yahuudu'en. Ɓe njaaɓey si'ire seniinde e semmbee faa lebbi arba'iin e ɗiɗi (42).

3Mi hokkey caaydu'en am ɗiɗo ɓorniiɓe kolte pahatu kuugal wa'ajingo voliinde am, faa balɗe dubuu e keme ɗiɗi e settiin (1 260).

4Caaydu'en ɗiɗo ɓeen ngoni leɗɗe *jaytunje ɗiɗi e fitilaaji ɗiɗi dariiɗum yeeso jawmu duuniyaaru.

5Giɗɗo hallango ɓe fuu, yiite no vurtoyto nder konnduɗe maɓɓe nge halka wanywanyɓe maɓɓe. Noon giɗɗo hallango ɓe fuu wardete.

6Eɓe ngoodi baawɗe haɗgo iyoonde toɓa nder balɗe ɗe ɓe nga'ajinta voliinde Jawmiraawo. Kadimaa eɓe ngoodi baawɗe wartirgo ndiyam ƴiiƴam. Eɓe ngoodi boo baawɗe jippinango duuniyaaru koo iri kaye torraa kalluka nde ɓe ngiɗi fuu.

7Ɓaawo ɓe keynii ga'ajinki maɓɓe, ngoɗnga ndiiwa kulniinga no vurtoto nder ngaska lugguka ka walaa keerol, nga haɓa e maɓɓe, nga jaaloo ɓe, nga wara ɓe.

8Ɓalli maɓɓe ngooree dow laawol si'ire mawnde to Jawmiraawo maɓɓe waraa dow *gaafagal. Si'ire ndeen e soomree Sodoma e lesdi *Misira.

9Yimɓe gada koo ndiye lesdi e koo ɗiye leƴƴi e koo ɗeye ɗemɗe no ngarey ndaara ɓalli ɗiin, faa balɗe tati e feccere, ɓe kaɗa ɗi uveego.

10Yimɓe duuniyaaru fuu no naney belɗum, ɓe mbaɗa juulɗe, ɓe kokkindira caahuuji, gam annabo'en ɗiɗo torrunooɓe duuniyaaru ɓeen maayii.

11Ammaa ɓaawo balɗe tati e feccere ɗeen, sey poofɗe yonki ivoyɗe to Allah natti ɓe, ɓe ummii ɓe ndarii. Kulol manngol nanngi koo moye giiɗo ɓe.

12Ndeen *annabo'en ɗiɗo ɓeen nani woɗnde voliinde semmbiɗnde gada dow e vi'a ɓe : — Ƴeeŋoyee ɗo'o ! Ɓe ƴeenyi asama nder ruuldere, wanywanyɓe maɓɓe e ndarii ndaara.

13Ɗoon e ɗoon lesdi dimmbii e semmbee, sey feccere wo'ore nder cende sappo ɗe si'ire ndeen yibbii, yimɓe dubuuje njoveeɗiɗo kalki. Kulol manngol nanngi horiiɓe, ɓe mawnini Allah mo dow.

14Halkere ɗiɗaɓre ƴaɓɓake. Halkere tataɓre e wara naa ko neeɓii.

15Malaa'ikaajo njoveeɗiɗaɓo duudi luwal muuɗum, sey ɗum nani woɗnde voliinde semmbiɗnde gada dow e vi'a : — Laamu duuniyaaru fuu laatake ngu Jawmiraawo meeɗen e Almasiifu muuɗum. O laamoto faa abadaa abadin.

16Ndotti'en aciriin e nayo (24) jooɗiiɓe dow jooɗorɗe laamu mu''en yeeso Allah ndiccii yeeso ma'ako, ɓe cujjidani mo.

17Eɓe mbi'a : « Yaa Allah Jawmiraawo, Jawmu baawɗe, aan woni jo'oni, aan woni ndeenno ! Min ngettii ma, gam a huutinirii baawɗe maaɗa mawɗe a jo''inii laamu maaɗa.

18Leƴƴi ɗi anndaa ma kuunƴi, ammaa huunƴere maaɗa warii. Wakkaci sernango maayɓe warii, wakkaci biyaago *annabo'en maccuɓe maaɗa, e seniiɓe, e hulooɓe innde maaɗa, mawɓe e famarɓe. Wakkaci waɗii nde kalkataa halkooɓe duuniyaaru. »

19Ndeen *Wuro Allah Seniingo wonngo dow omtii, akootiiwa alkawal yi'aa nder ma'ago. Sey maƴƴe maƴƴi, palmaali e diggaali e dimmbaaki lesdi mbaɗi, malemalleeje mawɗe toɓi.

← Chapter 10 Jump to: Chapter 12 →