1 Thessalonians 1

Guarani 2015 (Ñanderuete Ñe’ẽ Porã 2015)

Jump to: Chapter 2 →

1Páblo, Silváno ha Timotéo omomaitei pe iglésia Tesalónica peguápe, opytáva Ñandejára Ñanderuete ha Ñandejára Hesu Crísto poguýpe. Ñanderuete jeporiahuvereko ha py’aguapy toĩ penendive.

2Ore roagradece Ñanderuetépe, oremandu’ávo penderehe, ore ñembo’épe.

3Oremandu’a ore ñembo’épe Ñandejára Ñanderuete renondépe pende jerovia ha pene mborayhu rembiapo rehe ha rovy’a peropu’aka haguére opaite mba’e pene esperánza rupi, peguerekóva Hesu Crísto rehe.

4Hermanokuéra, ore ningo roikuaa porã Ñanderuete penderayhuha ha pendeporavo hague avei,

5ha peẽ peikuaa porã avei ore rombohasa ramoguare ko evangélio (Ñanderuete ñe’ẽ porãite) peẽme, ore noromombe’úi ore ñe’ẽ ore juru reínte, romyasãi uvei Pytu Porãmbáva pegua pu’aka reheve, roikuaa porãgui pe añetegua, ha peẽ penemandu’a porã gueteri mba’éichapa ore roikova’ekue pende apytépe.

6Ha peẽ pehasa asy ramojepe Pytu Porãmbáva rupi, pevy’a ha peguata porã Hesu Crísto ha ore pypore rapykuéri.

7Upéicha peẽ peiko techaukaha porã (ejémplo porã) ramo opaite ojeroviávape g̃uarã Macedónia ha Acájape.

8Peẽrupi noromyasãiri Ñanderuete ñe’ẽ Macedónia ha Acájape añónte, ohasáma uvei mombyryve hetã rembe’y amo gotýo; upévare ore noroikotevẽvéima romyasãi Ñanderuete ñe’ẽ porãite upérupi.

9Ha’ekuéra voi ningo omombe’úta mba’éichapa peẽ oremog̃uahẽ porãva’ekue pende apytépe ha mba’éichapa peẽ pepoi pende jára gua’úgui, pejerovia hag̃ua Ñanderuete oikovéva ha añeteguáva rehe,

10ha mba’éichapa peẽ peha’ãrõ Hesu Crísto ou jevy hag̃ua yvagakuéragui, Ñanderuete omoingoveva’ekue ichupe omanova’ekue apytégui, ha Ha’e ñandesalváta pe ñembojovakerã pohyietégui.

Jump to: Chapter 2 →