1 Thessalonians 4

Guarani 2015 (Ñanderuete Ñe’ẽ Porã 2015)

← Chapter 3 Jump to: Chapter 5 →

1Che hermanokuéra, ipahápe ore rojerure peẽme ha pohekombo’e Ñandejára Hesu Crísto rérape peẽ peguata porã hag̃ua ore pombo’e haguéicha, pende reko iporãvérõ ohóvo pembovy’áta Ñanderuetépe, ojehu háicha ko’ág̃a peve.

2Peẽ penemandu’a porã gueteri mba’éichagua tekombo’e ore rombohasamava’ekue peẽme Hesu Crísto réra rupi.

3Kóva ningo Ñanderuete rembipota: Tapeñemboheko porã, anive peiko pende rete rembipota vai poguýpe.

4Peteĩteĩ ta’ipu’aka hete rembipota mbarete rehe ha toiko porã hembirekoteéva ndive, ha torespeta (tombotuicha) avei hembireko rembipota, ohechaukávo ichupe iména oikoveha Ñanderuete mborayhu añeteguáva poguýpe.

5Anítei pe ména oiko hembirekoteéva ndive oiko háicha umi tetã ambueygua oikuaa’ỹva Ñanderuetépe ha ndojokokuaáiva hete rembipota mbarete.

6Aníke avave ombotavy iñermánope oñemu ramo (ojapo ramo negócio hendive), cháke, Ñanderuete voi ohaviráta opaite mba’evai apohárape, ro’e haguéichama peẽme.

7Ñanderuete ningo ñanerenói ñande reko porã hag̃ua, ndaha’éi ñande reko vai jevy hag̃ua.

8Upéicha, upe omboykéva ko tekombo’e kóva nomboykéi hapichápe, omboyke uvei Ñanderuetépe, Ha’e ome’ẽgui Ipytu Porãmbáva pendepype.

9Pe mborayhu hermanokuéra rehe ningo natekotevẽi che ahai peẽme, Ñanderuete voi ningo penembohekóma pejohayhu hag̃ua.

10Ha upéicha pejapóma avei opaite hermanokuéra ndive oikóva guive Macedóniape. Che hermanokuéra, che poavisa pekakuaave hag̃ua pehóvo ko tekombo’e kóvape,

11ha peñeha’ã pene rerakuã ta’iporã, peñeha’ãvo peiko hag̃ua (opavavete ndive) py’aguapýpe, ha pemba’apo pende pópe ore pombo’e haguéicha,

12peẽ peiko hag̃ua hekópe ñande rehegua’ỹva apytépe, ani hag̃ua peheka pytyvõ ambuekuéragui.

13Ore hermanokuéra, ndoroipotái ningo peime peikuaa’ỹre upe ojehútava umi okémavape (omanómavape) ani hag̃ua peñembyasy ambuekuéra oñembyasy háicha, ndoguerekóigui esperánza.

14Ñande jarovia ramo Hesu Crísto omano hague ha oikove jevyha, péicha jaroviava’erã avei Ñanderuete oguerutaha umi omanova’ekue Hesu Crísto ndive upe ára Ha’e ou jevýrõ g̃uarã.

15Ko’ã ñe’ẽ ore ro’e Ñanderuete oipotágui: Ñande jaikovéva gueteri yvy apére Hesu Crísto ouha ára peve, nañanetenondemo’ãiha umi omanomava’ekuégui.

16Hesu Crísto ouha árape oñemombáy raẽva’erã hikuái, yvága rembiguaiguasu ñe’ẽ hatã ha pe turupu (trompéta pu) rupi umi Hesu Cristopype omanova’ekuépe, oikove jevy hag̃ua,

17ha uperire ñande jaikovéva ha japytáva gueteri, jajehupíta avei hendivekuéra araipýpe, jajojohu hag̃ua Hesu Crísto ndive (yvate yvytúpe), arai apytépe, japyta hag̃ua tapia g̃uarã hendive.

18Péicha peñemoangapyhy ko ñe’ẽ kóva rupi.

← Chapter 3 Jump to: Chapter 5 →