1 Thessalonians 2

Guarani 2015 (Ñanderuete Ñe’ẽ Porã 2015)

← Chapter 1 Jump to: Chapter 3 →

1Peẽ, che hermanokuéra, peikuaa porã voi, ore rembiapo pende apytépe ndareíri hague.

2Peẽ peikuaa porã ore rog̃uahẽ mboyve pene rendápe rohasa asyete ha opu’ãmbaha orerehe Filípos tavaygua; Ñanderuete katu oremokyre’ỹ jevy romombe’u hag̃ua Ñanderuete ñe’ẽ porãite avei pende apytépe oĩ ramojepe heta oñemoĩva avei orerehe.

3Ore rekombo’e ndaha’eiva’ekue jejavy térã ñembotavy, térã japu reheguáva.

4Ñanderuete omoĩgui iñe’ẽ porãite ore jurúpe, ore roñeha’ãmba rombovy’a hag̃ua ichupe, ha ndahahéi yvyariguakuérape, Ha’e ningo pe oipyguaráva ñande py’apy.

5Peẽ ningo peikuaa porã voi, ore araka’eve norombojuruhe’ẽi rombovy’a hag̃ua yvyariguakuérape térã pirapire potágui, Ñanderuete voi ningo ore rechahare.

6Ndorohekáigui yvyarigua rerakuã porã, ni pendehegui, ni ambuekuéragui,

7ore rojehechaukakuaa ramojepe Hesu Crísto apostolkuéra ramo, upéva rãngue ore roiko py’aporã reheve pende apytépe peteĩ sy omokambu háicha ha oñangareko porã háicha imemby rehe.

8Ore pohayhúgui romyasãi Ñanderuete ñe’ẽ porãite pende apytépe ha hi’ári rome’ẽse ore rekove jepe peẽme.

9Peẽ ore hermanokuéra, penemandu’a porã gueteri, ore roñeha’ãmba hague romba’apo hag̃ua (ore pópe) ára ha pyharépe ani hag̃ua orepohýi peẽme, romyasãi aja peẽme Ñanderuete ñe’ẽ.

10Peẽ ha Ñanderuete voi ore rechahare, mba’éichapa ore roikova’ekue teko potĩ, tekojoja ha japu’ỹ reheve pende apytépe.

11Peikuaa porã gueteri ore roiko hague pende apytépe peteĩ túva oiko háicha ita’ýra ha itajýra apytépe.

12Ore pohekombo’e, pomokyre’ỹ ha rojerure asy peiko hag̃ua Ñanderuete ra’y ha rajy heko peguáva ramo, Ha’e penerenóigui peike hag̃ua hetãguasúpe ha peiko hag̃ua heko jajaipápe.

13Ha upévare ore roagradeceroína avei Ñanderuetépe peẽ pemomba’e haguére iñe’ẽ pehenduva’ekuére ore juru rupi, ha peroviava’ekue ore ñe’ẽ ndaha’eiha yvyarigua ñe’ẽnguéicha, Ñanderuete ñe’ẽ añeteguáva ramo uvei, ha péva voi omba’apohína pende rekovépe.

14Peẽ ningo, ore hermanokuéra, peguata Hesu Crísto iglésia Judéa pegua pypore rapykuéri, peẽ pehasa asýgui avei pene retãygua po rupi, ha’ekuéra ohasa asy haguéicha hetãyguateéva rupi.

15Judeayguakuéra voi ojukava’ekue Hesu Crístope ha heta profetakuérape, ha orepersegui oréve avei. Ha’ekuéra nombovy’ái Ñanderuetépe ha oñemoĩ avei opavave rehe.

16Ha’ekuéra oñeha’ãmba orejoko, ani hag̃ua ore romyasãi tetã ambueyguakuérape Ñanderuete ñe’ẽ porãite ojesalva hag̃ua avei. Upéicha ha’ekuéra ombohetave ohóvo hembiapo vaikuéra, upévare ho’a hi’arikuéra Ñanderuete pochy.

17Ore hermanokuéra, ore roĩ ramojepe sapy’ami mombyry pendehegui ore retépe, ore py’apýpe katu ore roĩ pende apytépe, opáichavo roñeha’ã rohecha hag̃ua pende rova ore resatee rupi.

18Ore rohosékuri pene rendápe, che, Páblo jepe, napeteĩ jevy añói, mokõi jevýma katu; Satana katu orejokova’ekue.

19Mávapa ore esperánza, térã mávapa orembovy’a, térã mávapa ore coróna Hesu Crísto ouha árape g̃uarã.

20Peẽ voi ningo ore rerakuã ha py’arory.

← Chapter 1 Jump to: Chapter 3 →