1 Timothy 2

Guarani 2015 (Ñanderuete Ñe’ẽ Porã 2015)

← Chapter 1 Jump to: Chapter 3 →

1Che pomomandu’aukase jevy: Peñembo’e ramo pejerure pene remikotevẽ rehe, pejerure pende rapichakuéra rehe ha peagradece Ñanderuetépe, opavave rehe,

2opaite tetã ruvicha ha mburuvichakuéra rehe, jaiko hag̃ua py’aguapýpe ha ñorãirõ’ỹre, ñamomba’eguasu hag̃ua Ñanderuetépe ñande reko porã rupi ha jeroviapópe.

3Ko’ã mba’e iporã ha ombovy’a Ñanderuetépe, ñandesalvava’ekue.

4Ha’e ningo oipota opavave ojesalva ha toikuaa pe añetegua.

5Oĩgui peteĩ Ñanderuete, ha peteĩnte ombojoajúva Ñanderuete umi tetãyguakuéra ndive, Hesu Crísto rupínte, oikova’ekue kuimba’e ramo ko yvy apére.

6Ha’e voi oñeme’ẽ kuave’ẽmby ramo ñandepe’a hag̃ua Satana poguýgui, ha péva oñemoherakuãva’erã tetãnguérape Ha’e ou jevy peve.

7Upevarã Ñanderuete chemoĩ amyasãi hag̃ua hemimondo ramo ko añetegua kóva; hi’añete pe che ha’éva, che ndachejapúi, che aiko hag̃ua Israel’ỹva mbo’ehára añeteguáva ramo, che ajeroviágui avei Hesu Crísto rehe.

8Aipota ningo opaite kuimba’e opárupi omopu’ã ipo potĩ oñembo’e jave Ñanderuetépe, pochy’ỹ ha ñorãirõ’ỹ reheve.

9Upéicha avei kuñakuéra toñemonde hekópe, jeguaka’ỹre, ani oiko hi’áva ñeñopẽguasu reheve, térã oiporu jeguaka oroguiguáva térã ita vera, térã oñemonde ao hepyetévape.

10Toñembojeguaka uvei tembiapo porãme, iporã háicha kuñakuéra Hesu Crísto reheguávape.

11Kuñakuéra tohendu kirirĩháme ha toñemomirĩ.

12Che ndaipotái kuñakuéra oporombo’e ha ndaipotái kuñakuéra oguereko ipoguýpe kuimba’ekuérape, toiko kirirĩháme uvei.

13Adan raẽ ojejapova’ekue, upéi Éva.

14Adánpe noñembotavyiva’ekue, pe kuñámente oñembotavy ha Eva raẽ ho’ava’ekue angaipápe.

15Ha’e ojesalváta imemby ramo, ojerovia porã ramo Hesu Crísto rehe, oporohayhu ramo ha oñemboheko porã ramo ñemomirĩ reheve.

← Chapter 1 Jump to: Chapter 3 →