1 Timothy 5

Guarani 2015 (Ñanderuete Ñe’ẽ Porã 2015)

← Chapter 4 Jump to: Chapter 6 →

1Anítei reñe’ẽ pohýi nde hermáno itujávape, eñemoñe’ẽ uvei ichupe nde ru ramoguáicha ha umi imitãvévape (ndehegui) nde ryvy ramoguáicha;

2hermána g̃uaimíme, nde sy ramo guáicha, ha umi kuñataĩkuérape, ne reindy ramoguáicha py’apy potĩ reheve.

3Emboete (eipytyvõ) umi kuña imenave’ỹ añetévape.

4Upe kuña imenave’ỹva, imemby térã hemiaryrõ ramo gueteri, ko’ãva raẽ toiporiahuvereko ichupe, hogayguakuéra tomyengovia ha’e ojapo porãva’ekue hesekuéra, ko mba’e kóva iporãite ha ombovy’a Ñanderuetépe.

5Upe kuña imenave’ỹ añeteguáva ha ha’eño opytáva, toha’ãrõ Ñanderuete pytyvõ, ha tojerure asy iñembo’épe ára ha pyharépe ambuekuéra rehe.

6Pe kuña imenave’ỹva, oikóva hete rembipota vai poguýpe, omanóma (ipytúpe), oikove ramojepe (hetépe).

7Ehekombo’e ichupekuéra ha heko ipotĩva’erã, ani hag̃ua avave oñe’ẽvai hesekuéra.

8Oime ramo peteĩ ñane hermáno noñangarekóiva igentekuéra rehe, heko ivaive ojerovia’ỹva rekógui.

9Peteĩ kuña imenave’ỹva réra oñemoĩkuaa avei pe iglésia pytyvõ rehegua kuatiañe’ẽme (oñepytyvõ hag̃ua ichupe), ha’e oguereko guive 60 áño, ha oikova’ekuérõ peteĩ ména año rembireko ramo.

10Oñe’ẽporãva’erã hese: Hembiapo porã haguére, omongakuaa porã haguére imembykuérape, imbohupakuaa haguére, ojohéi haguére heko potĩva pykuéra, oipytyvõ porã haguére umi ojejopyva’ekuépe, oñeha’ãmba haguére opaichagua tembiapo porãme.

11Emboyke katu umi kuña imenave’ỹva imitãvévape, ndojokoséiva hete ha heko rembipota ha oñemoĩ Ñanderuete rehe, omendaseitereígui,

12ha hembiapo vaíva, opoi haguére ijerovia ñepyrũmbyrégui.

13Ha nomba’aposevéigui, ojepokuaa oiko rei, upéi oho oñandu ambue ogayguakuérape oikuaa ha ombohasa hag̃ua heta mba’e naiporãiva (hapicha rekovégui); ha’e he’i he’i’ỹva’erãva ha upéicha oporomoingo vai hapichakuéra oñondive.

14Upévare che aipota umi kuña imenave’ỹva imitãvéva tomenda jevy, tomongakuaa imembyrã ha toñangareko hóga rehe, ani hag̃ua Satana oñe’ẽvai hesekuéra.

15Oiméma voi ijapytepekuéra, umi opoimava’ekue ijeroviágui ha oiko jevýma Satana rapykuéri.

16Oime ramo peteĩ kuñakarai ojerovia porãva, ha oñeme’ẽ ramo ichupe peteĩ kuña imenave’ỹvape oñangareko hag̃ua hese, kóva toipytyvõ porã ichupe opaite hemikotevẽme, ani hag̃ua ha’e ipohyieterei ambue iglesiayguakuérape g̃uarã. Pe iglésia toñangarekónte pe kuña imenave’ỹva oikotevẽtéva rehe.

17Umi omyakã porãva iglesiayguakuérape tojehayhu jo’a, tenonderãme umi oñeha’ãva omyasãi hag̃ua pe evangélio ha oporombo’évagui.

18Ñanderuete ñe’ẽ he’i voi: Ani remoĩ juru jokuaha guéipe ojykýi aja mba’e ra’ỹi, (Deuteronómio 25,4). Ha avei oñeme’ẽva’erã upe omba’apóvape hembiapo repykue, (Lúcas 10,7).

19Ani rejapysaka upe oñe’ẽvaiséva karai anciáno rehe, ndaipóri ramo avei mokõi térã mbohapy techahare (testígo).

20Eñe’ẽ pohýi umi oñemohembiapo vaívape opaite iglesiaygua renondépe, umi ambue ohendúva okyhyje hag̃ua avei.

21Ajerure asy ndéve Ñanderuete, Hesu Crísto ha umi yvága rembiguái poravopyre renondépe rejapo hag̃ua ko’ã mba’e hekópe, reñemboyke’ỹre térã rehayhuve’ỹre avavépe.

22Anítei remoĩ pya’ete nde po avave akã ári (omba’apo hag̃ua iglésia rembiapópe), ani hag̃ua nde rejehe’a avave rembiapo vai rehe. Eñangareko ndejehe, eiko heko potĩva ramo.

23Águi rire anive re’u y año, he’u uvei michĩmi víno nde py’a rehehápe, nderasy haguére manterei.

24Iglesiayguakuéra apytépe oime umi ñane hermáno angaipa ojehecha pya’éva pe ñembojovake ára mboyve, ha ambue tembiapo vaikuéra katu ojekuaava’erã uperire aémante.

25Upéicha ojekuaáta avei tembiapo porã ha umi tembiapo vai katu ndaikatúi oñeñomi tapia g̃uarã.

← Chapter 4 Jump to: Chapter 6 →