1 Timothy 6

Guarani 2015 (Ñanderuete Ñe’ẽ Porã 2015)

← Chapter 5 Jump to:

1Opaite tembiguái rei (esclávo) toikóva ijára poguýpe, ha ojerovia ramo Hesu Crísto rehe omomba’eteva’erã ijárape, ani hag̃ua ambuekuéra oñe’ẽvai Ñanderuete réra térã hekombo’epy rehe.

2Ha umi tembiguái oguerekóva peteĩ patron ojeroviáva avei Hesu Crísto rehe, tomomba’ete ichupe, iñermánogui, ha toservi porãve ichupe, ha’e ojeroviágui avei Ñanderuete rehe, ha ha’e oikóma Hesu Crísto rayhupára ramo; pe patron toñeha’ãmba avei tohechauka ipy’aporãha hembiguaikuéra ndive. Che aipota nde rehekombo’e ko’ã mba’e ko’ãvare.

3Oime ramo pende apytépe peteĩ ombo’éva ambue mba’e, omboykévo Hesu Crísto ñe’ẽ hesãiva ha pe jerovia mbo’epy heko peguáva,

4upéva oñembovu rei ha ndoikuaái mba’eve ha oiko itarovávaicha ojuavy ha oñorãirõse iñe’ẽ rei rehe. Ko’ã ñe’ẽ reígui heñói py’a rasy (envídia), ñorãirõ, ñe’ẽ pohýi, ñe’ẽ vai rei hapicha rehe,

5ha ñe’ẽ joapi ndopáiva. Ko’ã mbo’ehára japu oiko itarovávaicha, oñemomombyrýgui pe añetegua rapégui, ha omyasãi imbo’epy japu omono’õ hag̃ua pirapire (ijupe g̃uarãnte).

6Pe jerovia añeteguáva tuicha mba’e voi umi oñemomirĩvape g̃uarã ha ovy’áva umi mba’e oguerekóva rehe;

7mba’eve ningo ndajaguerúi ko yvy apére, ha mba’evete ndajaguerahamo’ãi avei.

8Upévare jaguereko ramo ñane rembi’u ha ñande ao, tajavy’a ko’ã mba’e reheve.

9Umi ohupityséva heta mba’erepy ho’áta katuete jepy’ara’ã ha ñuhãme; hi’ánga rembipota vai oisãmbyhýgui hekove, oñehundíta ha’e ha oñemombóta ichupe aña retãme.

10Pe pirapire rayhuetereígui heñói heta mba’evai, hapógui hi’a opaichagua tembiapo vai; ha oime ningo umi oipotaitereígui pirapire opiáma ijeroviágui, ha upéi ha’ekuéra voi oñembohasyete opaichagua mba’evaípe.

11Nde katu, Timotéo, Ñanderuete mba’éva, ekañy ko’ã mba’égui ha eñeha’ãmba reiko hag̃ua hekoitépe, teko potĩme, jeroviápe, mborayhu añeteguápe, paciénciape, ñemomirĩme.

12Eñorãirõ pe jerovia ñorãirõ porãme, eñemomba’e pe tekove tapia g̃uarãvare, upevarã Ñanderuete voi nerenoiva’ekue, ha reme’ẽmava’ekue avei peteĩ testimónio porã nde jerovia rekovégui heta hermanokuéra renondépe.

13Che, Páblo, ha’eseva’erã ndéve Ñanderuete omoingove opaite mba’e, ha Hesu Crísto omombe’u porãva’ekue pe añetegua Póncio Piláto renondépe, upévare nde, Timotéo:

14Ejapo hekópe avei pe tembiapo oñeme’ẽmava’ekue ndéve, Ñandejára Hesu Crísto ojehechauka jevy peve,

15upe ára Ñanderuete oiporavomava’ekue, Ha’e ningo pe vy’a pavẽ ha pe Ipu’aka pavẽ ha’eñoitéva, Ha’e ningo mburuvichakuéra Ruvichaguasu, ha jarakuéra Jaraite.

16Ha’eñoite oguereko pe tekove tapia g̃uarãva, Ha’e oikóva tesape ojeike’ỹháme: Ndaipóri yvyarigua apytépe ohecháva ichupe ha ndaikatúi voi ohecha ichupe; toñemomba’eguasu ha toñembotuicha ichupe tapia g̃uarã, taupéicha (amen).

17Umi mba’eita oguerekóvape, che ha’e, ani hag̃ua oñembotuicha ha anítei ojerovia imba’eita rehe, imba’eita ohasakuaa pya’eiterei, tojerovia uvei Ñanderuete rehe, ome’ẽva ñandéve heta mba’e javy’a hag̃ua,

18ha ojapo hag̃ua hikuái tembiapo porã, ombyaty heta peve, tomboja’o umi mba’e oguerekóva ambuekuéra ndive, toiporoporiahuvereko,

19péicha omono’õta heta tembiapo porã ha ojapyhýta pe tekove añeteguáva.

20Nde, Timotéo, ejapóke che ha’éva guive ndéve, ejei umi ñemongeta vai reívagui ha pe kuaapy arandu gua’u reígui.

21Oime ningo umi ojapyhýva kuaapy arandu gua’u rei ha upévare opia Hesu Crístogui ha pe tekovete rapégui. Ñanderuete poriahuvereko katu toĩ nendive.

← Chapter 5 Jump to: