2 Timothy 1

Guarani 2015 (Ñanderuete Ñe’ẽ Porã 2015)

Jump to: Chapter 2 →

1Che, Páblo, Hesu Crísto remimondo (apóstol) Ñanderuete rembipota rupi, ojeporavo amyasãi hag̃ua Hesu Crísto ha’eha pe tekove promésa Ñanderuete ome’ẽmava’ekue.

2Che ahai ko kuatiañe’ẽ kóva ndéve Timotéo, che ra’y ahayhúva: Ñandejára Ñanderuete ha Ñandejára Hesu Crísto mborayhu, iporiahuvereko ha ipy’aguapy toĩ nendive.

3Che agradece Ñanderuetépe, che aservíva che ypykuéra guive py’apyñe’ẽ potĩ reheve, chemandu’amanterei nderehe che ñembo’épe, ára ha pyharépe.

4Ha chemandu’a ramo nde resay rehe, che rohechase jevy cherenyhẽ hag̃ua vy’águi,

5oĩgui ndepype pe jerovia añeteguáva, tenonderãite oĩva’ekue nde jarýi Lóida ha nde sy Eunicepype, ha katuete oĩ ndepype avei.

6Upévare che romomandu’ase nde rembojepota hag̃ua pe Pytu Porãmbáva me’ẽmby Ñanderuete ome’ẽmava’ekue ndéve, che amoĩ ramoguare che po ne akã ári.

7Ñanderuete nome’ẽi ñandéve peteĩ Pytu Porãva ñanemokangýva, ome’ẽ uvei ñandéve peteĩ Pytu Porãva ipu’akáva, oporohayhúva ha iñarandúva.

8Upévare ani retĩ remyasãi hag̃ua Hesu Crísto ñe’ẽ porãite, ha ani retĩ cherehe aimeháre cárcelpe Hesu Crísto rehehápe, ehasa asykuaa uvei chendive pe evangélio rehehápe Ñanderuete pu’aka rupi.

9Ha’e voi ñandesalva ha ñanerenoiva’ekue ñande reko ipotĩ hag̃ua, ndaha’éi ñane rembiapo porã rupi, imborayhu ha ijeporavo rupi uvei, Ha’e ningo ñandeporavo oñepyrũ mboyve umi ára atyguasukuéra.

10Ko’ág̃a katu ojehechaukáma Hesu Crísto ñandesalvaha Ha’e ombopoguýgui pe ñemano, ha oguerúgui tesapehápe tekove tapia g̃uarãva pe evangélio rupi.

11Ha’e cherenói amyasãi ha ambo’e hag̃ua ko evangélio Israelgua’ỹvape hemimondo ramo.

12Ko’ã mba’e rehe voi che ahasa asy’aína. Natĩri katu, aikuaa porãgui mávarehepa che ajerovia ha che aikuaa porã avei Hesu Crísto pu’aka rupi ahupitytaha pe tekove tapia g̃uarãva Ha’e ou jevýrõ g̃uarã ára.

13Ejejoko hatãkena umi ñe’ẽ rehenduva’ekue rehe che jurúgui ha rehechava’ekue rehe che rekovépe, ñande jerovia ha mborayhu rapo oĩgui Hesu Cristopype.

14Eñangareko porãke pe evangélio, Ñanderuete jopói rehe, oñeme’ẽva Pytu Porãva rupi, oikóva ñandepype.

15Nde reikuaa porãma opaite hermanokuéra oikóva guive departaménto Ásiape opoi hague chehegui, ijapytépe oĩ Figélo ha Hermógenes.

16Ñanderuete tome’ẽ Onesíforo rogayguakuérape poriahuvereko, heta jevy Ha’e chemoangapyhy ha notĩri che aĩháre cárcelpe (Hesu Crísto rehehápe).

17Ha og̃uahẽvo Rómape, chereka kyre’ỹme chejohu peve.

18Ñanderuete tome’ẽ ichupe iporiahuvereko upe árape Hesu Crísto ourõg̃uarã. Nde ningo reikuaa voi mba’éichapa ñanepytyvõ porãva’ekue Efésope ñaime ramoguare.

Jump to: Chapter 2 →