2 Timothy 3

Guarani 2015 (Ñanderuete Ñe’ẽ Porã 2015)

← Chapter 2 Jump to: Chapter 4 →

1Eikuaa porãke kóva: Umi ára pahápe ningo og̃uahẽva’erã ára ipohyietéva.

2Umiha árape yvy ári oĩta ko’ãichaguáva: Ha’enteséva, ohayhuetereíva pirapire, ojererovúva, oñembotuicháva, oñe’ẽvaíva Ñanderuete rehe, naiñe’ẽrendúiva itúva ni isýpe, ndoagradecekuaáiva, heko vaíva,

3ndohayhúiva avavépe, noperdonaséiva, oñe’ẽvai reíva hapicháre, ndojejokokuaáiva, ipochýva, ndohayhúiva tembiapo porã,

4hapicha rova renondépe oiko hayhupára ramo (iñamígo ramo) ijatukupépe katu oiko hese ija’e’ỹva ramo, hova’atãva, ijuruguasúva, ohayhu rãngue Ñanderuetépe ohayhu heko tie’ỹva,

5oiko ojerovia gua’úva ramo, omboykéva Pytu Porãmbáva pu’aka (omoambueséva heko vai heko porãme), nde Timotéo eñemomombyry ko’ã tekove vaívagui.

6Ko’ãva oike ñemiháme ambue ogakuérape oheka hag̃ua umi kuña hi’angaipávape ha oikóva hete rembipota vai poguýpe.

7Ko’ã kuña ko’ãva tapia oikuaase mba’e pyahu, araka’eve katu ndohupitýi ni ndoikuaái pe añetegua.

8Jánes ha Jámbres (mokõi paje apohára) oñemoĩ haguéicha Moises rehe, péicha umi mbo’ehára japu oñemoĩ avei pe añetegua rehe, hi’ánga rembipota vai katu ojoko hatã ichupekuéra opensa vai hag̃uánte, upévare ha’ekuéra ndikatuvéima ojerovia.

9Ha’ekuéra katu ndoho pukumo’ãi, ojekuaava’erã imbo’epykuéra výro reiha, ojehu haguéicha Jánes ha Jámbrespe avei.

10Nde, Timotéo, esegui porã che mbo’epy, che guata, che rembipota, che jerovia, che mborayhu añetegua, che paciéncia, mba’éichapa aropu’aka puku umi jejopy vai,

11che añemuña hague, che jehasa asy, ojehu haguéicha Antioquíape, Icóniope ha Lístrape. Heta jevy ningo ajeperseguiva’ekue, opáichavo Ñanderuete chepe’ava’ekue opaite umi mba’evaígui.

12Opaite ojeroviáva guive Hesu Crísto rehe ningo ojeperseguiva’erã.

13Umi tekove ñaña ha oporombotavýva ojapo mba’evaive ohóvo, ha’ekuéra oporombotavy ha ambuekuéra ombotavy jevy ichupekuéra, (Galaciayguakuérape 6,7).

14Nde katu ani remboyke umi mba’e reikuaa porãva ha epyta hatãke umi tekombo’épe oñeme’ẽmava’ekue ndéve, reikuaa porãgui mávapa nembo’eva’ekue,

15ne mitã ára guive reikuaa voi Ñanderuete kuatiañe’ẽ, kóva nemoaranduve rehóvo rejesalva hag̃ua pe jerovia rupi Hesu Crísto rehe.

16Opaichagua ñe’ẽ ojehaiukáva Ñanderuete Pytu Porãite rupi, iporã oporombo’e ha oporomyatyrõ hag̃ua, oporomopotĩ ha oporombohekombo’e hag̃ua pe heko peguáva rehe,

17ikatu hag̃ua Hesu Crísto reheguáva oiko hekópe ha ikatupyry hag̃ua opaichagua tembiapo porãme.

← Chapter 2 Jump to: Chapter 4 →