2 Timothy 4

Guarani 2015 (Ñanderuete Ñe’ẽ Porã 2015)

← Chapter 3 Jump to:

1Che ajerure asy ndéve Ñanderuete ha Hesu Crísto rérape, Ha’e ourõg̃uarã hetãguasúpe ombojovake hag̃ua umi oikovéva ha umi omanómavape:

2Emoherakuã Ñanderuete ñe’ẽ porãite, ija térã ija’ỹ jave, eporohekombo’e, eavisa, ha eñe’ẽ pohýi mborayhu, paciéncia ha tekombo’e porã reheve.

3Umi ára umívape og̃uahẽta kuimba’e ha kuñakuéra ndogueropu’akamo’ãveimaha pe mbo’epy hesãi porãva, ojapysakasénte uvei hikuái umi mbo’ehára ha’ekuéra voi oiporavomava’ekue rehe.

4Ha’ekuéra omomombyrýta ijapysakuéra pe añeteguágui oñemboja hag̃ua opaichagua ñe’ẽ rei rehe.

5Nde, Timotéo, eñeñangareko porã opaite mba’épe, eropu’aka pe jehasa asy, ejapopa hekópe ha emyasãi porãke Ñanderuete ñe’ẽ porãite.

6Che ningo aiméma añekuave’ẽ hag̃uáicha, che ñemano ára hi’ag̃uíma.

7Che añorãirõmbáma pe ñorãirõ porã, añaníma che carréra, añongatúma hekópe che jerovia che py’apýpe ipaha árape g̃uarã.

8Oñeñongatúma che renonderãme pe justícia jopói, Hesu Crísto, pe mbojovakehára heko peguáva, ome’ẽtava chéve, Ha’e ourõg̃uarã, ha ndachéve añói, ome’ẽva’erã katuete avei opaite umi oha’ãrõvape mborayhu reheve Ha’e ou jevyrõg̃uarã ára.

9Eñeha’ãkena reju pya’e che rendápe.

10Démas opoíma chehegui, ohayhuvégui ko yvyarigua mba’e, ha oho Tesalónicape; Crescénte ohóma Galáciape, ha Títo, Dalmáciape.

11Lúcas añoite oĩ chendive. Ehenói Márcospe nemoirũ hag̃ua ha peju che rendápe. Che aikotevẽ hese chepytyvõ hag̃ua.

12Tíquicope amondo Efésope.

13Rejúvo egueru che póncho, ahejava’ekue Troáspe, Cárpo rógape, eru avei umi kuatiañe’ẽ ha umi ñe’ẽ ojehaíva tymba pirekue rehe.

14Alejándro, pe omba’apóva hiérro rehe, ojapo heta mba’evai cherehe, Ñanderuete omyengoviáta ichupe pe ojapo vaiva’ekue cherehe.

15Nde, Timotéo, eñeñangarekóke avei ichugui, ha’e ningo oñemoĩ hatã ñane ñe’ẽ rehe.

16Pe ñembojovake peteĩháme avavete nachepytyvõiva’ekue, opavave uvei chereja, anítei Ñanderuete ohechakuaa ko’ã mba’e ko’ãva (icóntrape).

17Hesu Crísto katu chepytyvõ ha chemombarete porã amyasãi hag̃ua iñe’ẽ porãite opaite tetãyguakuérape, ha chepe’áma pe leõ jurúgui.

18Hesu Crísto voi oñangareko porã cherehe opaichagua mba’evaígui ha chemog̃uahẽ porãta hetãguasu yvága peguápe. Toñemomba’eguasu ichupe ára atyguasukuéra guive ára atyguasukuéra peve (tapia g̃uarã), taupéicha.

19Emomaitei Prísca ha Aquílape, ha Onesíforo rogayguakuérape.

20Erásto opyta Coríntope, ha Trófimo aheja Milétope, hasýgui.

21Eñeha’ãmba reju hag̃ua araro’y mboyve. Eúbulo, Pudénte, Líno, Cláudia ha opaite ñane hermanokuéra nemomaiteiuka.

22Ñandejára Hesu Crísto, toĩ nde pytu porã ndive. Iporiahuvereko toĩ nendive.

← Chapter 3 Jump to: