Galatians 1

Guarani 2015 (Ñanderuete Ñe’ẽ Porã 2015)

Jump to: Chapter 2 →

1Che, Páblo, Hesu Crísto remimondo (apóstol), ndaha’éi kuimba’e rembipota rupi ajeporavova’ekue, Hesu Crísto ha Ñandejára Ñanderuete rembipota rupi aiko hemimondo ramo, Ñanderuete omoingove jevy haguére Hesu Crístope omanova’ekue apytégui.

2Opaite hermanokuéra chendive oĩva, omomaitei Galácia iglesiakuérape:

3Ñandejára Ñanderuete ha Ñandejára Hesu Crísto tapenembopy’a porã ha tapenembopy’aguapy.

4Hesu Crísto oñeme’ẽva’ekue ojupe ñane rembiapo vai rehehápe, ñandepe’a hag̃ua ko ára atyguasu vaígui, Ñanderuete rembipota porã rupi.

5Toñemomba’eguasu ichupe ára atyguasukuéra guive ára atyguasukuéra peve.

6Chembopy’andýi ningo peẽ pya’e peñemboykeháre Ñanderuetégui, Ha’e ningo penerenoiva’ekue Hesu Crísto py’aporã rupi ha ko’ág̃a peho ambue evangélio gua’u rapykuéri,

7ndaipóri ningo ambue evangélio añeteguáva; oĩ ningo pende apytépe umi penemoangekõiva ha ombyaiséva Hesu Crísto evangélio.

8Ore térã yvága rembiguái omombe’u ramo ambue evangélio peẽme, oñeme’ẽmava’ekuégui peẽme ore juru rupi, upévape toñemaldeci (tojeharu).

9Ro’e haguéicha, péicha che ha’e jevy ko’ág̃a: Oime ramo omombe’úva peẽme ambue evangélio oñeme’ẽmava’ekue peẽme, upévape toñemaldeci.

10Amyasãi piko pe evangélio añemoĩ porãségui yvyariguakuéra ndive térãpa cheñe’ẽrenduségui Ñanderuetépe. Che añemoĩ porãse rire yvyariguakuéra ndive che ndaikoveiva’erãmo’ã Hesu Crísto rembijokuái ramo.

11Che hermanokuéra, aikuaauka ningo peẽme, pe evangélio che amombe’uva’ekue peẽme ndaha’eiha yvyarigua akãgui rei osẽva’ekue.

12Che ningo ndahupitýi ko evangélio yvyarigua pógui ni yvyarigua juru nachembo’eiva’ekue, Hesu Crísto voi ome’ẽ chéve ko evangélio kóva, Ha’e ojehechauka ramoguare chéve.

13Pehendumava’ekue ningo mba’éichapa ra’e che fariséo rekópe aiko Judayguakuéra apytépe, che voi añemoĩva’ekue Hesu Crísto iglésia rehe ha añeha’ãmba aipy’apy ha ambyai hag̃ua.

14Ha che añeha’ãmba añemotenondeve hag̃ua fariséo ramo che Juda retãyguakuéra apytépe, cherakate’ỹetereiraságui Judaygua reko ha hembiapoukapykuéra rehe.

15Ha hi’ãgui Ñanderuetépe, Ha’e cherenoiva’ekue ipy’aporã rupi chendive che sy rye guive,

16ohechaukaségui chepype Ita’ýra Hesu Crístope, amyasãi hag̃ua ichupe ambue tetãnguérape. Upévare che nañemongetái avave ndive,

17ni ndahái Jerusalénpe añemongeta hag̃ua ambue apostolkuéra ndive, oñehenoimava’ekue che mboyve, che aha uvei Arábiape, ha upéi aju jevy Damáscope.

18Ohasa rire mbohapy áño, ajupi Jerusalénpe, añe’ẽ hag̃ua Pédro ndive, ha apyta hendive 15 ára (día).

19Ambue apostolkuérape katu che ndahechái, Jacóbo, Ñandejára Hesu Crísto ryvy añómente.

20Ko mba’e kóva ahaíva peẽme Ñanderuete renondépe hi’añete, che ndachejapúi.

21Upéi aha Síria ha Cilícia retãme.

22Hesu Crísto iglesiakuéra oĩva guive Judéa departaméntope katu ndacherechái.

23Ohendúnte hikuái oje’eha: Upe yma ñanemuñava’ekue ñandejukauka hag̃ua, ko’ág̃a omyasãihína Hesu Crísto evangélio, pe ha’e ombyaiseva’ekue.

24Ha omomba’eguasu hikuái Ñanderuetépe cherehe.

Jump to: Chapter 2 →