Galatians 3

Guarani 2015 (Ñanderuete Ñe’ẽ Porã 2015)

← Chapter 2 Jump to: Chapter 4 →

1Peẽ Galáciaygua pendevýro. Mávapa ojapo ra’e encánto penderehe (penembopaje). Pende resa renondépe ningo ojekuaauka porãite mba’éichapa Hesu Crísto oñemosãingo kurusúre.

2Kóva añónte aikuaase pendehegui: Pehupitýpara’e Ñanderuete Pytu Porãite pejapógui Moises rembiapukapykuéra, térãpa pejeroviágui Hesu Crísto rehe pehupity pe Pytu Porãmbáva.

3Aje piko pendevýro, peñepyrũ rire peiko Ñanderuete Pytu Porãite poguýpe piko ko’ág̃a pejapo jevy pende yvyarigua rete pu’aka rupi (pende reko yvyarigua pu’aka rupi), peikose jevy piko pende yvyarigua rete rembipota vai poguýpe.

4Umi mba’eguasu Hesu Crísto ome’ẽmbáma rire peẽme piko ko’ág̃a ndovalevéi mba’eve peẽme g̃uarã, pejerovia reiete piko (Hesu Crísto rehe).

5Ñanderuete ome’ẽ ramoguare peẽme pe Pytu Porãmbáva, Ha’e ojapomava’ekue milagrokuéra pende apytépe; Ha’e piko ome’ẽ peẽme pe Pytu Porãmbáva pejapógui Moises rembiapoukapykuéra térãpa pejeroviágui Hesu Crísto rehe.

6Abraham ojeroviágui Ñanderuete rehe ojehechakuaáma ichupe heko potĩva ramo.

7Peikuaa porã voi umi ojeroviáva Ñanderuete rehe opytáma Abraham ra’y ha itajýra ramo.

8Ñanderuete kuatiañe’ẽ yma guive voi ohechaukáma pe jerovia rupi Ñanderuete rehe tetãnguéra ohupitýta teko potĩ, ha upévare oñeme’ẽ tenonde avei Abrahámpe pe promésa: Ndérupi ojehovasava’erã opaite tetãnguérape, (Génesis 12,3 18,18).

9Upévare umi oikóva pe jeroviapype ojehovasava’erã, Abraham ojehovasa haguéicha avei.

10Opaite umi ohupityséva teko potĩ ojapógui Moises rembiapoukapykuéra opyta gueteri pe maldicion poguýpe, Ñanderuete kuatiañe’ẽme he’i voi ko’ã mba’e ko’ãva: Oñemaldecíma opaite umi ndojapopáiva hekópe Moises rembiapoukapykuéra, (Deuteronómio 27,26).

11Hesakã porãmapa peẽme, avave ndojesalvaiha ojapopa ramojepe Moises rembiapoukapykuéra, Ñanderuete kuatiañe’ẽme he’ígui: Pe heko potĩva oikoveva’erã ojerovia ramo, (Habacuc 2,4).

12Moises rembiapoukapy ojuavy Hesu Crísto jeroviágui, Ñanderuete kuatiañe’ẽme he’ígui: Upe ojapopáva hendáicha Moises rembiapoukapykuéra oikoveva’erã, (Levítico 18,5).

13Hesu Crísto ningo ñandejoguáma tembiapoukapy maldicion rehegua poguýgui, ñane maldicion ho’águi hi’ári. Ha upévare Ñanderuete kuatiañe’ẽme he’i: Oñemaldecíma opavave oñemosãingóvape yvyra rehe, (Deuteronómio 21,23).

14Pe jehovasa oñeprometemava’ekue Abrahámpe oñeme’ẽma Hesu Crísto rupi opaite tetãnguérape, ha pe Pytu Porãmbáva oñeprometema va’ekue jahupity avei jajeroviágui (Hesu Crísto rehe avei).

15Che hermanokuéra pomomandu’ase peteĩ mba’e ojehúva ñande kuimba’e ha kuñakuéra apytépe: Peteĩ kuimba’e térã kuña rembipota paha ojehai ha oñefirma rire peteĩ kuatiañe’ẽme ha’e omano mboyve, avave ndaikatúi ombyai térã ombojoapyve peteĩ mba’e upe kuatiañe’ẽ he’ívagui, ha’égui pe kuatiañe’ẽ jára rembipota paha.

16Ha pe promésa oñeme’ẽmava’ekue Abrahámpe ha iñemoñarépe, nde’íri iñemoñarenguérape, hetaperõguáicha, peteĩmente uvei: Ne ñemoñarépe, ha péva ningo Hesu Crísto voi.

17Ko che ñe’ẽ kóva rupi che ha’ese: Peteĩ ñe’ẽ Ñanderuete oprometemava’ekue Abrahámpe hembipotatee ramo, ndaikatúi opyta rei Moises rembiapoukapy rupi, oñeme’ẽmava ichupe 430 áño uperire.

18Ñande jahupity rire Ñanderuete me’ẽmby jajapógui Moises rembiapoukapy, upéicharamo ndaha’eveimava’erãmo’ã peteĩ me’ẽmby (jopói) Ñanderuete katu ome’ẽmava’ekue ipromésa rupi.

19Aipórõ, mba’erã piko oĩ Moises rembiapoukapykuéra. Moises rembiapoukapykuéra oñeme’ẽma kuimba’ekuéra ha kuñakuérape hembiapo vaikuéra (angaipakuéra) rehe, ha omoirũ hag̃uánte pe promésa, ou peve pe ñemoñare oñeprometemava’ekue osalva hag̃ua, peteĩ yvága rembiguái he’iuka haguéicha.

20Pe ombopy’apeteĩva ou ombopy’apeteĩ hag̃ua hetave apytépe, Ñanderuete katu peteĩeténte.

21Aipórõ Moises rembiapoukapy oñemoĩ piko Ñanderuete promésa rehe. Mba’evéicharamo. Oñeme’ẽ rire peteĩ tembiapoukapy omoingovekuaáva upéicharamo pe salvacion ouva’erãmo’ã peteĩ tembiapoukapy rupi.

22Ñanderuete kuatiañe’ẽ katu omoĩ opaite kuimba’ekuéra ha kuñakuéra angaipa poguýpe, ome’ẽ hag̃ua ichupekuéra ko promésa kóva: Hesu Crístonte osalvataha opavave ojeroviávape guive hese (Romayguakuérape 3,9 24).

23Og̃uahẽ mboyve pe jerovia japytapamava’ekue pe tembiapoukapy poguýpe, ñañembotýrõguáicha pe tembiapoukapýpe, ojehechauka ha oñepyrũ meve pe jerovia (ára atyguasu pyahu Hesu Crísto ndive).

24Upéicha ningo (Moises) tembiapoukapykuéra opyta ñande rerekua ramo (capataz ramo) Hesu Crísto ou peve jahupity hag̃ua ñande salvacion jajeroviágui Hesu Crísto rehe.

25Ou rire pe jerovia (ára atyguasu), nañaimevéima pe terekua (Moises rembiapoukapy) poguýpe.

26Opavave peẽ ningo Ñanderuete ra’y ha itajýra pejerovia guive Hesu Crísto rehe.

27Opaite peẽ pejebautizaukáma Hesu Cristopype, peñemondéma Hesu Crístogui (oñembohekóma Crísto rekógui).

28Hesu Cristopype ndaiporivéima Judaygua ni Greciaygua, ndaiporivéima tembiguái ni patron, ndaiporivéima kuimba’e ni kuña, opavave peẽ peiko peteĩ tekove pyahu Hesu Cristopype.

29Ha peẽ Hesu Crísto mba’érõ, upéicharamo peẽ Abraham ra’y ha itajýra, ha pehupity avei Ñanderuete promésa (heréncia).

← Chapter 2 Jump to: Chapter 4 →