Galatians 6

Guarani 2015 (Ñanderuete Ñe’ẽ Porã 2015)

← Chapter 5 Jump to:

1Che hermanokuéra, oime ramo peteĩ ho’áva tembiapo vaípe, peẽ peikóva Pytu Porãmbáva poguýpe, peñeha’ã peipytyvõ hag̃ua ichupe ñemomirĩme, ha’e opu’ã jevy hag̃ua, peñeñangarekóke katu ani hag̃ua pejepy’ara’ã peẽ avei.

2Peñopytyvõ pegueraha hag̃ua oñondive pene mba’e pohýi (cárga) ha péicha pejapo ramo pehóvo pejapo hekópe Hesu Crísto rembiapoukapy.

3Oime ramo pende apytépe upe oimo’ãva ha’eha peteĩ mba’eguasu, toikuaa porã mba’eveha ha’e, ha ha’e voínte oñembotavy ojupe.

4Peteĩteĩ toha’ã (toipyguara) hembiapoteéva, ha ojohu ramo peteĩ tembiapo porã tovy’a hekópe ipytu porãme, ha’eñoháme, ani hag̃ua ha’e oñembojoja hapicha rembiapokue rehe.

5Peteĩteĩ oguerahava’erã imba’e pohyiteéva (icárga imba’eteéva).

6Upe oñehekombo’éva Ñanderuete ñe’ẽ porãite rehe tome’ẽ imbo’ehárape opaite mba’e oguerekóvagui avei.

7Aníke peñembotavy pendejupe. Avave ndaikatúi oñembohory rei Ñanderuete rehe. Opaite umi mba’e ñande ñañotỹva, katuete ñamono’õ jevyva’erã avei.

8Upe oñotỹva ijyvyarigua rete (reko) rembipota vaípe g̃uarã, ijyvy arigua rete rembipota vaígui omono’õva’erã ñembyai; upe oñotỹva Pytu Porãmbávape g̃uarã, Pytu Porãmbávagui omono’õva’erã tekove tapia g̃uarãva.

9Aníkena ñanekane’õ jajapo hag̃ua ñane rembiapo iporãva, hi’árape ñamono’õva’erã, katuete nañaneate’ỹi ramo.

10Upévare ikatu aja jajapo tembiapo iporãva opavavépe g̃uarã, ñamotenondeveva’erã Hesu Crísto reheguávape.

11Pema’ẽ ko létra tuicháva rehe che ahai peẽme ko kuatiañe’ẽ kóvape che potee rupi.

12Opaite umi apóstol gua’u pendejopy peẽ peñekytĩ’ouka hag̃ua, ojapo péva, ani hag̃ua ohasa asy hekovépe Hesu Crísto kurusu rehehápe.

13Umi oñekytĩ’oukáva ndojapopái hekópe Moises rembiapoukapykuéra, oipotánte ningo peẽ peñekytĩ’ouka, ha’ekuéra oñembotuicha hag̃ua penderehe.

14Mba’evéicharamo ndaijái che ajererovu hag̃ua, Hesu Crísto kurusúrente uvei. Ha’érupi che amanóma ko yvy rekópe g̃uarã, ha ko yvy reko omanóma avei chéve g̃uarã.

15Pe ñekytĩ’o ndaha’éi mba’eve, ha pe ñekytĩ’o’ỹ ndaha’éi avei mba’eve, pe tekove pyahu Hesu Crísto rupínte ovale.

16Umi oikóva guive ko tekove pyahu kóvape Ñanderuete toñohẽ hi’arikuéra ipy’aguapy ha ipy’aporã, ha avei Israel retã ári.

17Ko’águi rire, anive avave chemyangekõi, che ningo arekóma che retére Hesu Crísto márca.

18Che hermanokuéra, Ñanderuete py’aporã topyta pende pytu porã ndive, taupéicha (amen).

← Chapter 5 Jump to: