Genesis 24 — Guarani 2015 (Ñanderuete Ñe’ẽ Porã 2015)

1Abraham itujáma, ha hetaiterei árama oikove; ha Ñanderuete ohovasa Abrahámpe opaite mba’épe.

2Ha Abraham he’i peteĩ hembiguáipe, pe hogapýpe itujavévape, ha oisãmbyhýva opaite mba’e ha’e oguerekóva guive: Emoĩ ko’ág̃a nde po che retyma ro’o guýpe,

3ha reme’ẽta chéve ne ñe’ẽ Ñanderuete renondépe, yvagakuéra ha yvy Jára, nderehekamo’ãiha che ra’ýpe g̃uarã hembirekorã umi Canaangua rajykuéra apytégui, ijapytepekuéra aiko’aína.

4Rehóta uvei che retãme, che pehẽnguekuéra rendápe, ha upépe rehekáta che ra’y Isaac rembirekorã.

5Ha he’i ichupe hembiguái: Upe kuñataĩ ndouséi ramo che rapykuéri ko tetã kóvape, agueraha jevýtapa nde ra’ýpe pe tetã nde resẽ haguégui.

6Ha Abraham he’i ichupe: Ani regueraha jevýtei che ra’y upépe,

7Ñanderuete, yvagakuéra Jára, cheguenohẽva’ekue che ru rógagui ha che rogayguakuéra retãgui, ha oñe’ẽva’ekue chéve he’ívo: Ne ñemoñarenguérape ame’ẽta ko yvy kóva; Ha’e omondóta peteĩ yvága rembiguái ne renonderãme nde regueru hag̃ua upégui che ra’y rembirekorã.

8Ha upe kuñataĩ ndouséi ramo nendive, nane’apytĩmo’ãvéi ko ñe’ẽme’ẽme, anínte katu regueraha jevy che ra’ýpe che vallekuépe.

9Upémaramo pe tembiguái omoĩ ipo ijára Abraham retyma ro’o guýpe, ha ome’ẽ iñe’ẽ Ñanderuete renondépe ojapopataha Abraham rembipota.

10Ha hembiguái oiporavo 10 caméllo, ijára camellokuéra apytégui ha oho, ogueraha hikuái opaichagua jopói iporavopyréva ijáragui; ha ojeity tape rehe, og̃uahẽ meve Mesopotámia, Nacor távape.

11Ha omoñesũ icamellokuéra pe táva oka gotýo, peteĩ ykua ypýpe, ka’aru jave ohóvo, umi kuñataĩ osẽháme jepi y rekávo.

12Ha’e oñembo’e ha he’i: Ñanderuete, che jára Abraham Jára, ajerure ndéve, embosako’i porãmba chéve ko árape ha ehechauka nde poriahuvereko oĩha che jára Abraham ndive.

13Péina ápe, che aĩ ko ykua ypýpe, ha ko’ã tavaygua rajykuéra osẽ joa y rekávo,

14ha upe kuñataĩ máva che ha’étavape: Emboguejy ne kambuchi, hay’umi hag̃ua, ha ha’e he’i ramo chéve: Hey’u katu, ha amboy’úta avei ne rymba camellokuérape; péva taha’e nde reiporavova’ekue ne rembiguái Isaácpe g̃uarã; ha upéicha che aikuaáta reiporiahuverekoha che járape.

15Ha ojehu ha’e oñembo’epa mboyve, péina Rebéca og̃uahẽ ikambuchi reheve ijati’y ári, ha’e ningo Betuel rajy, Betuel katu Nacor rembireko membykuimba’e, ha Nacor ha’e Abraham ryvy.

16Pe kuñataĩ iporãiterei, ha’e peteĩ kuñataĩ heko potĩva, ndoikóiva gueteri kuimba’e ndive; ha’e ou pe ykuápe, omyenyhẽ hag̃ua ikambuchi, ha ojere oho hag̃uáicha.

17Upémaramo pe tembiguái oñani hendápe, ha he’i: Ajerure ndéve chemboy’u michĩmi ne kambuchiguigua ymíre.

18Ha ha’e he’i ichupe: Hey’u katu che karai; ha pya’e omboguejy ikambuchi ijati’y ári, ha omboy’u ichupe.

19Ha Rebéca omboy’upáma ramo ichupe, he’i: Ne camellokuérape g̃uarã aguenohẽta avei y, ombogue peve ijy’uyhéi.

20Ha pya’ete omonandi ikambuchi umi tymba hoy’uhápe ha oho jevy ykuápe y renohẽvo, ha oguenohẽ opaite camellokuérape g̃uarã.

21Ha pe kuimba’e ipy’andýi pe kuñataĩ rehe, ha okirirĩnte oikuaa hag̃ua Ñanderuetépa ohovasa ijeju térã nahániri.

22Ha umi caméllo hoy’upa rire, pe kuimba’e ome’ẽ ichupe peteĩ namichãi oroguigua ipohýiva 5,5 grámo ha mokõi jeguaka pyapy rehegua ipohýiva 111 grámo.

23Ha he’i: Máva rajy piko nde. Aipota remombe’u chéve. Ikatúnepa ropyta nde ru rógape.

24Ha pe kuñataĩ he’i ichupe: Che ru Betuel, Mílca ha Nacor ñemoñare.

25Ha he’i avei: Ore rógape oĩ heta kapi’i ha tymbakuéra rembi’urã, ha oĩ avei tenda pepyta hag̃ua ko pyhare.

26Upémaramo Eliézer oñakãity, ha oagradece Ñanderuetépe,

27ha he’i: Toñemomba’eguasu Ñanderuete, che jára Abraham Járape nomboykéi haguére ichugui ijeporiahuvereko ni ipy’a porã, Ha’e voi chesãmbyhy che rape rehe, ag̃uahẽ meve che jára ryvy rógape.

28Ha pe kuñataĩ oñani isy rógape ha oho omombe’upa ko’ã mba’e hogayguakuérape.

29Ha Rebéca kyvy, hérava Laban, ohendupávo iñe’ẽ, oñani pe ykua gotýo Abraham rembiguái oha’ãrõháme,

30ohechágui pe namichãi ha umi jeguaka pyapy reheguáva heindy jyváre, ha ohendúgui: Péicha he’i chéve pe kuimba’e, ou pya’e Eliézer rendápe; ha péina ha’e oĩhína umi caméllo ykére pe ykua ypýpe.

31Ñanderuete nderovasáma, mba’érehe piko repyta rei okápe, ambosako’ipáma pe óga ndéve g̃uarã ha ne caméllo rendag̃ua avei, (Laban he’i).

32Upémaramo Eliézer ou hógape, ha Laban ojorapa icamellokuéra ha ome’ẽ ichupekuéra kapi’i, hi’upyrã, ha ome’ẽ avei y Abraham rembiguái ha hendive oúvape g̃uarã ojepyhéi hag̃ua.

33Ha omoĩ henondépe avei hembi’urã; Eliézer katu he’i ichupe: Ndakarumo’ãi ha’e mboyve pe ha’eva’erãva. Ha he’i hikuái ichupe: Ere katu umi ereséva.

34Upéramo he’i: Che, Eliézer, Abraham rembiguái.

35Ñanderuete ohovasaite che járape, ha oiko ichugui karaiguasu, Ha’e ome’ẽgui ichupe pláta, óro, tembiguái kuimba’e ha kuñáva, heta ovecha, kavara, vaka, caméllo ha burrokuéra.

36Ha Sára, che jára rembireko, ig̃uaig̃ui riréma ou imemby che járape g̃uarã peteĩ mitãkuimba’e, ha ome’ẽmba ichupe opaite mba’e oguerekóva guive.

37Ha che jára oipota che ame’ẽ ichupe che ñe’ẽ ha he’i: Nderehekamo’ãi che ra’y rembirekorã umi Canaangua rajy apytégui, che aiko ramojepe hetãme.

38Rehóta uvei che ru ha che pehẽnguekuéra rógape, ha upégui reguerúta che ra’y rembirekorã.

39Ha che ha’eva’ekue che járape: Ha sapy’a rei upe kuñataĩ ndouséi ramo chendive.

40Ha’e katu he’i chéve: Ñanderuete resa renondépe che aiko’aína, Ha’e katuete omondóta ijyvága rembiguái nendive ha Ha’e nemboguata porãta ne raperã rupi ha nde reguerúta che ra’y rembirekorã che ru rógagui.

41Ha nane’apytĩmo’ãvéi ko che ñe’ẽme’ẽ reg̃uahẽ vove che pehẽnguekuéra rendápe ha ha’ekuéra nome’ẽséi ramo ndéve che ra’y rembirekorã, upéicharamo mante nane’apytĩmo’ãvéi che ñe’ẽme’ẽ.

42Ha ag̃uahẽvo ko árape pende ykuápe, añembo’e Ñanderuete, che jára Abraham Járape; Ha’e ombosako’i porãmba hag̃ua chéve.

43Che aĩ jave ko ykua ypýpe ha ou ramo peteĩ kuñataĩ y rekávo, che ha’éta ichupe: Ajerure ndéve chemboy’umi hag̃ua ne kambuchígui.

44Ha ha’e he’i ramo chéve: Hey’u katu nde ha aguenohẽta avei y ne camellokuérape g̃uarã; upéva taha’e pe kuñataĩ Ñanderuete oiporavomava’ekue che jára ra’ýpe g̃uarã.

45Añembo’epa mboyve, péina ápe Rebéca og̃uahẽ ikambuchi reheve ijati’y ári; oguenohẽ hag̃ua y, ha che ha’e ichupe: Ajerure ndéve chemboy’umína.

46Pya’e ha’e omboguejy ikambuchi ijati’y árigui, ha he’i: Hey’u ha amboy’úta avei ne camellokuérape. Ha che hay’u rire ha’e omboy’u avei che camellokuéra.

47Upéramo aporandu ichupe: Máva rajy piko nde. Ha ha’e he’i chéve: Che ru Betuel, Mílca ha Nacor ñemoñare. Upéramo amoĩ ichupe peteĩ namichãi itĩ rehe, ha jeguaka ipyapykuéra rehe.

48Ha añakãity ha añembo’e Ñande Ruetépe, ha amomba’eguasu ichupe Ha’e chesãmbyhy porã haguére pe tape añetegua rehe, ajohu hag̃ua che jára ryvy rajýpe, Isaac rembirekorã.

49Ha ko’ág̃a, peẽ peiporiahuvereko ramo ha pehayhu ramo che járape, peje chéve, ha nahániri ramo, peje avei chéve; aha hag̃ua akatúa térã asu gotýo.

50Upéramo Laban ha Betuel he’i ichupe: Ñanderuetégui ou ko’ã mba’e; ndaikatúi ro’évo ndéve ivaíva térã iporãva.

51Péina ápe Rebéca, eraha ichupe, ha tapeho, ha’e toiko nde jára ra’y rembireko ramo, Ñanderuete oipota háicha.

52Ha Abraham rembiguái ohendúvo iñe’ẽnguéra, oñakãity yvy rehe omomba’eguasu hag̃ua Ñanderuetépe.

53Ha Eliézer oguenohẽ jeguaka plataguigua ha oroguiguáva ha heta ao ome’ẽ hag̃ua Rebécape; Eliézer ome’ẽ avei heta mba’erepy ikyvy ha isýpe.

54Upéi ha’e ha umi kuimba’e ouva’ekue hendive okaru ha hoy’u, ha opyta pe pyhare hógape; ha opu’ã rire ambue pyharevete, he’i: Pechemondo, taha jevy che jára rendápe.

55Upéramo he’i ikyvy ha isy: Pe kuñataĩ topytamive orendive 10 ára ha uperire toho.

56Ha’e katu he’i ichupekuéra: Anive pechejoko, Ñanderuete ombohape porãmbaitére, pechemondóna uvei, taha jevy che jára rendápe.

57Upéramo he’i hikuái: Ñahenói pe kuñataĩme ha ñaporandu ichupe.

58Ha ohenói hikuái Rebécape, ha oporandu ichupe: Rehosémapa nde ko kuimba’e kóva ndive. Ha ha’e he’i: Che ahase.

59Upéramo oheja hikuái Rebéca oho hembiguái kuña ndive, Eliézer ha iñirũnguéra ndive.

60Ha ohovasa hikuái Rebécape ha he’i ichupe: Ore reindy, toiko ndehegui 1.000 ha hetave 1.000-kuéra sy ramo, ha ne ñemoñarenguéra toguereko ipoguýpe hesekuéra ija’e’ỹvape.

61Uperire Rebéca opu’ã hembiguái kuñataĩkuéra ndive ojupi umi caméllo ári ha oho hikuái Eliézer rapykuéri; upéicha oje’ói hikuái oñondivepa.

62Ha Isaac ouhína pe Oikovéva cherecha ykuágui; ha’e oikógui upérõ Négevpe.

63Upe ka’aru Isaac osẽ oñembo’e hag̃ua pe ñúme; ha ojesaupívo oma’ẽ, ha péina umi caméllo oñemoag̃ui joa oúvo.

64Ha Rebéca ohechávo Isaácpe oguejy icaméllo árigui;

65ha oporandu Eliézerpe: Máva piko pe kuimba’e ouvahína pe ñu rupi ñaneruvaitĩvo. Ha’e he’i ichupe: Péva voi ningo che jára; upéramo Rebéca ojapyhy iñakãhoja, ha ojaho’i hova.

66Ha Eliézer omombe’u Isaácpe opaite mba’e ojapova’ekue.

67Ha Isaac ogueru pe kuñataĩme isy Sára róga rymba pirekueguiguápe ha omenda Rebécare, ha ohayhu ichupe; péicha Isaac oñemoangapyhy, isy omano rire.