Genesis 31

Guarani 2015 (Ñanderuete Ñe’ẽ Porã 2015)

← Chapter 30 Jump to: Chapter 32 →

1Ha Jacóbo ohendu umi Laban ra’y he’i ramo: Jacóbo ojapyhypáta ñande ru mba’éva, ha ñande ru mba’e oĩmbáta ipópe.

2Ha Jacóbo ohechakuaa avei Laban rova ndaha’eveimaha ko kueheguaréicha hendive.

3Upévare Ñanderuete he’i Jacóbope: Tereho jevy nde ru retãme, ha nde rogaygua apytépe, ha Che aĩta nendive.

4Ha Jacóbo ohenoiuka Raquel ha Léape ou hag̃ua hendápe, pe ñúme ijovechakuéra oĩháme,

5ha he’i ichupekuéra: Ahechakuaa pende ru rova ndaha’eveimaha ymaguaréicha chendive; che ru Jára oĩgui chendive.

6Peẽ katu peikuaa porã amba’apo hague pende rúpe che pu’akakue reheve.

7Ha pende ru chembotavýkuri, omoambuévo chehegui che rembiapo repy 10 jevy (véces), Ñanderuete katu ndohejáikuri ichupe ojapo hag̃ua ivaíva cherehe.

8Laban he’i ramo: Umi ipititítava ne rembiapo repyrã, upéicha maymáva ovecha imemby ipititi joaite ha he’i ramo umi iparáva ne rembiapo repyrã; upéicharamo umi ovecha imemby iparáva meme.

9Upéicha Ñanderuete oipe’áma pende ru rymbakuéra, ome’ẽ hag̃ua chéve.

10Ha ojehu ijovecha ha ikavarakuéra haku ramo, che ajesaupi ha ahecha che képe umi ovecha mácho oñu’ãva umi kuña para ha ipititívape.

11Ha Ñanderuete yvága rembiguái he’i che képe: Jacóbo. Ha che ha’e ichupe: Ko’ápe aĩ.

12Ha ha’e he’i chéve: Ejesaupína ko’ág̃a, ha rehecháta umi mácho oñu’ãva umi kuña ipara ha ipititívape, Che ahechapágui Laban ojapova’ekue nderehe.

13Che voi ningo pe Jára oñe’ẽva’ekue nendive Betélpe ha nde reikuave’ẽ chéve g̃uarã reñohẽvo nde acéite pe ita ári ha reme’ẽva’ekue avei ne ñe’ẽ Che aiko hag̃ua nde Jára ramo. Epu’ã ko’ág̃a ha esẽ ko tetãpýgui, ha tereho jevy ne retãme reju haguégui.

14Raquel ha Léa he’i ichupe: Ore piko roguereko gueteri ore mba’e ore ru rógape térã oñeme’ẽnepa gueteri oréve ore mba’erã.

15Ndaorerekói piko ku tetã ambueyguáva ramo, oñemu ningo orerehe, ha ho’upaitéma avei ore repykue.

16Ha opaite mba’erepyeta Ñanderuete oipe’ava’ekue ore rúgui, ore mba’e ha ore membykuéra mba’erã; upévare ejapo katu ko’ág̃a opaite mba’e he’iva’ekue ndéve Ñanderuete.

17Upéramo Jacóbo opu’ã, ha ohupi ita’yrakuéra ha hembirekokuéra icamellokuéra ári,

18oho jevy hag̃ua itúva Isaac rendápe, Canaan retãme, hymbakuéra maymáva ha opaite mba’e ohupityva’ekue Padan-Arámpe hembiapo repykue rupi.

19Upejave Laban oho oñapĩ hag̃ua ijovechakuéra; Raquel katu omonda itúva jára ra’ãnga.

20Jacóbo katu ombotavy Labánpe, pe Aramgua, ndoikuaaukáivo ichupe ohotamaha.

21Ha’e okañy opaite mba’e oguerekóva reheve; opu’ã ha ohasa pe Éufrates ysyry mboypýri ha oho Galaad cérro gotýo.

22Ára mbohapyhápe oje’e Labánpe Jacóbo okañy hague.

23Upéramo ha’e oho hogayguakuéra ndive Jacóbo rapykuéri 7 ára (día) ha ohupity ichupe Galaad cérrope.

24Ha pe pyharépe Ñanderuete og̃uahẽ Laban rendápe ha he’i ichupe iképe: Eñangarekóke ani hag̃ua reñe’ẽ pohýi Jacóbope.

25Laban ohupity Jacóbope, ha’e omopu’ãmava’ekue hogarã mymba pirekueguiguáva Galaad cérrope; ha Laban opyta avei hogayguakuéra ndive upépe.

26Ha Laban he’i Jacóbope: Mba’éiko rejapo, nde chembotavy, ha regueru che rajykuéra pokuahápe ñorãirõ hapeguaréicha.

27Mba’upéiko rekañy chembotavy hag̃ua, ndereikuaaukái chéve rehoseha ikatu hag̃uáicha romomaitei paha, tory ha puraheipópe, mba’epu tarara ha árpa púpe.

28Ha nderehejái avei ahetũmi che ra’ykuéra ha che rajykuérape. Tarovapópe rejapo ko’ã mba’e.

29Che pópe oĩ pu’aka ajapo hag̃ua ivaíva nderehe; nde ru Jára katu oñe’ẽ chéve ange pyhare he’ívo: Eñangarekóke ani hag̃ua reñe’ẽ pohýi Jacóbope.

30Ha reho ramo, rehecha nga’uetégui nde ru róga, mba’upe piko remonda chehegui che jára (ra’ãnga).

31Ha Jacóbo ombohovái Labánpe: Akyhyje, reipe’a ramog̃uarã mbaretépe chehegui nde rajykuéra,

32ha tomano upe oguerekóva ipoguýpe nde jára; ñande ryke’ykuéra rovake eheka ne mba’e ha rejohu ramo egueraha. Jacóbo ndoikuaái katu Raquel omonda hague itúva jára ra’ãnga.

33Upérõ Laban oike Jacóbo róga (mymba pirekueguiguápe), Léa róga ha mokõive tembiguái kuñáva róga tymba pirekueguiguápe ha ndojohúi mba’eve; ha osẽvo Léa rendágui, oike Raquel róga tymba pirekueguiguápe.

34Raquel katu ojapyhy itúva jára ra’ãnga ha omoĩ icaméllo apéro guýpe, ha oguapy hi’ári, Laban katu oheka pe óga ryepýre ha ndojohúi mba’eve.

35Ha Raquel he’i itúvape: Aníkena ndepochýtei nde, che karai, ndaikatúigui apu’ã ne renondépe; kuña mba’asy reheve aĩ che. Ha’e ohekave ramo jepe ndojohúi ijára ra’ãnga,

36upévare Jacóbo ipochy Laban ndive; ha oja’o ichupe he’ívo: Mba’eichagua mba’evai piko ajapo nderehe, ha moõpa aja’yvere nendive, nde reju chemuña rejúvo tuguy rakuete reheve.

37Ha rejepovyvy opaite che mba’e apytépe; rejohu piko nde róga rembiporukuéra. Emoĩ ko’ápe che ryke’y ha nde ryke’ykuéra renondépe, ha toiporavo hikuái pe ojavývape.

38Che aikova’ekue nendive 20 áño pukukue; nde ovecha ha kavarakuéra araka’eve naimembykuáinte jepe, ha nda’úi nde ovecha ro’okue jepe.

39Araka’eve ndaguerúi ndéve ne rymba, mymba ñarõ ojukava’ekue: Che mba’égui amyengoviapa ha umi oñemondava’ekue arakue térã pyharekuépe, che voi amyengoviapava’ekue ndéve.

40Arakue chemokane’õ pe ára haku ha pyharekue pe ysapy ro’ysã, ha che resakuéragui okañy pe topehýi.

41Péicha aiko 20 áño pukukue nde rógape; 14 áño amba’apo ndéve g̃uarã nde rajy mokõivéva rehe, ha 6 áño ne rymba rehe, ha remoambue chehegui che rembiapo repykue 10 jevy (véces).

42Ha che ru Abraham ha Isaac Jára noĩri rire chendive, añetehápe ko’ág̃a nde chemondova’erãmo’ã po nandiete; Ñanderuete katu ohecha che jepy’apy ha che po rembiapokue ha Ha’e oñe’ẽ pohýi ndéve ange pyhare.

43Laban ombohovái ha he’i Jacóbope: Umi mitãkuña, che rajykuéra ha umi mitãkuimba’e che ra’y meme, ha umi ovecha che ovecha avei, ha opaite mba’e nde rehecháva guive che mba’e voi ningo; ha ko árape mba’épa che ajapokuaave che rajykuérape g̃uarã térã imembykuérape g̃uarã.

44Upévare eju ko’ág̃a, ñañemoĩ peteĩ ñe’ẽme ha topyta techaukahára ramo ñande mokõivéva apytépe.

45Upéramo Jacóbo ojapyhy peteĩ ita ha omopu’ã techaukaha ramo.

46Ha he’i Jacóbo ityke’yrakuérape: Pembyaty joaite umi ita. Upéicha ojapyhy hikuái ita ha omopu’ã peteĩ atýra, ha okaru joa hikuái pe ita atýra ári.

47Ha Laban ombohéra: Jegar Sahaduta (ita atýra techaukaha reheguáva); ha Jacóbo ombohéra iñe’ẽme: Galaad.

48Upéi Laban he’i ko ita atýra opytáta techahare ramo ñande mokõivéva apytépe, ñañoñe’ẽme’ẽ haguére;

49ha pe itaguasu ha’ekuéra omopu’ãva’ekue ombohéra Mizpa, péva he’ise: Ñanderuete toma’ẽ nderehe ha cherehe jajei rire ko’águi.

50Reipy’apy ramo che rajykuérape, térã rejapyhy ramo ambue kuña che rajykuéra ndive, avave noĩri ramo jepe ñanendive; ema’ẽ porãke, Ñanderuete topyta techahare ramo ñande mokõivéva apytépe.

51Ha Laban he’ive Jacóbope: Péina ápe ko ita atýra ha ko itaguasu ñamopu’ãma techaukaha ramo ñane pa’ũme,

52topyta techahare ramo, che ndahasava’erãiha ko ita atýragui nde róga gotýo añemoĩ hag̃ua nderehe, ha nde avei nderehasava’erãiha ko ita atýragui che róga gotýo reñemoĩ hag̃ua cherehe.

53Abraham ha Nacor Jára ha ituvakuéra Jára toiko mbojovakehára ramo ñande apytépe. Ha Jacóbo ome’ẽ avei iñe’ẽ Ñanderuete, itúva Isaac Jára rérape.

54Upéramo Jacóbo oikuave’ẽ hymba upépe, ha ohenói ityke’yrakuérape okaru hag̃ua; ha ho’u hikuái pan, ha pe pyharépe oke hikuái pe cérro pévape.

55Ha Laban opu’ã ambue pyhareve, ohetũ ita’ýra ha itajyrakuérape, ha ohovasa rire ichupekuéra ojevy hógape.

← Chapter 30 Jump to: Chapter 32 →

Recommended Reading

Commentary Genesis Commentaries → Devotional Genesis Devotional Guide → Get This Bible Guarani (Ñanderuete Ñe’ẽ Porã ) Study Bible →