Mark 11

Guarani 2015 (Ñanderuete Ñe’ẽ Porã 2015)

← Chapter 10 Jump to: Chapter 12 →

1Ha oñemoag̃uívo Jerusaléngui, Betfage ha Betánia ypýpe, olívo cérro rovái, Hesu omondo mokõi hemimbo’ekuérape henonderãme,

2ha he’i ichupekuéra: Tapeho pe tava’i oĩvahína pene renondépe, ha peikévo pejohúta ñapytĩmbýpe peteĩ búrro ra’y ne’ĩrava avave ojupi hi’ári, pejora ha pegueru.

3Ha oime ramo oporandúva peẽme: Mba’érepa pejapo péva. Peje: Karai ningo oikotevẽ hese, ha voi rogueru jevýta ko’ápe.

4Oho hikuái ha ojohu pe búrro ra’y ñapytĩmby okápe, peteĩ okẽ ypýpe, ha ojora hikuái pe búrro ra’y.

5Ha umi upépe oĩva oporandu: Mba’éiko pejapo, ma’erãiko pejora pe búrro ra’ýpe.

6Ha’ekuéra ombohovái Hesu ohekombo’e haguéicha ichupekuéra, upérõ oheja ichupekuéra ogueraha.

7Ha oguerahávo pe búrro ra’y, omoĩ hi’ári ijaokuéra, ha Hesu ojupi hi’ári.

8Ha heta oĩ oipysóva ijaokuéra pe tapére, ambuekuéra katu omoĩ yvyra rakã oikytĩva’ekue ñu rupiguágui.

9Ha umi tenonde ohóva ha umi oúva hapykuéri osapukái joa: Ñanderuete, orepytyvõna, taherakuãguasu ko oúva Ñanderuete rérape.

10Taherakuãngatu ñande ru David retã ruvicha reko oúva. Hosánna yvateve (hosánna he’ise: Ñanderuete oipytyvõ).

11Ha og̃uahẽvo Jerusalénpe, oike Ñanderuete rogaguasúpe, oma’ẽmba opaite mba’e rehe, ha ka’arúmagui oho Betániape umi 12 hemimbo’ekuéra ndive.

12Ha upeha ára, osẽvo Betániagui, Hesu iñembyahýi.

13Ha ohecha mombyry guive peteĩ hígo y vyra hogue hetáva, oho ohechávo hi’ápa. Og̃uahẽvo ijypýpe ndojohúi mba’eve hese, hoguémante, ndaha’éigui hígo tiémpo.

14Ha Hesu he’i pe hígo yvyrápe: Máramo avave anive ho’u nde yva Ha hemimbo’ekuéra ohendupa iñe’ẽ.

15Ha og̃uahẽvo Jerusalénpe, oike Ñanderuete rogaguasúpe ha omosẽmba umi oñemúvape upépe, ombojaparo umi pirapire myengoviahára mesakuéra ha pykasu repyme’ẽhára guapyhakuéra.

16Ndohejái avave ogueraha oime haichagua tembiporu Ñanderuete rogaguasu rupi.

17Ha ombo’évo avei ichupekuéra he’i: Ndojehaíri piko Ñanderuete kuatiañe’ẽme: Che róga ningo ñembo’e róga opaite tetãnguérape g̃uarã, (Isaías 56,7). Peẽ katu pejapo ichugui mondaha kuára.

18Ha pa’i ruvichakuéra ha umi kuatia haihára ohendu ko’ã mba’e ha oheka mba’éichapa ojukáta Hesúpe, okyhyjégui ichugui hikuái, umi Israel tavaygua ohecharamoitégui imbo’epy.

19Ha og̃uahẽvo pyhare, osẽ hikuái pe tavaguasúgui.

20Ha pyhareve ha’ekuéra ohasávo, ohecha pe hígo yvyra ipirupáma hapo guive.

21Ha Pédro imandu’a, ha he’i: Mbo’ehára, péina ningo pe hígo yvyra Nde remaldeciva’ekue ipirupáma.

22Ha Hesu ombohovái ha he’i ichupekuéra: Pejerovia Ñanderuetére.

23Añetéko ha’e peẽme, oimérõ he’íva ko cérrope: Epu’ã ha ejeity yguasúpe, ha ndaipy’a mokõiri, oguerovia ramo uvei oikotaha pe he’íva, upéva katuete oikóta ichupe g̃uarã.

24Upévare ha’e peẽme: Opaite pejeruréva pene ñembo’épe, peguerovia ramo pehupitytaha katuete, pehupityva’erã.

25Ha peñembo’érõ, peperdona pende rapicha oja’yvereva’ekuépe penendive, pende Ruete peneperdona hag̃ua avei.

26Ha peẽ napeporoperdonái ramo, Ñanderuete noperdonamo’ãi avei pene rembiapo vaikue.

27Ha ou jevy hikuái Jerusalénpe, ha oguatávo Ñanderuete rogaguasu rupi, ohug̃uaitĩ ichupe pa’i ruvichakuéra, kuatia haihakuéra ha karai ancianokuéra,

28ha oporandu hikuái ichupe: Mba’eichagua pu’aka rupi piko rejapo milagrokuéra, térã mávapa ome’ẽ ndéve pe pu’aka rejapo hag̃ua umi mba’e.

29Hesu he’i ichupekuéra: Che aporanduse peẽme avei peteĩ mba’e, ha pembohováirõ chéve, Che ha’éta peẽme mba’e pu’aka rupípa ajapo ko’ã milagrokuéra.

30Juan oporobautiza Ñanderuete rembipota rupi, térãpa kuimba’e rembiapónte. Pembohovái chéve.

31Ha ha’ekuéra oñemongeta oñondive: Ja’érõ: Ñanderuete rembipota rupi, he’íta: Mba’érehepa ndapegueroviáira’e ichupe.

32Ha ja’érõ: Kuimba’e rembiapo, jakyhyje ñane retãyguakuéragui, ichupekuéra g̃uarã ningo Juan peteĩ proféta.

33Ha he’i hikuái Hesúpe: Ndoroikuaái. Upérõ Hesu he’i ichupekuéra: Upéicharõ Che nda’emo’ãi avei peẽme mba’eichagua pu’aka rupípa ajapo ko’ã milágro.

← Chapter 10 Jump to: Chapter 12 →