Mark 2

Guarani 2015 (Ñanderuete Ñe’ẽ Porã 2015)

← Chapter 1 Jump to: Chapter 3 →

1Ha heta ára rire Hesu oike jevy Capernaúmpe, ha umi tavaygua ohendúvo Ha’e oĩha peteĩ ógape.

2Pya’e ijaty heta hikuái, ndaijavéi peve okẽme jepe, ha Hesu omombe’u ichupekuéra Ñanderuete ñe’ẽ.

3Ha ou hendápe irundy kuimba’e, oguerúva peteĩ ijapávape.

4Ha ndaikatúigui oñemboja Hesu rendápe, oñembyatýgui heta génte, ombokua pe óga ape (técho) omboguejy hag̃ua upérupi pe hasývape hupa reheve, Hesu rendápe.

5Hesu ohechávo umi kuimba’e jerovia, he’i pe ijapávape: Che ra’y, ne rembiapo vai oñeperdonáma.

6Ha umi kuatia haihára upépe oguapýva, he’i ipy’apýpe:

7Mba’érehe piko kóva péicha he’i. Kóva ningo oñembohory Ñanderuete rehe. Máva piko ikatu operdona yvyariguakuéra rembiapo vai, Ñanderuete añómante.

8Ha Hesu ohechakuaa voi Ipytu Porã rupi, ojepy’amongetaha vai hikuái ipy’apýpe, upévare he’i ichupekuéra: Mba’érehepa pepensa péicha pende py’apýpe.

9Mba’épa hasyve ja’e hag̃ua ko ijapávape: Reñeperdonáma, térãpa epu’ã, ejapyhy nde rupa ha tereho.

10Néi, peikuaa hag̃ua Ñanderuete Ra’y ipu’akaha yvy apére operdona hag̃ua, Hesu he’i pe ijapávape:

11Che ha’e ndéve: Epu’ã, ejapyhy nde rupa ha tereho nde rógape.

12Ha upevovete pe hasyva’ekue opu’ã, ojapyhy hupa ha oho opavave resa renondépe hógape, upévare ohecharamo joa hikuái, ha omomba’eguasu Ñanderuetépe ha he’i hikuái: Araka’eve ndorohechái koichagua mba’e oikóva.

13Ha Hesu oho jevy yguasu rembe’ýpe, heta kuimba’e ha kuñakuéra oñembyaty hendápe ha Ha’e ombo’e ichupekuéra.

14Ha ohasávo ohecha Levi, Alféo ra’ýpe, oguapyvahína oñemono’õháme impuésto, ha he’i ichupe: Epu’ã ha eju che rapykuéri. Ha ha’e opu’ã oho hag̃ua Hesu Crísto rapykuéri.

15Ha Hesu oguapy jave mesápe Levi rógape, hendive oguapy hemimbo’ekuéra, heta impuésto mono’õhára ha hembiapo vaíva omoirũva’ekue avei ichupe.

16Umi kuatia haihára ha fariseokuéra ohechávo Hesu Crísto okaruha hembiapo vaíva ha impuésto mono’õhára ndive, oporandu hemimbo’ekuérape: Mba’érehe piko Ha’e okaru impuésto mono’õhára ha hembiapo vaíva ndive.

17Ha Hesu ohendúvo iñe’ẽ, he’i ichupekuéra: Hesãiva noikotevẽi pohãnohára rehe, hasývante, che ndajúi heko potĩva ahenóivo, hembiapo vaívape uvei.

18Ha Juan remimbo’ekuéra ha fariseokuéra oajunaha árape oporandu Hesúpe: Mba’érehe piko Juan ha fariséo remimbo’ekuéra oajuna ha ne remimbo’ekuéra noajunái.

19Ha Hesu ombohovái: Ikatu piko umi oñehenóiva mendahápe oajuna, pe menarã oĩ aja gueteri hendivekuéra. Pe menarã oĩ aja hendivekuéra ndaikatúi oajuna.

20Og̃uahẽta katuete pe ára ojeiva’erã ichuguikuéra pe menarã; upérõ oajunava’erã hikuái avei.

21Avave nombovyvýi ao pyahu omyatyrõ hag̃ua ao tuja, pe ñemyatyrõ pyahu omyatã pe ao tuja ha omondoro tuichavéta.

22Ha avave nomoĩri víno pyahu mba’yru kavarapire tujakuépe, upéicharamo pe víno omondoro pe mba’yru kavarapirekueguigua, ha oñehẽmba pe víno. Víno pyahu oñemoĩva’erã mba’yru kavarapirekue pyahúpe.

23Ha Hesu ohasa jave kokue rupi sábado árape, hemimbo’ekuéra oipo’o trigoky ohasakuévo.

24Ha fariseokuéra he’i ichupe: Mba’érehe piko ojapo hikuái sábado árape upe ojejapo’ỹva’erãva.

25Ha Hesu he’i ichupekuéra: Máramo piko napemoñe’ẽi David ojapova’ekue, ohasa asy ha iñembyahýi ramoguare, ha’e ha iñirũnguéra.

26Mba’éichapa ha’e oike Ñanderuete rógape, pa’iguasu Abiatar oiko ramoguare, ha ho’u pe pan oñemboykéva Ñanderuetépe g̃uarãnte avave ndaikatúiva ho’u, umi pa’i añómante, ha ho’uka avei umi hendive oĩvape.

27Ha Hesu he’ive ichupekuéra: Pe sábado ára ojejapo kuimba’e ha kuñakuérape g̃uarã, kuimba’e ha kuñakuéra ndojejapói pytu’uha árape g̃uarã.

28Upéicha pe yvyarigua Ra’y (Hesu Crísto) opyta avei pe pytu’uha ára Jára ramo.

← Chapter 1 Jump to: Chapter 3 →