1 Peter 1

Gussi (EBIBILIA ENCHENU) 2020

Jump to: Chapter 2 →

1Inche Petero, omotomwa o Yeso Kristo, nkobarikera nde inwe abachore, abamwatananekire gochia komenya buna abamenyi ase Ponto, na Galatia, na Kapadokia, na Asia, na Bitinia.

2Inwe nigo mwachoretwe koreng’ana buna Nyasae Tata amanyete korwa kare, na mogachenwa n’Omoika, monyare koigwera Yeso Kristo, na konyororokerigwa namanyinga aye. Obuya na omorembe bimenteke asemore.

3Nyasae, Ise Omonene oito Yeso Kristo, abakwe! Ase amabera aye amange atoiboire eria kabere, erinde tonyore ogosemeria kore moyo goetera ase okobokigwa kwa Yeso Kristo korwa ase abakure,

4naende tonyore omwando otagosareka, otari na komocha, otari gosiria obonene bwaye. Omwando oyo ogachire igoro ase engencho yaino,

5inwe abamorendire nokobua kwa Nyasae ase enchera y’okwegena, monyore ogotooreka kore ang’e koorokigwa ase ekero ki’omoerio.

6Ase engencho y’ayio monyare kogoka mono, nonya mbono ase ekero egeke inamochandeke ase amateemwa a kera engencho, onye egwenerete.

7Igo okwegena kwaino, gakoratenene ase ogoteemwa, kore kwe rigori rinene kobua etahabu egosira (nonya egoteemwa ase omorero) naende konyorekane kogwenerete ogotogigwa, na obonene, na ogosikwa ase okoorokigwa kwa Yeso Kristo.

8Ere oyo mwamwanchire, nonya timomorochi, mwamwegenire, nonya timoramorora, na igo moragoke ase omogoko otari gotebeka oichire nobonene,

9ekero moranyore oboikeranu bw’okwegena kwaino, engencho yaye ogotooreka kw’emioyo yaino.

10Igoro ase amang’ana ’ogotooreka okwo ababani, baria babanete obuya obo borache kobachera, bakariga‐rigia na kouna‐unia.

11Bakarigia nkero ki, naende nkero kenga buna kere ki, Omoika o Kristo, oyorenge ime yabo, oorogetie, ekero otang’anete koba kirori igoro y’ogochandwa gwa Kristo, na obonene obwo borache koba nyuma y’ayio.

12Barabwo nigo bamaanoreretwe ng’a babakorere inwe ase amang’ana ayio, gose tari barabwo abanyene. Ayio bono araretigwe asemore nabaria babaranderetie inwe enchili ase Omoika Omochenu, oyotometwe korwa igoro. Amang’ana ayio abamalaika bare namaiga kona‐koyasiomeria.

13Ase ayio, eboyie bokong’u ebinema bi’ebirengererio biaino, mobe aberiti, mobe nogosemeria ogoikeranu ase obuya boria morarenterwe ase okoorokigwa kwa Yeso Kristo.

14Buna abana abaigweri timwereng’ania nokogania kwaino okobe kwe ritang’ani, ekero mware motamanyete gento,

15korende buna ere, oyobarangeirie, are omochenu, naboigo nainwe mobe abachenu ase orogendo rwaino rwonsi,

16ekiagera nigo erikire, “Nebagwenerete mobe abachenu, ekiagera inche nomochenu.”

17Onye mokomoroka Tata, ere oyoragambie kera omonto koreng’ana nogokora kwaye atari nogwanchereria, mogenderere nokoiroka ase ekero kiaino gi’okomenya aiga buna abaeti.

18Momanye ng’a nigo mwaboorigwe korwa ase orogendo rwaino rotagwenereti, orwo mwanyorete korwa ase chisokoro chiaino, tari ase ebinto bigosareka, buna chifeta gose chitahabu,

19korende ase amanyinga e rigori rinene, buna ay’emanwa y’eng’ondi etari na komocha, gose na kemoa, engencho yaye amanyinga a Kristo.

20Ere igo amanyekanete korwa kare, ritang’ani ense etarabekwa oboroso, korende oorokigwe ase amatuko aya ay’omoerio ase engencho yaino.

21Goetera asare ere mwamwegenire Nyasae, oyomobogetie korwa ase abakure na akamoa obonene, erinde okwegena kwaino na ogosemeria kwaino kobe ase Nyasae.

22Komwaikire gwechena emioyo yaino ase okoigwera ekeene, goikera obwanchani bw’abamino botari nobong’ainereria, gaki bono mogenderere nobwanchani inwe ase inwe bokorwa ase enkoro y’ekeene,

23ekiagera mwaiboirwe eria kabere, tari ase embusuro egosareka, korende ase eyetari gosareka, goetera ase ring’ana ria Nyasae rinyene obogima, erikobao goika kare na kare.

24Naki igo erikire, “Mwanyabanto bonsi nigo banga buna obonyansi, na obonene bwabo nigo bonga buna ebisicha bire mogondo. Obonyansi nigo bokwoma, na ebisicha boigo,

25korende ring’ana ri’Omonene nigo rirabeo goika kare na kare.” Ne ring’ana eri nario enchili eye mwaranderetigwe.

Jump to: Chapter 2 →