1 Peter 4

Gussi (EBIBILIA ENCHENU) 2020

← Chapter 3 Jump to: Chapter 5 →

1Gaki, ekiagera Kristo achandetwe ase omobere, nainwe boigo eboyie ebirwanero bi’ebirengererio ebio ebio, ekiagera ere oyochandetwe ase omobere bweatananire korwa ase ebibe.

2Korwa bono ase amatuko aya atigarete more moyo, timogenderera koreng’ana nokogania okobe kwa mwanyabanto, korende koreng’ana nogwancha kwa Nyasae.

3Naki engaki yaino eye yaetire yaisanire ase ogokora aya abanto b’Ebisaku banchete gokora. Igo mwagendererete ase obonyaka, na okogania okobe, na okonywa, na emeyega y’okoria bobe na gotinda, na mware gosasima emegwekano, ogosasima gotarenge okoronge.

4Ase ayio, barabwo nigo bakorora ng’a nay’ogokumia, ekiagera inwe motari koayerera amo nabarabwo gochia ase obonyaka botari nekerengo, na nigo bakobarama.

5Korende barabwo nigo barache korua omobaro asare ere oyore ang’e kogambia abare moyo na abakure.

6Nakio kiagerete abakure bakaranderigwa enchili, erinde bagambigwe ase omobere koreng’ana buna mwanyabanto bakogambigwa, na babe moyo ase omoika, koreng’ana buna Nyasae are moyo.

7Bono omoerio bw’amang’ana onsi oikire ang’e. Ase ayio, mobe nobong’aini na kwerita ase ogosaba.

8Kobua ase onsi mobe nomokia ase ogwanchana, ekiagera obwanchani nigo bogotuba obonge bw’ebibe.

9Mobe abamokoroisania inwe ase inwe motari kwemurungania.

10Mokorerane inwe ase inwe, kera oyomo nekeegwa eke anyorete, buna abarendi abaya b’obuya bwa Nyasae, obore ne chingencho chinyinge.

11Omonto karakwane, tiga akwane amang’ana a Nyasae. Omonto karabe omokoreri, tiga akorere ne chinguru echio Nyasae amoeire, erinde Nyasae atogigwe ase amang’ana onsi goetera ase Yeso Kristo. Asare ere obonene na okobua kare na kare. Amina.

12Abanchani, timokumia ase obokong’u obore buna omorero, obwo bwabaikeire ase okobateema, buna namang’ana amageni abanyorire.

13Korende ekiagera mwabwatanire nemechando ya Kristo, goka, erinde ase okomaanorwa kw’obonene bwaye monyare kogoka boigo, na gochenga.

14Komorachaywe ase engencho y’erieta ria Kristo, imosesenirie ekiagera Omoika bw’obonene noyo o Nyasae nigo oikaransete igoro yaino.

15Korende onde omo oino taba omoiti, gose omoibi, gose omokori amabe, gose oyokwerosia ase amang’ana ’abanto bande, erinde abaise gochandwa.

16Korende onye omonto ogochandwa ekiagera are Omokristo tarora obosooku, korende atogie Nyasae ase erieta eri.

17Naki engaki yaikire ekina gechakere ase enyomba ya Nyasae na gakerachake asetore, omoerio obo abwo bataigwereti enchili ya Nyasae, naki orabe?

18Na, buna erikire, “Onye ekoba aakong’u omonyene oboronge gotooreka, oria otamoirogeti Nyasae na omonyene ebibe, naki rende kerabe asare?”

19Ase ayio, abwo bagochandwa koreng’ana nogwancha kwa Nyasae, tiga bakore amaya na babeke emioyo yabo asare ere oyore Omotongi omwegenwa.

← Chapter 3 Jump to: Chapter 5 →