1 Peter 5

Gussi (EBIBILIA ENCHENU) 2020

← Chapter 4 Jump to:

1Nasoroire abagaaka abare ase egati yaino, inche buna omogaaka omogisangio obo, na kirori bw’ogochandwa gwa Kristo, na omobwatani bw’obonene boria borache koorokigwa:

2Risia riicho ria Nyasae eriabekirwe asemore, tari ase okobetererigwa korende ase ogwancha buna Nyasae anchete, tari ase okonyora kw’oborianania, korende ase omoyo bw’okwerwa.

3Timoba abagwekora abanene igoro ase abwo mwaeirwe, korende mobe ekiorokererio ekiya ase riicho riria.

4Na Omorisia omonene karaoroke namonyore egutwa y’obonene etari gosareka.

5Naboigo nainwe abamore abake, mwebeke inse ase abagaaka. Na inwe mwensi eboyie oboitongo buna orokini, monyare gokorerana, ekiagera nigo erikire, “Nyasae nigo akwanga abare abaenenu, korende abare abaitongo nigo akobaa obuya.”

6Ase ayio, ekeyie inse y’okoboko kwa Nyasae okore nokobua, erinde ere abaimokererie igoro ase ekero kiaye.

7Motweke ogwechanda kwaino gwonsi, ekiagera ere nigo agwechanda mono ase engencho yaino.

8Mobe aberiti na korenda! Naki omosoeri oino Saitani nigo agoetanana na koruma buna endo ekoruma, ekorigia omonto erie.

9Mwange ere, na motenene bokong’u ase okwegena, momanye ng’a ogochandwa okwo okwo gwaikeranigwe ase abamino abare ase ense engima.

10Na Nyasae bw’obuya bwonsi, oyo obarangeirie mosoe ase obonene bwaye bwa kare na kare ase Kristo, komwaikire gochandwa ase ekero egeke, ere omonyene nabaroisie, na abakong’ie, ababeke chinguru na kobabeka ase oboroso obuya.

11Okobua nokwaye goika kare na kare. Amina

12Ase okoboko gwa Silivano, oyominto omwegenwa buna ndoche, nabarikeire ase amang’ana amake, kobasorora na koorokia ng’a obo nabwo obuya bw’ekeene bwa Nyasae. Tenena bokong’u ase obwo.

13Ekanisa ya Babeli eyachorirwe amo nainwe yabakwanirie. Nonya Mariko, omwana one, obakwanirie.

14Kwanania ase okonyunyuntana ase obwanchani. Omorembe obe amo nainwe mwensi, abamore ase Kristo Yeso.

← Chapter 4 Jump to: