1 Timothy 3

Gussi (EBIBILIA ENCHENU) 2020

← Chapter 2 Jump to: Chapter 4 →

1Ring’ana eri neri’ekeene, onye omonto origetie koba omotang’ani bw’ekanisa, igo aganetie emeremo emiya.

2Omotang’ani bw’ekanisa nemogwenerete abe omonto otari gokwanwa bobe, omonto ore nomokungu oyomo, omweriti, na omwegamberi ase onsi, abe omwechiki, omoroisia abageni, na oyomanyete kworokereria buya,

3tari omonto onarete edivai, gose omonto bwanchete goaka abanto, abe omonto omoremereria, otari gwancha eriomana, gose otari omwegimeria.

4Naende nemogwenerete abe omonto omanyete kogambera ab’enyomba yaye omonyene buya, na kworokereria abana baye baigwere ase ogosika gwonsi,

5ekiagera onye omonto tamanyeti gotenenera ab’enyomba yaye omonyene, nakiaranyare korenda ekanisa ya Nyasae?

6Ere taba omonto oonchoka rero iga, abaise gocha koenena na kogwa ase okogambigwa gwa Saitani.

7Nagwenerete gwatorwa ng’a nomuya nabanto bare isiko, erinde tabaisa kogwa ase ogosoerwa, na ase omoeto o Saitani.

8Naboigo nabakonyi b’ekanisa babe abanto bateneneine boronge ase ogokora okuya, batari nemenwa ebere, abanto batari konywa edivai enyinge, abanto batari gwancha okonyora kw’oborianania.

9Mbagwenerete babwate obobisi bw’okwegena ase chinkoro chitakobagambia.

10Barabwo boigo barengwe ritang’ani: onye bakonyorekana ng’a tibari ne chingencho chimbe, erio baegwe emeremo y’obokonyi ase ekanisa.

11Naboigo nabakungu babo bateneine boronge ase ogokora okuya, tari abang’achi, babe aberiti na abegenwa ase amang’ana onsi.

12Omokonyi bw’ekanisa abe omonto ore nomokungu oyomo, omanyete kogambera abana baye buya, na ab’enyomba yaye omonyene.

13Naki abwo bagokora emeremo yabo y’obokonyi buya benyoreire amasikani na oboremu obonge ase okwegena kore ime ase Kristo Yeso.

14Nigo nakorikeire amang’ana aya, inde nogosemeria ng’a ninchiche asore bwango.

15Korende inse gotebana, erio omanye buna abanto bagwenerete kogenderera ase enyomba ya Nyasae, eyere ekanisa ya Nyasae ore moyo, naende ere esiiro na oboroso ebire bi’ekeene.

16Naende ne ring’ana ritari koamereranigwa, ng’a obobisi bwe chingencho chi’obonyasae nobonene: Ere oyoorogetigwe ase omobere o mwanyabanto, akaorokigwa n’Omoika ng’a nomonyene oboronge, akarorwa nabamalaika, akarandigwa ase egati y’abanto b’ebisaku, akegenwa ase ense, akabogorigwa gochia igoro ase obonene.

← Chapter 2 Jump to: Chapter 4 →