1 Timothy 5

Gussi (EBIBILIA ENCHENU) 2020

← Chapter 4 Jump to: Chapter 6 →

1Totogonyera omogaaka, korende omosorore buna iso, abamura abake buna bamura bamino,

2abakungu abagotu buna abanyoko, na abakungu abasubati buna basubati bamino, ase obochenu bwonsi.

3Osike ababoraka abare ababoraka bori.

4Korende onye omoboraka ore nabana gose abachokoro, tiga beorokererie ritang’ani ayabagwenerete bakorere abamwabo abanyene, na koiraneria abaibori babo ng’a mbuya mono ase ebibanyorire, ekiagera ring’ana eri ndiancheire ase obosio bwa Nyasae.

5Oyore omoboraka bori, na otigire bweka, oyo nigo amosemeretie Nyasae, na kogenderera ase okoboria na ogosaba obotuko na omobaso.

6Korende ere, oyotari gwetanga ase okogania kwaye, okure nonya ore moyo.

7Obachike ayio, erinde babe batari na komocha.

8Onye omonto takorenda abare abamwabo, mono baria b’enyomba yaye, okanire okwegena, naende nomobe kobua oyotegeneti.

9Omoboraka anyare korikwa onye okoorire emiaka emerongo etano nomo, naende onye orenge omokungu bw’omosacha oyomo.

10Nemogwenerete gwatorwa ng’a nare nogokora okuya, buna oyo okinirie abana, oroisirie abageni, osibirie abachenu amagoro, okonyire abachandegete, na bweruete omonyene ase kera ogokora okuya.

11Korende torika ababoraka batari nemiaka emenge, ekiagera ekero baranyore ebirengererio ebire ao na Kristo, nigo baraganie konyuomwa.

12Barabwo nabagambigwe, ekiagera batigire eira yabo ye ritang’ani.

13Amo nayio beorokereirie koba aboro, bagoetanana enyomba ase enyomba; tibari aboro rioka, korende nabatora‐toria, bakwerosia namang’ana ’abanto bande, bagokwana amang’ana atagwenereti.

14Ase igo, nanchire ababoraka batari nemiaka emenge banyuomwe, baibore abana, barende chinka chiabo, na tibaa moengereria onde ribaga ri’ogokwana bobe igoro asetore.

15Naki abande bairanire nyuma, na gotunyana Saitani.

16Onye omosacha gose omokungu, oyobwegenete, ore nababoraka bamwabo, tiga abakonye, ekanisa teraarerigwa, erinde ebakonye baria bare ababoraka bori.

17Abagaaka abakogamba buya babarerwe ng’a mbagwenerete amasikani ara kabere, kobua mono abwo bagokora emeremo y’okorandia na kworokereria.

18Naki amariko nigo agoteba, “Tobaisa kobekera entang’ana ekeokio ekero ekoora endagera”, na “Omokori emeremo nagwenerete koegwa eng’eria yaye.”

19Tibwancha ogosoerwa igoro y’omogaaka otatiga, ase amang’ana ’abarori babere gose batato.

20Abwo bagokora ebibe, obatogonyere ase amasio ’abanto bonsi, erinde abande bairoke.

21Nagochikire ase obosio bwa Nyasae, na obwa Kristo Yeso, na obw’abamalaika abachore, obwate amang’ana ayio, na tonacha ring’ana ritang’ani otaramanya buna rire; tokora ing’ana rinde rionsi ase ogwanchereria.

22Tobekera omonto amaboko bwango, gose tosanga nebibe bi’abanto bande. Bwerende aye omonyene, obe omochenu.

23Korwa bono tonywa amache oka, korende onywe edivai nke, ase engencho y’enda yao na amarwaire agokonyora ekero ase ekero.

24Ebibe bi’abanto bande nigo bire maiso marore, biatang’anire gochia ase ekina, korende ebi’abande nigo bikobatunyana korwa nyuma.

25Naboigo, ogokora okuya nigo kore maiso marore, na koria gotari maiso marore tigokogenderera kobisekana.

← Chapter 4 Jump to: Chapter 6 →