1 Timothy 4

Gussi (EBIBILIA ENCHENU) 2020

← Chapter 3 Jump to: Chapter 5 →

1Omoika okwanire ase amang’ana akoigweka boronge, ng’a ase ekero ki’omoerio abanto bande mbeatanane korwa ase okwegena ase okoigwera emeika y’obong’ainereria na amorokererio ’ebirecha,

2ase obong’ainereria bw’abanto abanyaborimo, abwo chinkoro chiabo chiasambirwe, chitari koigwa kende.

3Barabwo nigo bagokania abanto ng’a tibanyuomana, naende tibaria endagera eye Nyasae atongete, erinde baria begenire, na baikire komanya ekeene, bayenyore ase okoiraneria ng’a mbuya mono.

4Kera egento egiatongetwe na Nyasae nekiya na tikegwenereti kwangwa, korende, nkegwenerete konyorwa amo nokoiraneria ng’a mbuya mono,

5ekiagera giachenirwe ne ring’ana ria Nyasae na ogosaba.

6Kororokererie abaminto ayio, nobe omosomba omuya o Kristo Yeso, obe oyokwerageria namang’ana ’okwegena na okworokererigwa okuya koria gwatunyanete.

7Korende bwange emegano etari ne chingencho chi’obonyasae eyio yanchire nabakungu abagotu. Bwenarie aye omonyene chingencho chi’obonyasae.

8Naki okwenaria kw’omobere nokonyora ogoke, korende okwenaria gwe chingencho chi’obonyasae nokonyora ase amang’ana onsi, ekiagera nkore neira ase obogima bwa bono, na ase boria bogochi‐gocha.

9Ring’ana eri neri’ekeene, rigwenerete gwancherwa kegima.

10Naki ase ring’ana erio nigo togokora emeremo ase ogwechanda, ekiagera tomosemeretie Nyasae ore moyo, ere oyore Omotooria bw’abanto bonsi, mono bw’abwo begenire.

11Obachike na koborokereria amang’ana ayio.

12Monto onde tagochaya ekiagera ore omosae, korende obe ekiorokererio ekiya ase abwo begenire, ase ogokwana, na ase orogendo, naende ase obwanchani, na okwegena, na obochenu.

13Goika nchiche, kora omokia ase ogosomera abanto amariko, na gokurera, na kworokereria.

14Totiga gokorera ekeegwa keria kwaetwe ase enchera y’obobani, ekero ekeombe ki’abagaaka giakobekerete amaboko.

15Orengererie ayio, bwerue kegima ase ayio, erio okogenderera kwao kobe maiso marore ase abanto bonsi.

16Bwerende aye omonyene na okworokereria kwao, ogenderere ase ayio, ekiagera korakore igo mbwetoorie aye omonyene amo nabwo bakogotegerera.

← Chapter 3 Jump to: Chapter 5 →