2 Thessalonians 1

Gussi (EBIBILIA ENCHENU) 2020

Jump to: Chapter 2 →

1Inche Paulo amo na Silivano na Timotheo nkobarikera tore inwe ab’ekanisa y’Abatesaloniki, abamore ase Nyasae Tata oito na Omonene Yeso Kristo:

2Obuya bobe asemore na omorembe bikorwa ase Nyasae Tata oito, na ase Omonene Yeso Kristo.

3Abaminto, netogwenerete komoakera Nyasae ng’a mbuya mono botambe ase engencho yaino, buna ere boronge, ekiagera okwegena kwaino gwakinire mono, na obwanchani bwa kera oyomo oino ase oyonde nigo bogendererete komentekana.

4Ase ayio, na intwe abanyene nigo togwetogia ase engencho yaino ase chikanisa chia Nyasae, ase engencho y’oboremereria bwaino, na okwegena more nakwo ase ogochandwa kwaino gwonsi, na emechando eye moremereretie.

5Eke nakio ekiorokererio, ng’a ekina kia Nyasae mboronge kere. Erio mobarwe koba abamwagweneire oboruoti bwa Nyasae, ekiagera ase engencho y’obwo mwachandirwe.

6Naki Nyasae ororire boronge kobaakana emechando baria bakobachanda inwe,

7na kobaa inwe abamwachandirwe ogotimokigwa amo naintwe. Aya nigo arakoreke ekero Omonene Yeso agocha koorokigwa korwa igoro amo nabamalaika b’okobua kwaye ase ekebemberi ki’omorero,

8na kobaakana egesiomba abwo batamomanyeti Nyasae, na bataigwereti enchili y’Omonene oito Yeso.

9Barabwo nabanyore egesusuro ki’ogosareka, naende nabaatananwe korwa ase obosio bw’Omonene kare na kare, na korwa ase obonene bw’okobua kwaye,

10ekero arache ase rituko riria, erinde atogigwe ase egati y’abachenu baye, na gokumigwa ase egati ya bonsi abamwegenire, ekiagera mwegenire oborori bwaito obo twabarenteire.

11Ase ayio, nigo tokobasabera botambe, erio Nyasae oito ababare ng’a mwagweneire okorangeria kwaye. Ere aikeranie kera okogania kw’obuya, na kera emeremo y’okwegena, ase okobua kwaye,

12erinde erieta ri’Omonene oito Yeso ritogigwe ime yaino, na inwe ime yaye, koreng’ana nobuya bwa Nyasae oito, na obw’Omonene Yeso Kristo.

Jump to: Chapter 2 →