2 Thessalonians 3

Gussi (EBIBILIA ENCHENU) 2020

← Chapter 2 Jump to:

1Omoerio, baminto, tosabere erinde ring’ana ri’Omonene rirande na gotogigwa buna riakorire ase egati yaino,

2ng’a totoorigwe korwa ase abanto batari abaronge, na abare ababe, ekiagera tai bonsi bare nokwegena.

3Korende Omonene nomwegenwa, nere orababeke chinguru na kobarenda korwa ase oria omobe.

4Ase Omonene ntore nogosemeria igoro yaino, ng’a ngokora more ayatwabachigete, naende mogenderere koyakora.

5Omonene atang’ane chinkoro chiaino, erinde momanye obwanchani bwa Nyasae, na oboremereria bwa Kristo.

6Bono baminto, twabachikire ase erieta ri’Omonene Yeso Kristo, mweatanane korwa ase oyomino oyore omworo, oyotabwateti chingencho echio mweorokereretie korwa asetore.

7Naki inwe abanyene momanyete buna ebagwenerete motwege; titwabete aboro ekero twarenge amo nainwe,

8gose titwariete endagera ya monto onde bwensi bosa, totaakaneti, korende nase obokong’u amo nogwechanda togakora emeremo obotuko na omobaso, erinde titoraarereria monto onde oino.

9Tari ng’a eyio tiyatotungetie, korende igo twekorete abanyene koba ekiorokererio ekiya asemore, erinde motwege.

10Ekiagera nonya nekero keria twarenge amo nainwe ntwabachigete ring’ana eri, ng’a onye omonto tarigeti gokora emeremo, taegwa endagera.

11Naki twaigure ng’a mbare abanto asemore bare aboro, batari gokora emeremo, korende nigo bakona‐gotuka amang’ana ’abanto bande.

12Nabo abanto banga buna abwo twabachikire na kobasorora ase Omonene Yeso Kristo, ng’a bakore emeremo ase obotoereru, na koria endagera yabo abanyene.

13Korende baminto, timorosa gokora amaya.

14Onye monto onde bwensi okwanga koigwera ring’ana eri tokwanete ase rirube eri, erusananie korwa ase omonto oyio, na timosanga nere; tiga arore obosooku.

15Timomobara buna omobisa, korende momokurere buna oyomino.

16Bono Omonene bw’omorembe omonyene abae omorembe ase chingaki chionsi, na ase chinchera chionsi. Omonene abe amo nainwe mwensi.

17Oko nogokwania kwane inche Paulo ase okoboko kwane omonyene. Eke nakio ekemanyerio ase kera rirube riane; naboigo nkorika.

18Obuya bw’Omonene oito Yeso Kristo bobe amo nainwe mwensi.

← Chapter 2 Jump to: