2 Timothy 2

Gussi (EBIBILIA ENCHENU) 2020

← Chapter 1 Jump to: Chapter 3 →

1Gaki, aye omwana one, obe ne chinguru ase obuya bore ime ase Kristo Yeso.

2Na ayakwaigwete korwa asende ase amasio ’abarori abange oyabeke ase abanto abegenwa, abaranyare kworokereria abande boigo.

3Nonya naye oremererie emechando buna omorwani omuya o Kristo Yeso.

4Morwani onde tari, oyokogenda ase esegi, orebeke ase amang’ana ande onsi ay’ense eye, erinde amogwenere ere oyomorigete.

5Omoamereria bwe chigosori takoegwa egutwa y’obobui ataamereraneti koreng’ana namachiko.

6Omoremi oyobwechandeire emeremo, ere nemogwenerete abe oyo bwe ritang’ani konyora ensemo y’okwama.

7Rengereria mono ayio ngokwana, ekiagera Omonene nakoe okomanya ase amang’ana onsi.

8Moinyore Yeso Kristo, oyobogete korwa ase abakure, oyo bw’ororeria rwa Daudi, koreng’ana nenchili eye nkorandia inche.

9Ase enchili eyio ngachandwa goika ngasibwa ne chingataare buna omokori amabe. Korende ring’ana ria Nyasae tirikobegeka chingataare.

10Ase ayio naremereirie onsi ase engencho y’abachore, erinde nabarabwo banyore ogotooreka kore ase Kristo Yeso amo nobonene bwa kare na kare.

11Ring’ana eri neri’ekeene: Onye twakwete amo nere, natobe moyo amo nere boigo.

12Onye tokoremereria, rirorio natogambe amo nere boigo; onye tokomokana, nere natokane boigo;

13onye titori abegenwa, ere nigo are omwegenwa, ekiagera takonyara gwekana ere omonyene.

14Obainyorie ayio, na kobakurera ase obosio bwa Nyasae, tibaba nokoamererania ase amang’ana, okwo gotanyare gokonya kende, korende nigo gokobasiria abagokoigwa.

15Kora buna oranyare kweorokia ase obosio bwa Nyasae buna oyobwancheirwe nere, buna omokori emeremo oyotagwenereti gosookigwa, ogwatanana boronge ring’ana ri’ekeene.

16Bweatanane korwa ase amang’ana atari ay’obonyasae, na atari nengencho. Naki ase ayio abanto nigo baragenderere komenteka ase chingencho chitari chi’obonyasae.

17Amang’ana abo nigo akoria buna rikwege ri’esiria. Ase abwo mbareo Himenayo na Fileto.

18Abwo basirerigwe korwa ase ekeene, bagoteba ng’a okobokigwa gwaikire kobao, na igo bakoonchorana okwegena kw’abanto bande.

19Korende oboroso obo Nyasae abegete bore ne chinguru, boteneine boronge, bore nekemanyererio eke: “Omonene namanyete abare abaye”, naende, “Kera oyogwatora erieta ri’Omonene, tiga eatanane korwa ase obobe.”

20Ase enyomba enene tibirio ebinto bie chitahabu na ebie chifeta bioka, korende mbireo ebinto bi’emete na ebi’amaroba boigo; ebinde nebi’ogosika, na ebinde tibiri ebi’ogosika.

21Ase ayio, onye omonto origetie gwesibia ere omonyene ase ogweatanana korwa ase ebinto buna ebio, nabe egento ki’ogosika, giancheirwe, keragwenere Omonene, kiaroisigwe ase kera emeremo emiya.

22Tama okogania okobe kw’obosae, rigia oboronge, na okwegena, na obwanchani, na omorembe, amo nabwo bakomorangeria Omonene ase chinkoro chindabu.

23Korende bwange amaborio ’oboriri atari aye chisemi. Kwamanyire ng’a ayio nigo ararente eriomana.

24Naende tegwenereti omosomba bw’Omonene koba omonyariomana, korende abe omwororo ase abanto bonsi, abe oyomanyete kworokereria buya, na abe omoremereria,

25oyorabatebererie ase obwororo abwo bakoamererania nere. Aande Nyasae nabaonchore, erinde bamanye ekeene gionsi,

26erio banyare gotaboboka na korua ase omoeto o Saitani kobasakoirwe nere goika bakore ogwancha kwaye.

← Chapter 1 Jump to: Chapter 3 →