2 Timothy 3

Gussi (EBIBILIA ENCHENU) 2020

← Chapter 2 Jump to: Chapter 4 →

1Gaki, manya ring’ana eri, ng’a ase amatuko ’omoerio inachibe chingaki chi’obokong’u.

2Naki abanto inababe bakweancha barabwo abanyene, abanchete chibesa, abetogia, abaenenu, abarami, abatari koigwera abaibori babo, abatari koiraneria ng’a mbuya mono, abatari abachenu,

3abatancheti abanto bande, abatarigeti kobwatana, abang’achi, abatari gwetanga ase rinde rionsi, abatindi, abagechete ayare amaya,

4abarua abande, abatancheti gokanigwa, abamwenu, abanchete kwegokia kobua komwancha Nyasae,

5abakororekana ng’a mbare ne chingencho chi’obonyasae, korende bakaana okobua gwe chingencho echio. Bweatanane korwa ase abwo.

6Naki ase egati yabo mbareo abagwesoyia ase chinyomba chi’abanto gosakora abakungu aboro, abare ne chigurube chi’ebibe, na koraagwa nokogania okobe gwe chingencho ao ao.

7Abwo nigo bakweorokereria botambe, korende tibakonyara goikera chisemi chi’ekeene.

8Naboigo buna Yane na Yambare baengereranetie na Musa, na aba nabo bakoengererania nekeene. Ebirengererio biabo biasarekire, na okwegena kwabo kwangirwe,

9korende tibakogenderera mono, ekiagera oboriri bwabo naboorokigwe maiso marore ase abanto bonsi, buna yabete ase baria babere.

10Korende aye kwabwatire okworokereria kwane, na orogendo rwane, na okorigia kwane ase obogima obo, na okwegena kwane, na oboremereria bwane, na obwanchani bwane, na okoganya kwane,

11na ogochandwa kwane, na ogochandeka kwane, okwo nanyorete ase Antiokia na Ikonio, na Listra. Nogochandwa kore naki naremereretie! Na korwa ase ayio onsi Omonene agantooria.

12Ekeene, aba bonsi baganetie koba ne chingencho chi’obonyasae ase Kristo Yeso nabachandwe.

13Korende abanto ababe na abang’ainereria mbamentekane kobua ase obobe, bakong’aina na kong’aineka.

14Korende aye, ogenderere ase ayakworokereretigwe na koyaenekia, gokomanya ng’a nkorwa ase ng’o kweorokereretie.

15Naki korwa obwana bwao nomanyete amariko amachenu, ayaranyare gokong’ainiyia goika onyore ogotooreka ase okwegena kore ase Kristo Yeso.

16Kera ririko riutire nomoika o Nyasae, nario riranyare gotworokereria, na gotokurera, na gotorongeyia, na gototang’ana ase oboronge,

17erinde omonto o Nyasae abe oikeranigwe, oisanerigwe, anyare gokora kera ogokora okuya.

← Chapter 2 Jump to: Chapter 4 →