Colossians 1

Gussi (EBIBILIA ENCHENU) 2020

Jump to: Chapter 2 →

1Inche Paulo, omotomwa o Kristo Yeso ase ogwancha kwa Nyasae, amo noyominto Timotheo,

2nkobarikera tore inwe abachenu na abegeni baminto ba Kristo abamomenyete Kolosai: Obuya bobe asemore na omorembe bikorwa ase Nyasae Tata oito.

3Botambe nigo togoakera Nyasae, Ise Omonene oito Yeso Kristo, ng’a mbuya mono, ekero tokobasabera inwe,

4ekiagera twaigure buna momwegenete Kristo Yeso, naende buna mwanchete abachenu bonsi,

5ase engencho y’ogosemeria okwo mwagacheirwe igoro. Igoro y’ogosemeria oko konya mwaigure ase ring’ana ri’ekeene ase enchili

6eye yaikire gocha asemore. Nabo yaikire ense yonsi, na kwama, na gokina, buna yakinire ase egati yaino inwe abanyene korwa rituko riria mwaigwete na komanya obuya bwa Nyasae ase ekeene.

7Naboigo mworokereretigwe n’Epafara, omosomba omogisangio oito omwanchwa, oyore omosomba omwegenwa ase Kristo ase engencho yaino.

8Ere nigo atworogetie obwanchani bwaino ase Omoika.

9Ase ayio, korwa rituko riria twaigwete amang’ana ayio, titwatigete kobasabera inwe. Igo twasabete ng’a moichorwe ne chisemi chi’ogwancha kwaye ase obong’aini bwonsi na okomanya gwonsi kw’omoika.

10Mogenderere buna ebagwenerete ase Omonene, momogwenere kegima, mwame okwama okuya ase emeremo emiya, momenteke ase okomomanya Nyasae.

11Na inwe mobekwe chinguru ase okobua gwonsi, koreng’ana ne chinguru chi’obonene bwaye ase okoganya na oboremereria bwonsi amo nomogoko,

12mokomoakera Tata ng’a mbuya mono, oyobaikeranetie mobe ababwatani b’omwando bw’abachenu ase omobaso.

13Nere otosiborete korwa ase okobua kw’omosunte na agatong’anyia na gotosoyia ase oboruoti bw’Omwana oye omwanchwa.

14Ime ase Omwana oria ntore nokoboorigwa na okwaberwa kw’ebibe.

15Ere nomogwekano o Nyasae oyotari kororekana, omoiborwa bwe ritang’ani bw’ebitongwa bionsi.

16Ime yaye ebinto bionsi bigatongwa, ebire igoro na ebire ase ense, ebikororekana na ebitakororekana, onye nebirogo bi’obogambi, gose amaruoti, gose abagambi, gose abare nokobua; ebinto, bionsi nigo biatongetwe goetera asare na ase engencho yaye.

17Ere nao arenge ritang’ani ri’ebinto bionsi, na ebinto bionsi biabwatanigwe ime asare.

18Ere nomotwe bw’omobere, engencho yaye ekanisa; naende ere nomochakano na omoiborwa bwe ritang’ani korwa ase abakure, erinde abe omotang’ani ase bonsi.

19Naki Nyasae agancha ng’a oboikeranu bwaye bwonsi bomenye ime asare.

20Goetera asare Nyasae agancha kobwatania ebinto bionsi amo nere omonyene, ebinto ebire ase ense na ebire igoro, gakorire omorembe ase amanyinga ayaitegete ase omosalaba oye.

21Na inwe agwo ritang’ani nigo mwarenge mwatananire korwa ase Nyasae, mwarenge nobobisa ase ebirengererio biaino ase ogokora kwaino okobe.

22Korende bono Nyasae obabwatanirie inwe amo nere omonyene ase ogokwa gwa Kristo kw’omobere oye bwe chinyama, erio abarente ase obosio bwaye, more abachenu, motari na komocha gose na bobe bonde,

23komoragenderere ase okwegena, mwabekirwe ase oboroso, naende mwakong’igwe, motaonchoiri na gotiga ogosemeria more nakwo ase enchili eye mwaigwete. Enchili eye konya yarandigwe ase ebitongwa bionsi ebire inse y’erioba, na inche Paulo nkabekwa nkaba omosomba oye.

24Bono nagokeire ogochandwa kwane inde nakorokwo ase engencho yaino; naende ase omobere one nkoyaikerania nde aria aremete ase ogochandwa gwa Kristo ase engencho y’omobere oye, engencho yaye ekanisa.

25Inche nabeire omosomba bw’ekanisa yaye ase oborendi obo naetwe na Nyasae ase engencho yaino ase okobaranderia inwe ring’ana rionsi ria Nyasae.

26Obobisi boria bwabisetwe korwa kare ase ebigori ebinge, korende bono bwaorokigwe ase abachenu baye.

27Nyasae agancha koorokia asebare obobisi boria bore obonene na obw’obonda ase egati y’abanto b’ebisaku. Obobisi boria nabwo obo, ng’a Kristo nigo are ime yaino, ayio naro ogosemeria kw’obonene.

28Ere nere twararirie, togokurera na kworokereria kera omonto ase obong’aini bwonsi, erinde tonyare korenta kera omonto omoikeranu ime ase Kristo.

29Ase engencho eyio inche nigo ngokora emeremo na ngokora omokia ase chinguru chiaye chinene, echigokora emeremo ime asende.

Jump to: Chapter 2 →