Colossians 2

Gussi (EBIBILIA ENCHENU) 2020

← Chapter 1 Jump to: Chapter 3 →

1Nigo nanchire ng’a momanye omokia one inde noro ase engencho yaino, na ase baria bare Laodikia na baria bonsi batarandora obosio bwane,

2erinde baremigwe ase chinkoro chiabo, kobarabwatanigwe ase obwanchani, banyore obonda bwonsi ase okomanya gwonsi gw’ekeene, banyare komanya obobisi bwa Nyasae engencho yaye Kristo.

3Ime asare chinibo chionsi chi’obong’aini na echie chisemi nao chibisire.

4Nigo ngokwana ring’ana eri, ng’a monto onde tacha kobang’aina ase amang’ana ’okoebereria.

5Naki nonya tindi nainwe ase omobere, nigo inde amo nainwe ase omoika. Nigo nkogoka ekero nkorora omoroberio oino omuya, na ogwetenenera gw’okwegena kwaino ase Kristo.

6Ase ayio, buna mwamonyorire Kristo Yeso Omonene, naboigo mogenderere asare,

7mwabeire nemeri na mwaagachirwe asare, mwakong’igwe ase okwegena buna mworokereretigwe, momenteke ase okoiraneria ng’a mbuya mono.

8Rigereria monto onde tabaisa kobakora abasakore ase chisemi chiaye chinene, na obong’ainereria bwa bosa koreng’ana ne chingencho chia mwanyabanto, na koreng’ana namorokererio aye ritang’ani ay’ense eye, gose tari buna aya Kristo.

9Naki ime yaye nao oboikeranu bwonsi bw’obonyasae bomenyete ase ekieni ki’omobere.

10Na inwe mwaikeranigwe ime yaye, ere oyore omotwe bw’abagambi na obwa bonsi abare nokobua.

11Asare boigo mwarokigwe okwaroka gotakoriri namaboko, ase okorusia okobua kw’ebibe ase omobere, engencho yaye okwaroka gokorwa ase Kristo,

12ekiagera mwatindegetwe amo nere ase ebatiso. Ase ero boigo mokabokigwa amo nere ase okwegena chinguru chia Nyasae oyomobogetie korwa ase abakure.

13Na inwe abamwarenge mokwete ase ogosaria kwaino na ase ogotaroka kw’emebere yaino, Nyasae akabakora koba moyo amo nere, gaikire kobaabera ogosaria gwonsi.

14Ere agatinyia ririko riria riarigetwe ase amachiko, riare gotosoera, eriarenge nobobisa asetore; akaritigeria ensemo, akariakerania ase omosalaba.

15Naboigo ekero aurire abagambi na abare nokobua ebirwanero biabo, akabasookia maiso marore, agachenga igoro asebare ase omosalaba.

16Ase ayio, monto onde tabagambia inwe ase engencho y’ebimokoria gose ebimokonywa, gose ase engencho ye Rituko Rinene, gose okooroka kw’omotienyi, gose Esabato.

17Amang’ana ayio nekiriri ki’amang’ana agochi‐gocha, korende omoikerania omonyene n’Kristo.

18Timoa monto onde ribaga ri’okobaura inwe ekeegwa kiaino ase okorigia kwaye ase okweororobia na ase ogosasima abamalaika, na kwebeka ase amaroro aya arorire, na koenena bosa ase ebirengererio biaye bi’obobe,

19na tabwataini nere oyore Omotwe. Korwa asere omobere bwonsi nigo ogokina ase ogokina gokorwa ase Nyasae, ase okonyora chinguru na kobwatanigwa ase chinengo na emeki.

20Gaki, onye mwakure amo na Kristo, mwatigire amorokererio aye ritang’ani ay’ense, nase ki rende mogendererete buna nab’ense more? Nase ki naende mokoigwera amachiko buna ayio:

21“Timokuna, Timoigwa, Timobwata”,

22koreng’ana buna mwanyabanto bakoyanyora ase amachiko na amorokererio abo? (Amang’ana ayio onsi nigo agosareka ekero agokorerwa.)

23Ayio nigo akororekana ng’a nay’obong’aini ase ogosasima na okweororobia na goaka omobere, korende taisaneti gento kende ase ogotanga okogania gwe chingencho chi’obobe.

← Chapter 1 Jump to: Chapter 3 →