Colossians 3

Gussi (EBIBILIA ENCHENU) 2020

← Chapter 2 Jump to: Chapter 4 →

1Gaki, onye mwabokire amo na Kristo, rigia ayare igoro aase Kristo aikaransete ensemo y’okoboko gw’okorio kwa Nyasae.

2Rengereria ayare igoro, gose tari ayare ase ense.

3Naki inwe mwakure, na obogima bwaino nigo bobisire amo na Kristo ase Nyasae.

4Ekero Kristo, oyore obogima bwaito, ararorekane, erio nario nainwe morarorekane amo nere ase obonene.

5Gaki moite ebiimo biaino ebire ase ense: obotomani, eubi, okorengereria okobe, okogania okobe, na obwegimeria, engencho yaye ogosasima emegwekano.

6Ase engencho y’ayio endamwamu ya Nyasae nebachere abanto b’ogotaigwera.

7Ase ayio nainwe nabo mware gotaara kare, ekero mwamenyete ase aro.

8Korende bono mobeke aare aya onsi: endamwamu, okobea, obobe, okorama, na ogokwana okobe gokorwa ase emenwa yaino.

9Timotebania oborimo, inwe abamwarusirie obomwanyabanto bwa kare amo nogokora kwaye,

10mwamweboyirie omonto omoyia, oyo okorirwe omoyia ase okomanya gwonsi ase omogwekano oye ere oyomotongete.

11Agwo takoba Omogiriki gose Omoyahudi, oyobwarogete gose oyotarogeti, oyotari Omogiriki gose oyore Omosikuti, omosomba gose omosibore, korende Kristo nere onsi, na ase bonsi.

12Gaki, ekiagera more abachore ba Nyasae, abachenu na abanchwa, mweboyie amabeebe, obuya, obokanyeku, obwororo, oboremereria.

13Bogorerania inwe ase inwe, na onye omonto ore ne ring’ana igoro ase omonto onde, mwaberane: buna Omonene abaaberete inwe, nainwe mwaberane bo.

14Kobua aya onsi, mweboyie obwanchani, nabwo egesibo gekobwatania kera egento ase oboikeranu bw’obuya.

15Tiga omorembe o Kristo ogambere chinkoro chiaino, noro mwarangererigwe ase omobere oyomo, na mobe abakoiraneria ng’a mbuya mono.

16Ring’ana ria Kristo rimenye ase obonge ime yaino, mobe mokworokererania na gotebererania ase obong’aini bwonsi, mogotera ase chizaburi, na amatera, ne chingero chi’omoika, ase ogoakera Nyasae ng’a mbuya mono ase chinkoro chiaino ime.

17Na kera eki mogokora, ase amang’ana gose ase ogokora, mokore kera egento ase erieta ri’Omonene Yeso, mokomoakera Nyasae Tata ng’a mbuya mono goetera asare.

18Inwe abakungu, moigwere abasacha baino, buna egwenerete ase Omonene.

19Na inwe abasacha, mwanche abakungu baino, timoba nobororo asebare.

20Na inwe abana, moigwere abaibori baino ase amang’ana onsi, ekiagera ring’ana eri nigo rikogwenera Omonene.

21Na inwe abaise, timochegia abana baino, babaise gokwa emioyo.

22Nainwe abasomba, moigwere abanene baino ase ense eye ase amang’ana onsi, tari obosomba bw’okwegwenia ase amaiso a mwanyabanto, gose kogwenera abanto, korende ase enkoro endonge, mokomoiroka Omonene.

23Rinde rionsi mogokora rikore ase enkoro y’omogoko, buna mogokorera Omonene, gose tari mwanyabanto,

24mokomanya ng’a namonyore omwando buna eng’eria korwa ase Omonene, ekiagera mogokorera Omonene Kristo.

25Naki oyorakore bobe, nigo araakanwe obobe bwaye obo akorire, na gwanchereria tikoiyo.

← Chapter 2 Jump to: Chapter 4 →