Ecclesiastes 11

Gussi (EBIBILIA ENCHENU) 2020

← Chapter 10 Jump to: Chapter 12 →

1Eteria endagera yao igoro ye chinyancha, na nyuma y’amatuko amange noyenyore.

2Atanana ebi obwate oe abanto batano na babere, gose batano na batato, ekiagera tomanyeti amabe agochia konyora ense.

3Amare gaichoire nembura, nigo embura eyio egotwa igoro ase ense, na omote koragwe ororie ensemo ya irianyi gose eya sugusu, nigo oragenderere kobeera inse agwo ase ogwete.

4Omonto okona‐korigereria komanya igoro y’embeo tagosimeka, na oyo okona‐korigereria amare buna are takogesa.

5Buna otamanyeti ase embeo ekogusa gochia, gose buna amauga ’omwana ore ase enda ya ng’ina agokina, naboigo tokonyara komanya emeremo ya Nyasae oyio ogokora amang’ana onsi.

6Busura embusuro yao mambia, nonya mogoroba totiga koyebusura, ekiagera tomanyeti eye erame, neye gose neria, gose nchionsi amo chirame buya.

7Omobaso nigo ore omwansu, na amaiso nigo akogokigwa korora erioba.

8Omonto karagenderere koba moyo ase engaki y’emiaka emenge, tiga agokere engaki eyio yonsi, korende goika ainyore ng’a amatuko ’omosunte nabe amange mono. Onsi aya agochi‐gocha nigo are bosa.

9Aye omosae, gokera engaki y’obosae bwao, tiga enkoro yao ekorentere omogoko ase amatuko ’obosae bwao; bwatia chinchera chi’okogania gw’enkoro yao, na aya amaiso ao akorora. Korende oinyore ng’a ase ayio onsi Nyasae nakorangerie ase ekina.

10Ase ayio tiga aya akogochanda arue ase enkoro yao, na aya akorenta obororo ase omobere oo arue boigo, ekiagera obosae na obuya bw’obogima nigo bore bosa.

← Chapter 10 Jump to: Chapter 12 →