Ecclesiastes 7

Gussi (EBIBILIA ENCHENU) 2020

← Chapter 6 Jump to: Chapter 8 →

1Erieta rigiya nigo ribuete amaguta amaya akweakwa, ne rituko ri’ogokwa nigo rire rigiya kobua eri’okoiborwa.

2Mbuya kogenda ase enyomba y’ebirero kobua kogenda ase enyomba y’omoyega bw’okwegokia, ekiagera oyio noro omoerio o kera omonto, na abare moyo mbabeke amang’ana aya ase chinkoro chiabo.

3Omoichano nigo ore omuya kobua amaseko, ekiagera omoichano okororekana ase obosio nigo ogokora enkoro yaba nomogoko.

4Chinkoro chi’abanto abang’aini nigo chikoba ase enyomba y’ebirero, korende chinkoro chi’abariri nigo chire ase enyomba y’okwegokia.

5Mbuya omonto gotegerera ogotogonyerwa kw’omonto omong’aini kobua gotegerera ogotera kw’abariri.

6Ogoseka kw’abariri nigo konga amagwa akoyia atoreka inse y’enyongo ere riko. Ayio boigo mbosa.

7Ekeene, emoko nigo ekoonchora omonto omong’aini oba omoriri, ne riaaki nigo rigosaria ebirengererio.

8Omoerio bw’egento nigo ore omuya kobua omochakano oye; na omonto omoremereria nigo are omuya koba omonto omoenenu.

9Tobaisa koba omwango ase okogechigwa, ekiagera okogechigwa nigo komenyete ase chinkoro chi’abariri.

10Tobaisa goteba, “Nase ki amatuko a kare arenge amaya kobua aya bono?” Okoboria okwo tikori okw’obong’aini.

11Obong’aini nigo bore obuya buna omwando, na nigo bogokonya abwo baroche erioba.

12Obong’aini nigo bogotokonya buna chibesa chigotokonya, korende obuya bw’omonyasemi mboria ng’a obong’aini nigo bokorenda obogima bw’oyio ong’ainiire.

13Rengereria emeremo ya Nyasae! Ning’o oranyare korongeyia egento Omonene akorire borogochi?

14Ekero amatuko ao are amaya kabe nomogoko, na ekero are amabe rengereria ng’a Nyasae nere okorire ayio onsi abere, erinde omonto tabaisa komanya erirache komobwatia korwa nyuma yaye.

15Ase obogima obo bwane obore bosa narorire kera egento; narorire omonto omonyaboronge ogosira ore ase oboronge bwaye, na omonyabibe okogenderera koba moyo amatuko amange ore ase ebibe biaye.

16Tobaisa koba omoronge goetania, gose koba omong’aini goetania. Nase ki okweita aye omonyene?

17Tobaisa koba omobe goetania, gose tobaisa koba omoriri. Nase ki oganetie gokwa engaki yao etaraika?

18Nigo ere buya ng’a obwate ring’ana eri erimo, na totiga neria kabere, ekiagera omonto omoirogete Nyasae namanye eki agokora ase kera ring’ana.

19Obong’aini nigo bogokora abare abang’aini koba ne chinguru chibuete echi’abagambi ikomi bare ase omochie oyomo.

20Ekeene, omonto tari aiga ase ense ore omoronge ogokora amaya otari gokora ebibe.

21Tobaisa gotegerera amang’ana onsi abanto bagokwana, nigo orabaise koigwa omosomba oo ogokoragereria.

22Aye omonyene nomanyete ase enkoro yao ng’a ase chingaki chinyinge kwabeire gokoragereria abanto bande.

23Aya onsi ngateema koyaenekia ase enchera y’obong’aini, ngateba, “Goika imbe nobong’aini.” Korende obong’aini obwo bokabeera aare korwa asende.

24Amang’ana aria nigo akare aare mono, naende akare aatambe gochia inse, aatambe mono, ning’o oranyare koyatuka?

25Erio ngachaka korengereria imanye, na gotuka, na korigia obong’aini, na komanya buna ebinto bionsi bire; naende nkagania komanya obobe bw’oboriri, na oboriri obore obobarimo.

26Erio nkanyora egento ekeroro kebuete amakweri. Egento ekio nakio omokungu enkoro yaye yarenge egesugunia na omoeto, naende amaboko aye are chingataare. Omonto ogogetie Nyasae tari kobwatwa nomokungu oyio, korende omonyabibe ere nigo akobwatwa.

27Omorandia nigo agoteba iga: Naama! Amang’ana ayio nkayamanya, ekero nabekeranetie ring’ana erimo ase erinde koyamanya onsi.

28Aya nabeire nkona‐koyairanerera korigia komanya buna are, korende tindayamanya. Ase abanto elifu eyemo nkanyora omosacha oyomo, korende ase abwo bonsi tinanyorete omokungu nonya noyomo.

29Naama! Egento gioka narigirie nanyorire neke: Nyasae nigo atongete mwanyabanto bare abaikeranu, korende barabwo batukire chinchera chinyinge chi’okobaisanekia.

← Chapter 6 Jump to: Chapter 8 →