Ecclesiastes 6

Gussi (EBIBILIA ENCHENU) 2020

← Chapter 5 Jump to: Chapter 7 →

1Mbore obobe narorie aiga inse y’erioba boritoerete mwanyabanto. Obobe obwo nabwo obo:

2Nyasae oeire omonto obotenenku, ne chinibo, na ogosikwa, na omonto oyio taremeiri gento kende ase ebio bionsi aganetie, korende Nyasae tamoeti okobua gw’okwegokia ase ebinto ebio; omonto omoao nigo akobiira bwegokia nabirobio. Ayio naro mbosa, naende nogwechanda okobe.

3Onye omonto oiboire abana rigana erimo, na abe moyo ase engaki y’emiaka emenge, ee, nonya amatuko ’obogima bwaye abeire amange, korende tegogetie ase ebinto ebiya bi’obogima obwo, na tatindekwa ase amasikani, nigo ngoteba ng’a omwana okwerete enda ya ng’ina nigo are buya kobua omonto oyio.

4Omwana oyio okwete nigo achete egento bosa, naende nigo akogenda gochia ase omosunte, na omosunte oyio otuba erieta riaye.

5Omwana oria taroche erioba, gose tamanyete gento kende, korende nonya naboigo nigo akonyora omotimoko kobua omonto oria,

6nonya omonto oria ogochia komenya emiaka chilifu ibere, korende tanyora omogoko ase obogima bwaye. Inee! Abwo bonsi babere tibakogenda aase amo?

7Emeremo yonsi omonto akwerosia gokora nokonyora egento akoria, korende nonya naboigo tari koigota.

8Mbuya ki omonto omong’aini abwate kobua oyore omoriri? Gose ninki omonto omotaka akonyora, oria omanyete buna akwerenda ase abare moyo?

9Eki amaiso aroche nigo kere buya kobua eki okogania ng’a okenyore. Ayio boigo mbosa, na okominyokia aya are buna embeo bosa.

10Gento kende gionsi kereo nigo kiarogetwe erieta korwa kare, naende nigo yamanyekanete eki omonto are gocha koba. Mwanyabanto takonyara koamererania noria ore ne chinguru komobua.

11Ogokwana okonge nigo gokorenta amang’ana amange are bosa. Inee! Ayio mbuya ki akorenta ase mwanyabanto?

12Ning’o omanyete egento kere ekiya ase omonto, ekero amenyete amatuko amake ase obogima bore bosa, agoeta buna omorengari? Ning’o oranyare gotebia omonto amang’ana arabe korwa nyuma yaye aiga inse y’erioba?

← Chapter 5 Jump to: Chapter 7 →