Galatians 2

Gussi (EBIBILIA ENCHENU) 2020

← Chapter 1 Jump to: Chapter 3 →

1Korende nyuma y’emiaka ikomi na ene ngatiira naende kogenda Yerusalemu amo na Barnaba, nkairana Tito agende amo nainche.

2Na inche ngatiira ekiagera namaanoreretwe; nkabatebia enchili eria nkorandia ase abanto b’Ebisaku (korende ase obobisi ase abwo basikire). Aande teba ng’a nigo nkominyoka bosa, gose nigo naminyogete bosa.

3Korende Tito oyorenge amo nainche, nonya orenge Omogiriki, tabetereretigwe kwarokigwa.

4Aya nigo aganetigwe nabaminto b’oborimo, abasoetigwe bobisi, banyare kounia obosibore bwaito tore nabwo ase Kristo Yeso, erinde batobeke ase obosibwa.

5Korende titwebegete inse asebare nonya nensa eyemo, erinde ekeene gi’enchili kegenderere amo nainwe.

6Korende abwo babarire ng’a nabanene bare (tari gento asende nonya barenge nobonene bore naki; Nyasae tari nogwanchereria ase mwanyabanto), nakwanire ng’a abwo babarire ng’a nabanene bare tibamentereti gento asende.

7Korende bakarora ekeene, ng’a inche negenirwe koranderia abatarogeti enchili, buna Petero egenetwe koyeranderia baria barogete.

8(Naki ere oyoete Petero chinguru koba omotomwa bw’abarogete, nere ong’ete inche chinguru koba omotomwa bw’abanto b’Ebisaku.)

9Naende ekero bachia komanya obuya boria naeirwe, Yakobo na Kefa, na Yohana, abasikire bare buna chisiiro, bagatoa inche na Barnaba okoboko gw’okorio gw’okobwatana, erinde intwe togende ase abanto b’Ebisaku, na barabwo bagende ase abanto b’okwaroka.

10Ring’ana erimo barigetie torikore nario eri, ng’a toinyore abataka, ne ring’ana erio nigo narenge nomokia korikora.

11Korende ekero Kefa achete Antiokia, nkaamererania nere obosio ase obosio, ekiagera konya oikire kogambigwa.

12Naki konya bataracha abanto baria barwete ase Yakobo, nigo arenge koragera amo nabanto b’Ebisaku; korende ekero bachete akairana nyuma, ageatanana, akairoka abarogete.

13Agwo amo nere Abayahudi bande bagakora obong’ainereria boria, erinde nonya Barnaba agasirigwa nobong’ainereria bwabo.

14Korende ekero nachia korora ng’a ogokora kwabo tikware okwa boronge ase ekeene gi’enchili, ngatebia Kefa ase amasio ’abanto bonsi, “Onye aye, oyore Omoyahudi, gokobwatia chingencho chi’abanto b’Ebisaku, gose tari echi’Abayahudi, naki rende oranyare kobetereria abanto b’Ebisaku babwatie chingencho chi’Abayahudi?”

15Intwe n’Abayahudi ase okoiborwa gwaito, gose tari abanyene ebibe b’Ebisaku,

16korende ntomanyete ng’a omonto takonyora oboronge ase ogokora kw’amachiko, korende ase okomwegena Kristo Yeso. Nonya nintwe twamwegenire Kristo Yeso, erinde tonyore oboronge ase okomwegena Kristo, tari ase ogokora kw’amachiko, ekiagera ase ogokora kw’amachiko onde tari ase mwanyabanto oranyare konyora oboronge.

17Korende onye intwe abanyene nigo twarenge korigia konyora oboronge ase Kristo, naende twanyoretwe tore abanyene ebibe, Inee, Kristo nabeire omosomba bw’ebibe? Yaya, taibo!

18Korende kondaagache naende aria natagorete, neorokirie inche omonyene ng’a nomomochi inde.

19Naki inche goetera ase amachiko nakwereire amachiko, erinde imbe moyo ase Nyasae.

20Nabambirwe amo na Kristo; gose bono tari inche inde moyo, korende Kristo nigo are moyo ime asende; na obogima inde naborobwo bono ase omobere, nigo inde naborobwo ase okomwegena Omwana o Nyasae, oyonyanchete, naende bweruete omonyene ase engencho yane.

21Tinkwanga obuya bwa Nyasae, ekiagera onye oboronge bokonyorekana ase amachiko, rirorio Kristo nigo akwete bosa.

← Chapter 1 Jump to: Chapter 3 →