Galatians 4

Gussi (EBIBILIA ENCHENU) 2020

← Chapter 3 Jump to: Chapter 5 →

1Korende nigo ngokwana ng’a omonyamwando, ekero are omwana, tari nogwatananeka nomosomba, nonya ore omonyene enibo yonsi.

2Ere nigo are inse y’abareri na abarendi goika engaki eria yachigetwe na ise eike.

3Nabo naintwe, ekero twarenge abana, nigo twarenge abasomba inse y’amorokererio aye ritang’ani ay’ense.

4Korende ekero engaki yaigete, Nyasae agatoma Omwana oye; ere akaiborwa nomokungu, akaiborerwa inse y’amachiko,

5erinde ababoorie baria barenge inse y’amachiko, erinde tonyare gokorwa koba abana baye.

6Ekiagera inwe more abana baye, Nyasae agatoma Omoika bw’Omwana oye ase chinkoro chiaito, okorera, “Abba!” Engencho yaye “Tata!”

7Ase igo, aye tori omosomba naende, korende Nyasae ogokorire koba omwana oye; na onye kwabeire omwana, naboigo kwabeire omonyamwando.

8Agwo ritang’ani, ekero motamomanyete Nyasae, inwe nigo mwarenge abasomba ase chinyasae chitare chinyasae bori.

9Korende bono, komwaikire komomanya Nyasae, gose kobua, mwamanyekanire na Nyasae, nase ki rende mokoiranera amorokererio aye ritang’ani, ayare amoro na amataka? Nase ki morigetie koyakorera naende?

10Nigo mokorenda mono amatuko, na emetienyi, na ebiro, na emiaka.

11Noboire ng’a nigo nerosirie bosa ase engencho yaino.

12Abaminto, nabasoroire, mobe buna inche inde, ekiagera inche nigo nabeire buna inwe. Timwankorerete bobe bonde.

13Inwe mwamanyire ng’a inabaranderetie enchili ritang’ani ase engencho y’oboreu bw’omobere one.

14Nonya oboreu boria bwarenge ogoteemwa asemore timwanchayete gose timwanyangete, korende mokandoisia buna omomalaika o Nyasae ee, buna Kristo Yeso omonyene.

15Ng’ai rende omogoko oino ore? Naki nababereire kirori, ng’a onye yanyarekana, anga mwanduseria amaiso aino mong’e.

16Inee! Nabeire omobisa oino, ekiagera nabatebirie ayare ay’ekeene?

17Baria bande mbare nomokia asemore, korende tari ase enchera ere engiya; mbarigetie kobasie kera isiko, erinde monyare gokora omokia kobakorera.

18Korende mbuya botambe korigia omokia ase ring’ana rire rigiya, na tari ekero inde amo nainwe rioka.

19Abana baane abake, ninde nokoromwa gw’okobina gw’okobaibora naende, goika Kristo arorekane ime yaino.

20Ee, anga nancha koba amo nainwe bono, na koonchora eriogi riane, ekiagera timanyeti inki ngokora asemore.

21Ntebia, inwe abamorigetie koba inse y’amachiko, Inee, timori koigwera amachiko?

22Naki nerikire, ng’a Ibrahimu nigo arenge nabana babere abamura, oyomo bw’omokungu omosomba, na oyomo bw’omokungu omonyuome, oyotarenge omosomba.

23Korende omwana oria bw’omokungu omosomba akaiborwa buna monto onde bwensi; na oria bw’omokungu omonyuome, oyotarenge omosomba, akaiborwa ase eira.

24Amang’ana ayio nigo agokwanwa buna omoreng’anio. Abakungu aba nabwo amabwatano abere. Okomo nigo gokorwa egetunwa Sinai, gokoibora abana ase obosomba; nere Hagari.

25Naki Hagari, engencho yaye egetunwa Sinai ekere Arabia, kegwekanirie na Yerusalemu ya bono, ekiagera nigo are ase obosomba amo nabana baye.

26Korende Yerusalemu ya igoro nomochie omosibore, noro baba oito.

27Naki nerikire, “Aye ore omogomba, otari koibora, goka! Aye otari nokobina ase okoibora, aka eriogi, orere nomogoko, ekiagera abana baye oria otigetwe nigo bare abange kobua abaye oyore nomosacha.”

28Gaki baminto, inwe nigo more abana b’eira buna Isaka.

29Korende buna ase ekero keria oria oiboretwe koreng’ana buna onde bwensi nigo amochandete oria oiboretwe ase engencho y’Omoika, naboigo nonya ngoika bono.

30Korende amariko naki agoteba? Igo agoteba, “Seria omosomba oria amo nomwana oye, ekiagera omwana bw’omokungu omosomba takonyora omwando nonya ng’ake amo nomwana bw’omokungu omonyuome, oyotarenge omosomba.”

31Naboigo baminto, intwe titori abana b’omokungu omosomba, korende nabana b’omokungu omonyuome, oyotarenge omosomba.

← Chapter 3 Jump to: Chapter 5 →