Jonah 1

Gussi (EBIBILIA ENCHENU) 2020

Jump to: Chapter 2 →

1Ring’ana ri’Omonene rigacha ase Yona mosinto bw’Amitai, rikamotebia:

2“Imoka ogende Nineva, omochie oria omonene, oake eriogi ri’okoyokurera, ekiagera ogokora kwaye okobe gwaikire ase obosio bwane.”

3Korende Yona akaimoka, agatama gochia Tarisisi ng’a arue ase obosio bw’Omonene. Agatirimboka gochia Yopa, na agwo akanyora emeeri ekogenda Tarisisi. Erio agaakana chibesa chi’orogendo, agasoa ime, akagenda amo nabanto bande gotama gochia Tarisisi ng’a arue ase obosio bw’Omonene.

4Korende Omonene akagusia omwaga omonene mono igoro ase enyancha, na ekembugu‐mbugu gie chinguru kegacha ase enyancha, na emeeri ekaba ang’e kobuneka.

5Erio abagendia b’emeeri bakaondoka, na kera oyomo akarangeria enyasae yaye ng’a emokonye. Abanto abwo bakaimokia chigurube chiarenge ase emeeri ime, bagachituguta gochia ase enyancha ime, ng’a nario emeeri eragusue. Bono Yona ere konya otirimbokire gochia nyaro ime y’emeeri, na aroro nigo araire chitoro chinene mono.

6Omochiki bw’emeeri akagenda asare akamoboria, “Naki oraire chitoro iga okirete‐kiri? Imoka orangerie Nyasae oo! Ande Nyasae oyio nabo arabaise gotorengereria atokonye titosira.”

7Abanto baria bagatebania, “Tiga toake obomera tomanye gose ning’o ogerire amabe aya atocheire.” Erio bagaaka obomera, na obomera obwo bokagwera Yona.

8Ase ayio abanto baria bakamoboria, “Totebie gose ning’o ogerire amabe aya atonyorire. Meremo ki ogokora aye? Ng’ai kwarure? Ense yao nereri? Ngesaku ki ore?”

9Ere akabairaneria, “Inche n’Omoibirania inde, na nigo inyirogete Omonene, Nyasae o igoro, oyo otongete enyancha na ense enyomo.”

10Erio abanto baria bakairoka mono, bakamoboria, “Mang’ana ki aya gwakorire?” Abanto baria nigo bamanyete ng’a Yona nigo arenge gotama korwa ase obosio bw’Omonene, ekiagera konya obatebirie amang’ana ayio.

11Erio abanto baria bakamoboria, “Ngento ki tokogokorera, erinde enyancha etotoerere?” Ekembugu‐mbugu keria nigo kiagendererete kona‐koburukania enyancha mono goetania.

12Ere akabairaneria, akabatebia, “Inyimokie, mondute ase enyancha ime; ero netoerere asemore, ekiagera namanyire ng’a ninche nagerire ekembugu‐mbugu kiabacheire.”

13Nonya naboigo abanto baria bagateema ne chinguru gosukia emeeri eria gochia ase engegu, korende tibanyarete, ekiagera ekembugu‐mbugu keria nigo kiagendererete koburukania enyancha mono goetania.

14Ase ayio abanto baria bakarera ase Omonene, bagateba, “Aye Omonene, twagosoroire, tototiga tosire ase engencho y’obogima bw’omonto oyo. Tobaisa gotobarera okomocha kw’ogokwa kw’omonto otari na komocha, ekiagera aye Omonene gwakorire buna bwanchete.”

15Erio bakaimokia Yona, bakamoruta ase enyancha ime; ero ekaba nobotoereru.

16Erio agwo abanto baria bakairoka Omonene mono, bakamoruera ekeng’wanso na komoriera chiira.

17Bono Omonene agachika enswe enene ekamera Yona, na Yona akabeera ime ase enda y’enswe eria amatuko atato, omobaso na obotuko.

Jump to: Chapter 2 →