Jonah 4

Gussi (EBIBILIA ENCHENU) 2020

← Chapter 3 Jump to:

1Yona akagechigwa namang’ana ayio, akaba nendamwamu.

2Erio agasaba Omonene, agateba, “Aye Omonene, Inee, amang’ana aya tari aro natebete ekero narenge ase ense yane? Naende nakio kiagerete ngatama gochia Tarisisi, ekiagera nigo namanyete ng’a aye nigo ore Nyasae oichire nobuya na amabera; tori omwango bw’okoba nendamwamu, na obwanchani bwao obonene nigo bogendererete botambe, naende nigo okoonchora ebirengererio biao, tokobakorera amabe.

3Ase ayio, aye Omonene, bono nagosoroire ng’a orusieo obogima bwane ontige inkwe, ekiagera nigo ere buya asende gokwa kobua kogenderera koba moyo.”

4Erio Omonene akamoboria, “Inee! Igo mboronge ogokora ase okogechigwa igo?”

5Bono Yona agasoka korwa ase omochie oria, agaikaransa ase ensemo ya moocha y’omochie. Agwo akeagachera ekegutu, agaikaransa imeo gokenderera koganya arore ayare gochia gokorekana ase omochie oria.

6Erio Omonene Nyasae akameria omobono ogakina, na Yona agakenderera inse yaye, agatimoka korwa ase okorosa kwaye. Ase ayio akagokigwa mono nomobono oria.

7Korende rituko ria kabere mambia, Nyasae agachika rikonde rikaria omobono oria, erinde ogasusana.

8Ekero erioba riatiirire gocha igoro, Nyasae akarenta omwaga okagusa korwa moocha orenge nomobaso omororo se, na omobaso oria ogasamba Yona bobe ase omotwe goika akagireka. Erio akagania akwe, agateba, “Nigo ere buya asende gokwa kobua kogenderera koba moyo.”

9Korende Nyasae akaboria Yona, “Inee! Mboronge igo aye okogechigwa ase engencho y’omobono oyio?” Yona akairaneria, akamotebia, “Ee, nigo inde noboronge kogechigwa, nonya ngoika ogokwa.”

10Omonene akamotebia, “Aye kwaroreire omobono oyo amabera, nonya tikwaywechanderete ase ogokora emeremo asoro, gose ase okoyokinia; nigo omerete ase obotuko obomo, naende ogasira ase obotuko obomo.

11Inee! Inche tingwenereti koba namabeebe ase Nineva, omochie oyio omonene, agwo ase abanto goetania chilifu rigana erimo na emerongo ebere (120,000) bamenyeteo? Abanto abwo tibamanyete gwatanana ayare ensemo ya borio na ayare ase eya bomosi. Boigo omochie oyio nobwate ching’iti chinyinge mono chitugireo.”

← Chapter 3 Jump to: