Ruth 2

Gussi (EBIBILIA ENCHENU) 2020

← Chapter 1 Jump to: Chapter 3 →

1Naomi nabwate omoam ate oyomo ore korokwa Boazi, omonto bw’eamate y’Elimeleki, omosacha oye. Ere nigo arenge omonto omonene, naende omonda.

2Rutu, oria Omomoabu, agatebia Naomi, “Ntige ngende gochora ebigara ebitigari ase omogondo bw’omonto orang’e ribaga nkore bo.” Naomi akamoiraneria, “Genda, mwana one!”

3Ase igo Rutu akagenda ase omogondo gete, akaba ogochora ebigara ebitigari korwa nyuma y’abagesi. Na bono agatoka ng’a omogondo oyio nigo orenge o Boazi, omonto oria bw’eamate y’Elimeleki.

4Erio agwo Boazi agacha aroro korwa Bethlehemu, agakwania abagesi, ogoteba, “Omonene abe amo nainwe!” Nabarabwo bakairaneria, “Omonene agosesenie!”

5Boazi akaboria omoteneneri bw’abagesi baye, “Inee! Omosubati oyo, noyo ng’o?”

6Omoteneneri oyio akamoiraneria, “Oyo nomosubati bw’Abamoabu, oria ochicha na Naomi korwa ase ense yabo.

7Nigo aboria ribaga ri’ogochora ebigara ebitigari korwa nyuma y’abagesi, na korwa mambia goika bono nigo agendererete gochora ebigara, taratimoka rinde otatiga bono ase engaki ensinini akendererete ase ekegutu keria.”

8Erio Boazi agakwana na Rutu, akamotebia, “Mwana one, ntegerera! Tobaisa kogenda gochora ebigara ebitigari ase omogondo omoao; obeere aa oka, obe gokobwatia abaiseke aba.

9Origererie orore ase bakogesa obabwatie korwa nyuma! Nakanirie abanto baane tibakogochanda. Gokorang’a, ogende ase chinsiongo echio baichoirie amache, otaae onywe!”

10Rutu agatung’ama inse akaumama, akaboria Boazi, “Naki gwakora kwanyechandera na gonkorera buya iga, na inche nomomenyi inde aa?”

11Boazi akamoiraneria, “Natebigwe amang’ana onsi gwakoreire nyoko biara korwa ekero omosacha oye akwete. Namanyire buna gwatigire iso na nyoko, na ense yao kwaiboreretwe, ogacha komenya nabanto otamanyete agwo ritang’ani.

12Omonene agoakane ase aya gwakorire; ee, Omonene, Nyasae bw’Abaisraeli, oyo gwatameire, erinde orendwe inse ye chimbaba chiaye akoe eng’eria eng’ikeranu.”

13Rutu akamoiraneria, “Omonene one, kwabeire omuya mono asende, kwandemirie ase ogokwana nobwororo nainche, omosomba oo, nonya tindi oyomo bw’abasomba bao abaiseke.”

14Ekero abanto bachete koragera, Boazi agatebia Rutu, “Inchuo aa, orie omogati otongerie ase omosori ore nedivai.” Naboigo Rutu agaikaransa amo nabagesi baria, na Boazi akamoa ebigara bisambire. Rutu akaria, akaigota, naende eyende egatigara.

15Na ekero Rutu agendete gochora ebigara naende, Boazi agachika abasomba baye, akabatebia, “Momotige achore ebigara nonya nase egati y’emesaima, timomokania.

16Naende momoruserie ebigara korwa ase emesaima, momotigere abichore, timobaisa komotanga.”

17Igo Rutu akagenderera gochora ebigara ase omogondo oria goika mogoroba, na ekero abibungete akanyora ng’a biaisanire ebitonga bibere.

18Erio agetweka ebitonga biria, akairana omochie, akorokia ng’ina biara eyio achorete. Naende akamoa endagera eria yatigarete ekero ariete akaigota.

19Naomi akamoboria, “Ng’ai kware gochora ebigara rero? Nase omogondo o ng’o kware gokora emeremo? Nyasae asesenie omonto oyio ogwechandera kogokonya!” Rutu agatebia Naomi ng’a nigo arenge gokora emeremo ase omogondo bw’omonto ore korokwa Boazi.

20Naomi agatebia Rutu, moka momura oye, “Boazi oyio tiga asesenigwe n’Omonene, oyo ogoikerania chiira chiaye ase abwo bare moyo, na ase abwo bakure.” Naende agateba, “Omonto oyio nomonyamwando ominto, oyomo bw’abagwenerete gotorenda.”

21Naende Rutu, Omomoabu oria, akamotebia, “Amo nayio ere nigo antebia ng’a mbeere amo nabasomba baye goika bakoore rigesa riaye rionsi.”

22Erio Naomi agetebia Rutu, “Ee, omwana one, mbuya mono kobua asore okore emeremo nabaiseke abwo bakomokorera Boazi. Oise kogenda ase omogondo bw’omonto omoao, abanto bare aroro mbabaise kogokorera bobe.”

23Ase ayio Rutu agakora emeremo amo nabaiseke baria, akaba ogochora ebigara goika bagakoora rigesa ri’esairi na eri’engano. Korende akagenderera komenya amo na ng’ina biara.

← Chapter 1 Jump to: Chapter 3 →