Ruth 4

Gussi (EBIBILIA ENCHENU) 2020

← Chapter 3 Jump to:

1Boazi akagenda agaikaransa ase etureti agwo ase egeita ki’omochie. Ekaba ng’a omonto oria omonyamwando bw’Elimeleki ore ang’e kobua Boazi, oria Boazi akwanete igoro yaye, ngoeta arenge. Boazi akamorangeria, akamotebia, “Oyominto, gobera gocha aa, oikaranse!” Omonto oria akagobera, agaikaransa.

2Naende Boazi akarangeria abagaaka ikomi b’omochie baikaranse aroro. Ase igo bagaikaransa.

3Erio Boazi agatebia omonyamwando oria, “Naomi, oria oirana korwa ense y’Abamoabu, nkoonia are oboremo boria bwarenge omwando bw’Elimeleki ominto.

4Inche nigo narengereretie gokomanyia amang’ana aya. Bono nonyare kobogora aiga ase amasio ’abagaaka aba, na ase aba bonsi baikaransete igaa. Onye kogwancha kobogora, bogore, korende onye taibo, ntebie imanye, ekiagera naye ore omonyamwando ore ang’e, na nyuma yao ninche.” Omonto oria akairaneria, “Ee, nimbogore.”

5Erio Boazi akamotebia, “Korende onye gokogora oboremo korwa ase Naomi, rirorio oire Rutu, Omomoabu oria, moka oria okwete, abe mokao, naye omotenenerie oria okwete egesaku kerarie omwando oye.”

6Omonyamwando oria akairaneria, akabora, “Onye naboigo, tinkobogora, mbaise gosiria omwando one. Ribaga riane ri’okobogora, aye riire; tinkonyara kobogora.”

7Ase amatuko a kare ase Abaisraeli, ekero enibo yare koboorigwa, gose koonchorerigwa, engencho yabo nigo yarenge ng’a oyomo bw’abwo nigo arenge gosomora egekoroto kiaye ekemo omoa oria onde. Ayio nigo are kogera aria agambwa takoonchoranwa, na ogokora okwo kwaba kirori.

8Ase igo omonyamwando oria agatebia Boazi, “Aye bogore”, na akamosomorera egekoroto kiaye.

9Erio Boazi agatebia abagaaka baria na abanto bonsi abarengeo, “Inwe mbirori more rero ng’a nagorire korwa ase amaboko a Naomi bionsi ebiarenge ebi’Elimeleki, na ebia Kilioni amo nebia Mahaloni.

10Amo nayio Rutu, Omomoabu oria, oyorenge moka Mahaloni, namoirire abe mokane, erinde inyare goteneneria oria okwete egesaku kerarie omwando oye, nario ororeria rwaye rotasire ase abamwabo, gose ase abanto b’omochie oye. Ase amang’ana aya mbirori more rero.”

11Abagaaka baria na abanto bande bonsi abarenge ase etureti agwo ase egeita ki’omochie bakairaneria, “Ee, mbirori tore. Tiga Omonene asesenie omokungu oyio orache ase enka yao abe buna Raeli na Lea, abwo baiborerete Israeli abana abange bakaba egesaku. Aye osesenigwe ase egati y’Abaefarati na omanyekane ase Bethlehemu.

12Naende enka yao ebe buna eya Peresi, oria Tamari aiborerete Yuda, goetera ase oroiboro roria Omonene arakoe korwa ase omokungu oyio.”

13Ase igo Boazi akaira Rutu, na ere akaba mokaye. Erio bakamenyana, na Omonene aganchera Rutu koba morito, na ere akaibora omwana omoisia.

14Erio abakungu b’omochie oyio bagatebia Naomi, “Omonene atogigwe! Ere tagotigeti; rero okoeire omonyamwando, oyio erieta riaye riramanyekane ase egati y’Abaisraeli!

15Nere oragotimokie, abe chinguru chiao abe ogokorageria ase obogotu bwao. Moka momura oo nigo agwanchete; ere ogokoreire amaya kobua abamura batano na babere, na bono oiboire omwana oyio.”

16Naomi akaimokia omwana oria, akamoagata, akaba okomorera.

17Abakungu abarenge abagisangio baye bakabora, “Naomi oiboreirwe omwana omochokoro omomura”, bakamoroka Obedi. Obedi oyio nere oiborete Yese, na Yese akaibora Daudi.

18Abanto aba nabwo ororeria rwa Peresi: Peresi akaibora Hezironi;

19Hezironi akaibora Ramu, na Ramu akaibora Aminadabu;

20Aminadabu akaibora Nahesoni, na Nahesoni akaibora Salimoni;

21Salimoni akaibora Boazi, na Boazi akaibora Obedi;

22Obedi akaibora Yese, na Yese akaibora Daudi.

← Chapter 3 Jump to: