Ruth 3

Gussi (EBIBILIA ENCHENU) 2020

← Chapter 2 Jump to: Chapter 4 →

1Rituko erimo Naomi agatebia Rutu, moka momura oye, “Narorire ng’a mbuya nkonyorere omosacha, erinde onyore enka yao.

2Nomanyete ng’a Boazi, oria ase konya ogokora emeremo nabasomba baye, nigo are omonyamwando ominto? Naama! Ase omogoroba o rero nache abe okoora esairi ase ekeooreri kiaye.

3Ase ayio esibie, bweake amaguta agotioka buya, obeke chianga chiao chingiya. Erio otirimboke gochia ase ekeooreri, korende tobaisa kweorokia ase omonto oria goika ekero akoorire koragera na konywa.

4Ekero ararire, origererie omanye aase aria. Erio ogende aroro, otubore ekiebisio kiaye korwa ase amagoro aye maate, orareo nere nagotebie aya ogwenerete gokora.”

5Rutu akairaneria, “Aya onsi gwantebia ninyakore.”

6Ase igo Rutu agatirimboka gochia ase ekeooreri, agakora buna ng’ina biara konya amotebirie.

7Boazi kariire na konywa akaigwa buya, akagenda ang’e netui y’esairi, akarara aroro. Erio Rutu agachoba ng’ora‐ng’ora, agatubora ekiebisio korwa ase amagoro a Boazi, akarara aroro.

8Na kobwabeire botuko gati, Boazi agataboboka. Ani! Omokungu naraire magoro aye maate.

9Boazi akamoboria, “Naye ng’o?” Ere akamoiraneria, “Ninche Rutu omosomba oo, nachire ontuge, ekiagera nigo ore omonyamwando o tata biara.”

10Erio Boazi akamotebia, “Mwana one, Omonene agosesenie. Aye bono kworokirie obwegenwa kobua obwo kworogetie ritang’ani ase nyoko biara. Tikware korigia abamura bande, abataka gose abanda.

11Ase ayio, mwana one, toiroka, ekiagera abanto bonsi ase omochie oyo nigo bamanyete ng’a aye nomokungu omweriti. Ningokorere ande onsi oraganie.

12Nabo nekeene ng’a inche nomonyamwando o iso biara inde, korende nare omonyamwando onde omoao ore ang’e kombua.

13Bono beera aa ase obotuko obo goika mambia, torore gose omonyamwando oria onde ore ang’e kombua nanche gokorenda. Karakore igo mbuya. Onye tagwancha, rirorio ekeene, buna Omonene are moyo, inche ninkorende. Bono rara aiga goika mambia.”

14Ase igo omokungu oria akarara ase amagoro aye maate goika mambia, korende mambia chuni botarakiamoka akaimoka kogenda, erinde monto onde tamorora, ekiagera Boazi tatagete monto onde amanye ng’a omokungu oria nachete ase ekeooreri kiaye.

15Naende Boazi akamotebia, “Renta egetambaa ekio bwambarete, okiaare.” Na Rutu agakiaara. Erio Boazi akamorengera esairi eisaine ebitita bitano na ekemo, akamoyetweka. Erio omokungu oria akairana gochia ase omochie.

16Ekero Rutu aigete ase ng’ina biara, ere akamoboria, “Mang’ana ki, omwana one?” Rutu akamotebia amang’ana onsi Boazi amokorerete.

17Naende agateba, “Boazi nigo antebia ng’a tinkonyara koirana gocha asore namaboko amasa. Ase igo ong’a esairi eye ebitita bitano na ekemo.”

18Naomi akamotebia, “Bono omwana one, remereria oganye goika orore aya arabe asore. Boazi tagokira rero goika arore ng’a oroisirie amang’ana ao.”

← Chapter 2 Jump to: Chapter 4 →