Song of Solomon 2

Gussi (EBIBILIA ENCHENU) 2020

← Chapter 1 Jump to: Chapter 3 →

1Inche nigo inga egesicha gia Saroni gekorokwa rosi, naende egesicha ekiya kie rikura.

2Ee, koreng’ana buna egesicha ekiya kere ase egati y’amagwa, naboigo omwanchi one are ase egati y’abaiseke.

3Koreng’ana buna omote bw’amapera osimekire ase egati y’emete y’orosana, naboigo omwanchi one are ase egati y’abamura. Nigo naikaransete ase ekiriri kiaye inde nomogoko, na amatunda aye akanyansera.

4Ere akang’ira ase enyomba y’omoyega, na obwanchani bwaye nigo bore buna ebendera igoro yane.

5Ong’e amasabibu amomo indie imbe nobogima oboyia, ong’e na amapera imbe ne chinguru, ekiagera amaiga ’obwanchani anyarire.

6Okoboko kwaye kwa bomosi nigo kore inse y’omotwe one, na okwa borio nigo komboanetie.

7Inwe abakungu ba Yerusalemu, nigo nkobasorora, nkobatiania ase chingabi ne chinsune chi’orosana ng’a timobaisa gotabobora obwanchani, gose koboichania, goika bobe bwancheranire obonyene.

8Tegerera moigwe eriogi ri’omwanchi one! Rora oyio ogocha! Nigo agocharoka‐charoka igoro ase ebitunwa, na gocharara ase ebigoro.

9Omwanchi one nigo anga engabi gose ensune ensae. Rora, bono nigo ateneine magega y’enyasi y’enyomba yaito. Origereretie gocha ime goetera ase chitirisa, goetera ase ekebao kiabekire ebitange.

10Omwanchi ngokwana are na gontebia: “Aye omwanchi one, nigo ore omuya, imoka, inchuo togende,

11ekiagera bono engaki y’obokendu yaerire, boigo engaki y’embura yaerire.

12Ebisicha biasichire ase ense, engaki y’amatera yaikire, ee, eriogi ri’amatera ’amaruma riaigurwe ase ense yaito.

13Emeko yachakire kwama amako, na emesabibu yachakire gosicha, nigo egotioka rimisu rigiya. Aye omosani one omuya, imoka togende!

14Aye riruma riane ore ase omwenya bw’egetare, agwo ase obwebiso bw’egetare, tiga indore obosio bwao, naende inyigwe eriogi riao, ekiagera eriogi riao neriansu, na obosio bwao noboseera.

15“Tobwatere ebibwe, ebibwe biria ebike, ebio bigosaria emegondo y’emesabibu, korwa ekero emesabibu yaito yasichete.”

16Inche nigo inde oyo bw’omwanchi one, nere noyone; nigo akorisia riicho riaye ase egati y’ebisicha ebiya.

17Ekero rigochia kogoroba na emerengari egochia gosira, aye omwanchi one, onchoka gocha asende, ominyoke buna engabi, gose buna ensune ensae igoro ase egetunwa kere chinchwara.

← Chapter 1 Jump to: Chapter 3 →