Song of Solomon 3

Gussi (EBIBILIA ENCHENU) 2020

← Chapter 2 Jump to: Chapter 4 →

1Botuko ekero naraire borere bwane, nkamorigia oria omoyo one bwanchete, nkamorigia, korende tinamonyora.

2“Bono nigo nkoimoka ngende ase omochie, ng’ete ase chinchera chiaye na ase ebiooreri biaye, ndigie omwanchi bw’omoyo one.” Nkamorigia, korende tinamonyora.

3Ekero abarendi barenge goetanana omochie koyorata, bakanyora inche, na inche nkababoria, “Mwarora omwanchi bw’omoyo one?”

4Ase obwango obwo naruete ase abarendi abwo, nkanyora omwanchi bw’omoyo one. Nkamotarera tinamotiga agende; nigo namorentete mwa baba, nkamosoyia gochia ase eero y’oyio onyiborete.

5Inwe abakungu ba Yerusalemu, nigo nkobasorora, nkobatiania ase chingabi na ase chinsune chi’orosana ng’a timobaisa gotabobora obwa’nchani gose koboichania, goika bobe bwancheranire obonyene.

6Ning’o oria ogocha korwa ase erooro onga buna rikundesi ri’erioki? Nigo eagete amaguta a manemane na ubani, na ebinto bisiire bigotioka buya.

7Rora aaria, ekerogo gi’okobogoreria Sulemani, geetananire nabanto emerongo etano nomo, abare chituoni chi’Abaisraeli.

8Abwo bonsi nigo beboeranetie emeyio ya birende, na nigo bare abanto bamanyete korwana esegi. Kera oyomo nigo eboeranetie omoyio kenema, orendete ase okogoswa kwa botuko.

9Omoruoti Sulemani nigo eroiseretie ekerogo keria korwa ase emete ya Lebanoni.

10Amatenenerio aye nigo aroiseirie chifeta, na ekiegeko kiaye nigo kiaroiseirie chitahabu; egeikaransero kiaye nigo giatubire negetambaa kemonyinga. Abakungu ba Yerusalemu nigo bagechaberete ime, bare nomoyo bw’ogwancha.

11Inwe abakungu ba Sayoni, inchuo morore Sulemani omoruoti obegete ekiore keria ng’ina amobekerete ase rituko riria Sulemani akoreretwe enyangi, rituko riria ri’omogoko bw’enkoro yaye.

← Chapter 2 Jump to: Chapter 4 →