Titus 1

Gussi (EBIBILIA ENCHENU) 2020

Jump to: Chapter 2 →

1Inche Paulo nomosomba o Nyasae, na omotomwa o Yeso Kristo ase engencho y’okwegena kw’abachore ba Nyasae, erinde bamanye onsi ayare ay’ekeene, ayakorenta chingencho chi’obonyasae,

2ase ogosemeria kw’obogima bwa kare na kare. Obogima obo Nyasae ariete eira korwa kare na kare; ere tagokwana oborimo.

3Na ekero engaki yaye yaigete akabomaanora ase ring’ana riaye, eri inche negenirwe korandia ase ogochika kwa Nyasae, Omotooria oito.

4Ngokorikera nde aye Tito, omwana one bori ase okwegena tosangete naye: Obuya na omorembe bikorwa ase Nyasae Tata, na ase Kristo Yeso, Omotooria oito.

5Ase engencho eye nkagotiga Kirete, erinde oroisie ayaremeteo. Ochore abagaaka ase kera omochie, buna nagochigete.

6Omonto orachorwe onye okonyorekana ng’a tari ne chingencho chimbe, onye ore nomokungu oyomo, na ore nabana begenete, batari gosoerwa ng’a nabanyaka bare, gose abatari koigwera.

7Naki omotang’ani bw’ekanisa nemogwenerete abe omonto otari ne chingencho chimbe, ekiagera ere nomoteneneri bw’ebire ebia Nyasae. Ere taba omonto okwegwenera ere omonyene, gose omwango bw’okobea, gose oyonarete edivai, gose omonto bwanchete goaka abanto, gose gwancha okonyora kw’oborianania,

8korende abe omoroisia abageni, omwanchi amaya, oyobwerendete ase onsi, omoronge, omochenu, na oyomanyete kwerita ase onsi.

9Ere nigo emogwenerete abwate ring’ana ri’ekeene buna riorokereretigwe, erinde anyare koremia abanto ase okworokereria kw’obogima, na koebereria abakoengererania nere.

10Naki mbare abange batari koigwera, abagokwana amang’ana atari nengencho, abang’ainereria, mono baria b’okwaroka.

11Abwo mbagwenerete bakirigwe, ekiagera nkoonchorana bare abanto be chinyomba chingima ase okworokereria ayatagwenereti, na igo bakorigia okonyora kw’oborianania.

12Omonto oyomo obo, omobani obo abanyene, otebire, “Abanto ba Kirete nabanyaborimo botambe, ne ching’iti chintindi chi’orosana, abaribobe aboro.”

13Oborori obo nobw’ekeene. Ase ayio, obatogonyere bokong’u, erinde babe abagima ase okwegena

14ribaga ri’ogotegerera emegano y’Abayahudi, gose amachiko ’abanto aba bakoonchorana ekeene.

15Ebinto bionsi nebichenu ase abwo bare abachenu, korende tikeri ekere egechenu ase abwo batachenegeti na abategeneti, ekiagera ebirengererio biabo na okomanya gwe chinkoro chiabo ime biabeire ebitachenegeti.

16Igo bagoteba ng’a mbamomanyete Nyasae, korende ase ogokora kwabo bamokana. Nigo bare abagechigwa, abatari koigwera, na ase ayio tibakonyara gokora ogokora okuya konde gwonsi.

Jump to: Chapter 2 →