Titus 3

Gussi (EBIBILIA ENCHENU) 2020

← Chapter 2 Jump to:

1Oinyorie abanto bekeyie ase abagambi, na ase abare nokobua, naende babe abaigweri, bebeke ang’e gokora kera ogokora okuya.

2Obatebie tibakwana bobe igoro ya monto onde bwensi, tibaba abanyariomana, korende babe abaremereria, bakoorokia obwororo ase abanto bonsi.

3Naki agwo ritang’ani intwe nigo twarenge abasomba b’okogania okobe gwe chingencho ao ao ase okwegokia. Twarenge kogenderera ase obobe na emoko, tware kogechigwa na kogechana.

4Korende ekero obuya bwa Nyasae, Omotooria oito, na obwanchani bwaye ase mwanyabanto bwaorogetigwe

5agatotooria, tari ase ogokora kw’oboronge twakorete intwe, korende ase amabera aye ase ogosibigwa goetera ase okoiborwa gwa kabere. Nabo agatokora abayia n’Omoika Omochenu,

6oyo atoitererete ase obonge goetera ase Yeso Kristo, Omotooria oito,

7erinde gatwanyorire oboronge ase amabera aye, tonyare koba abanyamwando b’obogima bwa kare na kare, obo tosemeretie.

8Ring’ana eri neri’ekeene. Igoro y’amang’ana ayio nindigetie oyakwane ne chinguru, erinde abwo bamwegenete Nyasae banyare kwerua ase ogokora okuya. Amang’ana aya namaya, naende nanyare gokonya abanto.

9Korende aye, bweatanane korwa ase amaborio ’oboriri, ne chinderia chie chisokoro, na eriomana, na okoamererania igoro y’amachiko, ekiagera tibigokonya kende, naende tibiri nengencho.

10Omonto orarente okweatanana, ekero kwamokanirie erie ritang’ani, naende eria kabere, omwange.

11Manya ng’a omonto onga buna oyio bweatananire, naende nomokori ebibe, na ere omonyene bwegambirie.

12Kondatome Artema gose Tukiko gocha asore, teema buna oranyare gocha asende aria Nikopoli bwango, naki nindengereretie komenya aroro ekero ki’obokendu.

13Kora omokia gokonya Zena, omomanyi bw’amachiko, na Apolo, ekero okobatoma ase orogendo rwabo, na origererie buya ng’a tibaremerwa kende gionsi.

14Na abanto baito tiga beorokererie kwerua ase ogokora okuya, na gokonya aase oboremerwa bore, erinde tibaba batari nokwama.

15Aba bonsi bare amo nainche bagokwanirie. Tokwanerie baria batwanchete ase okwegena. Obuya bobe amo nainwe mwensi.

← Chapter 2 Jump to: